Mateus 5:16 - Tradução Bíblica Pacaas Novos

¹⁶ Je ca tomi' xuhu' ca'. Ac i ma' tara ca toha ne naran nuhu' ta. Toha mi' jujun oro wari'. Ma' ta querec pin' cacain ca ara hwe ma', pain ca ara hwein ca awi wa ma'. Ma' ta awi na xin Iri' Jam ta cocon Cotere' co pe pawin pahu'.

Mateus 5:16 Iomraidhean Croise

Mateus 23:5

Xin to e' nana pain oro ca ara caca ma'. Win ne ca mam' xec xec cacain cote ne tapari carawa ca xirao' to cacain capijacon Iri' Jam ma', tucu ac cacain na pain jitaracocon pain taparacocon. Win ne ca oc xirac cocon cote ca tamacon womicocon ma' quem. Ma' ta querec pin' cacapari' oro wari' pain ca awi nexi' ca' nana pain oro ca ara nucucun pain ca howa xo' iri' xi' ma caca ma'.

Mateus 23:9

Om ca na ne pain ca te ximao hun wari' pain ca in ac ximao hun quem. Xi ma' xica' pe ara ca Cote hwe ta, Cotere' co pe pawin cwain. In ac pan jun ta.

Mateus 5:45

Ma' ta querec pin' xihwe pain ca an xiho' hun Cotere' co pe pawin ma', pain ca om noc taxipa' cocon oro wari' co noc pan nonon ma'. Win ne ca ja' toha con xina ma'. Toha toha mi' xam' tata oro wari', toha mi' tata co pan teretem nana ma', toha mi' tata co awi nana ma' quem. Ac i ma' na pain ca tomi' pan' cain xowi' quem. Pan' pa' pan' pa' xam' tata oro wari', pan' pa' tata co xuruxut xo' nana ma', pan' pa' tata co om xuruxut xo' nana ma' quem.

Mateus 6:16

Mo ta an to xin hwein ca cao' wa con Iri' Jam ma', pain ca momon tomi' e' xun hun ma', ta naro hwe me ta ac tococwa na. Ta an xiho' huhun oro wari' co ac ca iri'o' xi' ca' tara me nana pain ca an to pin cacain ca cao' wa con Iri' Jam. Naro ximama' nana. Ma' ta querec pin' cacapari' oro wari' pain ca an to urut pain ca cao' wa pain ca momon tomi' e' urut con Iri' Jam cwa' nana. Je ca tomi' xuhu' ca', tomi' iri'o' inuhu': Om ta cut pan cacain oro ca awi wa con Iri' Jam. Xi wara cut pin ara cacain ca tomi' querec te nucucun oro win ma' caca pain ca xec xec ximama' nucucun ta.

Mateus 6:9

Tomi' xun iri jun ne, tomi' ca' jun: Coturut Iri' Jam co pe pawin. Param urut pum pain ca querec pin' querec pin' pi' pin quequem oro wari' pain ca awi tamana nem pain ca Iri' Jam nem.

Mateus 9:8

Querec iri nanain i ma' oro wari' ma' ne, wa wa pin ac caca na, in ac tamana ac cocon na Iri' Jam quem. Awi na Iri' Jam ta, mi' non pain ca hwara' opa wa wari' cwa', pain ca quep xio ron co carama pe cwa' ta con ca' na ca tomi' caca ma'.

Lucas 11:2

Tomi' ac tococwa na: Tomi' xun iri jun ne, tomi' ca' jun: Coturut Iri' Jam. Param urut pum pain ca querec pin' querec pin' pi' pin quequem oro wari' pain ca awi tamana nem pain ca Iri' Jam nem. Param urut pum pain ca maqui' hap ne xec nein ca taramaxicon pe ho' taramaxicon pe ho' pi' pin momon oro wari' pain macan' ca' quem.

João 15:8

Mo ta ara hwein oro ca hohot non Te ma', querec pin' ac cocon tara oro wari' pain ca hwara' opa nucun pain ca awi tamana nucun. Ac i ma' tara ca an hwet pe hwein ca taxipa' mahu' ma' quem na ca tomi' caparut.

Atos 9:36

Pe nain xijein cidade narima' co howa non Jeju quem. Tabita na wixicam pain capijacocon oro judeu. Pain capijacocon oro grego ma' iri na ne, Dorcas na wixicam. Jope na wixinain cidade ca pe cama ma'. Tama' ara nain ca awi wa Dorcas ma', xiram pa' nonon oro wari' co om nonon carawa quem. Mi' taxipa' nonon pain oro carawa ca wajim' caca ma', je cwerequem pane.

1 Coríntios 14:25

Coromicat ac ca tara: Om paxi' na ca querec pin' cacapa' pain ca pan tem ne oro win ma' ne cwa', ane taxi' pan capa' pain Iri' Jam ne, ac i ma' tara ca tomi' ca ma'. Pe torotop tucu hwet mi' tarain macan', tomi' querec te ac con tara Iri' Jam pain ca in ac con ma'. Pe ho' momon caram cwa' co howa nenem cwa' ira ac con tara quem.

2 Coríntios 9:13

Quep xiho' iri jujun ne, querec pin' ac cucuhu' tara pain ca tomi' ha' hun Iri' Jam ma', je pain ca an hwet pe hwein ca howa nuhu' pain ca tomi' ha' hwein capijacon con Cristo. Tomi' querec te totoron pain ca quep xiho' xuxun huhun cocon oro xucucun co ximin nana ma' quem.

Gálatas 1:24

Tomi' querec te tamana ac cocon na Iri' Jam pata'. Awi na Iri' Jam, to' howa pin non Paulo ta nana pata'.

Efésios 2:10

Wirico ara xi' na Iri' Jam co to' xocoricon wari' pin napari' pain ca win cwere pin xun Cristo Jeju. Ma' ta ara hwein ca awi wa ca wara coromicat an pe mi' xuhu' pane napari' pain ca ara tatarain ta capari' pain cara pane.

Efésios 5:8

To paxi' hwein ca jitacat nein pane, pain ca om querec pin' querec hun Iri' Jam pane. Ane to pin hwein xec pain xocori ca' ne. Xi om ne ca win cwere pin ara hun Taramaxicon nexi' ta. Je ca tomi' xuhu' ca': Xuruxut xo' je. Win caca oro wari' co to nanain xec ma'.

1 Tessalonicenses 2:12

Ac cote cacama hwijima' urut pahu' pain ca hu urut pahu' ma'. Tomi' toto urut pahu', hu urut pahu' pain ca xuruxut xo' je urut pahu' ma'. Win ne ca howa pin hun Iri' Jam co tora' nuhu' ma', pain ca taramaxicon pe ho' xim cuhu' ma', je pain ca jao jao ma' xine pain ca awi tamana ne cuhu' ma' urut pahu' pane.

1 Timóteo 2:10

Na e' na pain ca mam' to' awi e' xequequem pain oro carawa ca ara pan cacama pain ca quep xiho' cocon oro win ma' cacama ma'. Je ca hohot ne cacam oro narima' co howa urun Iri' Jam ta nana ma'.

1 Timóteo 5:10

Hohot e' na pain ca quep xiho' tacama narima' co wara querec pin' wa pain ca ara taxipa' camain oro ca awi wa pane. Mo na: Co wara querec wet querec wet horon pin nanam humaxicam pane. Co querec te taxipa' nonon co howa nana co maqui' nanain xijein xirim pane, co cao' to ho' xine, pi'am to jein xuru ca' nonon pane. Co xiram pa' taxipa' nonon co howa nana pain ca ara mi' e' cocon pain oro carawa ca param caca pane quem. Co quep xiho' taxipa' nonon oro wari' co i'ina nonon oro carawa pane quem. Co win xumu taxipa' nain oro ca xiram pa' wa pain ca ara mi' cocon pain oro ca awi wa co howa nana pane quem. Mo ta xut xo' ac i ma' cama pain ca e' e' wet qui' ca taxicam pane, hohot ac ne tara pain ca quep xiho' tacama pain xocori ca'.

1 Timóteo 5:25

Ac i ma' nana oro wari' co ara nanain ca awi wa quem. Ma' nana co wara querec pin' wawa pain carawa ca awi ca ara caca ma'. Oro xucucun iri nana ne, om ca querec pin' hap tococwa pain carawa ca awi ca ara caca ma'. Ame ma e', main taxi' ac tococwa tara pain carawa ca awi ca ara caca. Om ta joc xim ac cacain ta.

1 Timóteo 6:18

Hu mip ca' roron quem: Tama' ara jein oro ca awi wa. Ta xiram pa' hwein caramajuhu' quem me. Wara awori to je pain ca mi' mi' tiquin' hwein pain ca quep xiho' huhun oro wari' co om nonon carawa ta roron. Oro carawa ca awi ca ara caca ma', je i ma' iri' caramaxicocon pain ca caramaju caca ma'.

Tito 2:14

Om ca nain ho' xucun pari' pane, mi' pin caho' xuhu' ta napari' pane. Ma' ta to' witan ca' xuhu' pain oro ca pan teretem nuhu' ta napari'. Ac ca hohoc capari' na pain quicon. Ma' ta to' om pin tain ca caracat nuhu' ta napari'. Ma' ta iri' wari' ne xuhu' ta napari'. Param napari' pain ca win xumu xun pain ca tama' ara xin oro ca awi wa quem.

Tito 2:7

Wum quem Tito, an hwet mi' roron pain ca awi wa, tama' ara xo' ra. Ma' ta win ca ne quequem pain oro ca ara nem ma'. Pijim' iri roron pain capijacon Iri' Jam ne, om ta tomi' capijacon e' ma pain. Na e' na pain ca maqui' nein iri' xumum ca pijim' nem. Na e' na pain ca querec pin' quequem pain ca xut xo' nem pain ca pijim' momon quem.

Tito 3:14

Ac i ma' tatara oro xerexi' pain Creta ma' quem. Tomi' roron, ara taxipa' jein ca awi wa ta roron. Quep xiho' jujun oro wari' pain carawa ca om nonon ta roron. Om ta jam' ne curuhu' ta roron, xi quep xiho' capari' ca jam' ne ca cwere wa ta roron quem.

Tito 3:4

Ac i ma' paxi' iri' pane ira. Ane xiram pa' capari' Iri' Jam co to' witan napari' ne. An hwet mi' iri napari' pain ca xiram pa' nucun ne, je pain ca tomi' querec te tomi' querec te xam' capari' ma',

Hebreus 10:24

Ma' tara ximixi' pain ca hu caracan xijexi', ma' ta tomi' querec te tomi' querec te tiquin' xijexi'. Ma' ta ara mi' xijexi' pain oro ca awi wa quem.

1Pedro 2:12

Xuruxut xo' je pain ca to ho' huhun oro wari' co om howa nana ma'. Tomi' em' paxi' tuturuhu', pan teretem nana ta paxi' tuturuhu'. Je i ma' ira, xuruxut xo' je, ma' ta querec pin' cucuhu' pain ca ara hwein oro ca awi wa ta. Aram aram awi na Iri' Jam ta ac caca tara pain xec nein ca in qui' ta' nucun quem.

1Pedro 2:9

Wahu' iri na ne, tora' nuhu' Iri' Jam pain ca wari' ne cuhu' ma'. Ac sacerdote nucun pin hwe pain ca taramaja mi' hun pain ca Iri' Taramaxicon ca ma'. Xica' pe na Iri' Jam co wari' ne nuhu'. Ma' ta tomi' hwet huhun oro wari' pain ca hwara' opa tamana ne ca', pain ca ara mi' toton pain oro ca awi wa ca' nuhu'. Wirico co hwerehwet ca' jein ca jitacat nein xim ta nuhu' pane, wirico co wixicam pin xine pain naran ne ca awi tamana ca' nuhu' pane quem.

1Pedro 3:1

Wahu' quem oro narima', pain ca ma' cuhu' tarama' ma' quem. Tomi' ha' tomi' ha' xam' jujun taxuhu'. Am ma' caca waram taxuhu' co om howa nanain capijacon Iri' Jam ma'. Je i ma' ira, tomi' ha' cara jujun. Om paxi' tara ca cuc cuc huhun pain ca howa je howa je huhun ma'. Querec pin' iri tuturuhu' pain ca xuruxut xo' nuhu' ne, aram aram howa pin ac caca tara pain ca querec e' cucuhu' pain ca xuruxut xo' nuhu', je pain ca in ac iri'o' hun Iri' Jam ma' quem.

1Pedro 3:16

Tomi' in hwet xo' iri jujun ne, tomi' wixite e' ac huhun tara, ta tomi' ximama' huhun me ta. Tomi' hwet e' jujun pain carawa ca taxi' hwe pain ca hohot con Iri' Jam. Ma' ta wixipa' pin caca co tomi' napat nunuhu' pain ca xuruxut xo' nuhu' pain ca howa hun Cristo ta.

1Pedro 4:11

Mo ta mi' cuhu' pain ca pijim' wa ma', pijim' xo' ac hwe tara. Xi capijacon Iri' Jam pan ara ne ca pijim' hwe ta. Mo ta mi' cuhu' pain ca quep xiho' hun win ma' nuhu' ma', mam' quep xiho' ac hun tara pain ca hwara' opa nucun Iri' Jam ca mi' taxipa' ca ma'. Ma' ta awi na Iri' Jam ta caca oro wari'. Wirico Jeju Cristo tara co mi' nonon pain ca tomi' ac i ma' caca ma'. Hohot na pain ca tomi' querec te xun pain ca awi tamana cara nucun. Na e' na pain ca tomi' querec te xun pain ca hwara' opa tamana cara nucun ma' quem. Amém, iri'o' na ca tomi' ne ta.

1Pedro 4:14

Tomi' xirac iri nunuhu' oro wari' pain ca howa hun Cristo ne, param mi' ac cuhu' na pain ca awi wa Iri' Jam. Xi querec pin' ara xihwe pain ca corom pe ho' cara cuhu' Tamataracon Iri' Jam ca awi tamana ta.