Mateus 3:2 - Tradução Bíblica Pacaas Novos

² Ca' na ca pijim' nucun: Cwirin' je, xi om ne ca wixicam pin ta' ara ne xec nein ca taramaxicon pe ho' pin ton cocon oro wari' Iri' Jam ta na.

Mateus 3:2 Iomraidhean Croise

Mateus 10:7

Pijim' ca' jujun, wixicam pin ta' na xec pain ca taramaxicon pe ho' pin ton cocon oro wari' Iri' Jam ta tara ca pijim' nuhu'.

Mateus 11:20

Tomi' ac ca na Jeju ma', pain ca tomi' em' tococwa oro wari' co to nanain oro xijein cidade pain i cain. Xi an hwet mi' tamana paxi' ara tococwa pain ca hwara' opa nucun pain ca ara cain ca om ara taxi' ne ca wari' wa ira. Ane om cwirin' je na caca ne.

Mateus 12:41

Ame hwe e'. Main maqui' tara xec nein ca wap xim cuhu' pain ca wari' nuhu' ta napari' Iri' Jam pain oro xec nexi' ca'. Wap xim iri turuhu' pain oro ca caracat nuhu' ne, coco' ja' pan ac cucuhu' tara oro wari' nein Nínive cara pane. Tomi' em' ac cucuhu' tara: Em' nana caram cwa' ta tuturuhu'. Tomi' ac i ma' tatara, xi cwirin' pan ara caca pain ca hu qui' cocon Jonas pane. An to pin ac cacain na ca caracat nucucun pane. Je ca tomi' xuhu' quem: Je xi cwirin' qui' hwein ca hu pan xuhu' pain xocori ca' quem? Xi hwara' opa tiquin' ca' ara ton Jonas cara pane. Hwara' opa tiquin' ca' ton ca' ira inuhu' ta na ca tomi' tococwa ma'.

Mateus 13:11

Tomi' ac caparut na: Wara coromicat xo' na Iri' Jam pane. Main taramaxicon pe ho' toton oro wari' co howa nanapa' ta na, ac i ma' paxi' na ca coromicat xo' nucun pane. Ane om tomi' hwet tococwa pain oro wari' ne. Wahu' pain ca taxipa' mahu' ca', an hwet mi' nuhu' pain ca coromicat xo' nucun. Mi' nuhu' pain ca taraju pa' wa. Oro xucucun wari' co om howa nanapa' ma' iri nana ne, om ca mi' tococwa pain ca taraju pa' wa quem.

Mateus 13:24

Pijim' mami' xuhu' ta ac tococwa na oro wari' ma'. Pijim' joc mam' mi' xuhu' con Iri' Jam ma', pain ca taramaxicon pe ho' cocon oro wari' ma'. Carawa ca ara ne pain ca taramaxicon pe ho' tococwa ma', an xiho' nain carawa ca ara ne con wari' ma', co wixicaracao' tain nain tocwi trigo pain totacon. Awi na tocwi trigo ca wixicaracao' ca.

Mateus 13:31

Pijim' mami' xuhu' ta ac tococwa na, pijim' joc mam' mi' xuhu' con Iri' Jam ma', pain ca taramaxicon pe ho' cocon oro wari' ma'. Carawa ca ara ne pain ca taramaxicon pe ho' cocon oro wari' ma', an xiho' nain carawa ca ara nain wijimain tocwi mostarda ma', ca oin' pe cain totacon wari' ma'.

Mateus 13:33

Pijim' mami' xuhu' ta ac tococwa na, pijim' joc mam' mi' xuhu' con Iri' Jam ma', pain ca taramaxicon pe ho' cocon oro wari' ma'. Carawa ca ara ne pain ca taramaxicon pe ho' cocon oro wari' Iri' Jam ma', an xiho' nain carawa ca ara ne pain ca an camain ca to' memerem nein capam' narima' ma'. Maxoc hwara' iri nain trigo ne, joc wanan ac camain na ca to' memerem nein capam'. Ara pi' pin iri nain oro ca ara nein ne, an pe ac camain na, memerem pin ac ne na quem. Ac i ma' na ca pijim' joc mam' mi' tococwa pain ca to' memerem nein capam' pane.

Mateus 13:47

Pijim' ac caparut na: Carawa ca ara ne pain ca taramaxicon pe ho' toton cocon oro wari' Iri' Jam ma', an xiho' nain carawa ca ara ne cocon oro co xin nanain cote ne caji wi ca mam' pa' wa hwam. Mija na oro xucun hwam co quep caca.

Mateus 13:52

Je ca tomi' xuhu' ca' ac caparut na. Taxi' pin hwein ca ca' na wa capijacon Iri' Jam. Xi ca' na xo' ara xuhu' ta. Ha' nuhu' pain ca ca' na huhun pain capijacon Iri' Jam, ha' nuhu' pain ca ca' na huhun pain xocori capija ca' quem, pain ca ca' na xuhu' pain ca taramaxicon pin nucun Iri' Jam quem. Ca' na iri hwein capijacon Iri' Jam je xocori capija ca' ne, an xiho' ac hun na waximain xirim co an hwet qui' nain oro xocori caramaxicon je oro wara caramaxicon ma' quem. Mi' tiquin' ac tococwa na pain oro win ma' ca ma'. Ac i ma' na ca tomi' caparut ma'.

Mateus 18:23

Je ca tomi' xuhu' ca', tomi' xin carawa ca ara ne pain ca taramaxicon pe ho' capari' Iri' Jam cwa'. An xiho' nain carawa ca ara ne con taramaxicon co coromicat ca' ma': Tomi' xo' toton oro co taramaja mi' e' nanapa' cwa'. Mo ta ma' ne carawa ca dever cacapa' ma', pagar pin ac cacapa' pain tara ta na ca coromicat nucun.

Mateus 20:1

Pijim' ac caparut na: Carawa ca ara ne pain ca taramaxicon pe ho' toton cocon oro wari' Iri' Jam ma', an xiho' nain carawa ca ara ne con waximain totain uva ma'. Iri' xo' xec pin iri na ne, mo tomi' xo' toton caram ma' co taramaja xi' nana ma' ac ca na, mo hwet ac tococwa na.

Mateus 22:2

Carawa ca ara ne pain ca taramaxicon pe ho' cocon oro wari' Iri' Jam ma', an xiho' nain carawa ca ara ne con taramaxicon ma', co an ta' narima' panxica. Taramaxicon ma', tomi' ac ca na: Cut in xi', cao' querec te wi xijexi' pain ca an ta' narima' panxita' cwa' ta na.

Mateus 23:13

Tomi' ac tococwa na: Wa inuhu' me oro co ca' na taxipa' nanain ca xirao' nucun Moisés! Wa inuhu' quem oro fariseu! Ximin hwe ta. Ac ca iri'o' xi' ca' tara me hwe. Wap tamana turuhu' Iri' Jam ta. Xi to' i'ina ara huhun oro wari' pain ca ca' na pan teretem huhun pain capijacon ta. Ac ca narain ho' huhun na pain ca xin ne cocon Iri' Jam pain ca taramaxicon pe ho' xuhu' ta cocon ma'. Om pan na ca xin ne hun pain ca taramaxicon pe ho' xim cuhu' ma', narain ho' huhun pain ca xin ne cocon pain quem.

Mateus 25:1

Tomi' ac caparut na: Carawa ca ara ta' ne pain ca in qui' ta' ta' ca', pain ca taramaxicon pin ta' ta' ca', an xiho' tarain carawa ca ara nanam oro mon xojam' co winim' xun nonon wari' co an ta' narima' ma'. Ma' 10 nana oro mon xojam' co winim' xun nonon. Cut nanain naran nequequem, maji xuruxut cam' xun e' ac cacama na.

Mateus 25:14

Tomi' ac caparut na: Carawa ca ara ta' ne pain ca in qui' ta' ta' ca', an xiho' tarain carawa ca ara nonon wari' co taramaja mi' e' nonon taramaxicon nucucun. Taramaxicon nucucun ma', mao tain pira ac ca na, tomi' cut in mam' ac tococwa na co taramaja mi' e' nonon ma', cut mi' ac tococwa na pain dinheiro nucun. Tomi' xo' ac tococwa na: Main ca' dinheiro ne ca'. Querec wet xo' jein pa'ao' me. Taramaja xo' jein pa'ao' quem, ma' ta hwara' pin ne pahu' ta tata.

Mateus 4:17

In mao iri nain Galileia Jeju ne, pijim' pin ac ca na, je win pijim' pin ca pane. Cwirin' je, xi om ne ca wixicam pin ta' ara ne xec nein ca taramaxicon pe ho' pin ton cocon oro wari' Iri' Jam ta na ca pijim' nucun.

Mateus 4:23

Jeju ma', xut mao ac cain na oro xijein cidade pain Galileia ma'. Ca' na pe nain oro xirim ca cut in xucucun oro win judeu urut quem. Pijim' mi' tata pain capijacon Iri' Jam ma', pain ca taramaxicon pe ho' pin xim cuhu' Iri' Jam ta tococwa ma'. Quep xio ac tococwa na oro wari' pain oro xijein ca caxi nucucun quem.

Mateus 5:10

Param mi' tata pain ca awi wa oro wari' co ja' tequi' quep em' wawa pain ca ara cacain ca param nucun Iri' Jam ma'. Wiricoco ara xi' nana co wari' ne ca Iri' Jam pain ca taramaxicon pe ho' cocon ta.

Mateus 5:3

Param mi' tata pain ca awi wa oro wari' co ximin nana ma', xi wari' ne ara tococwa pain ca taramaxicon pe ho' xun tococwa ma'.

Mateus 6:10

Param urut pum pain ca maqui' hap ne xec pain ca taramaxicon pe ho' taramaxicon pe ho' xam' momon oro wari' pain oro xijein macan' ca' quem. Param urut pum pain ca tomi' ha' tomi' ha' xam' quequem oro wari' pain oro xijein macan' ca' quem. Win caca oro jam co taramaja mi' nenem ma', pain ca tomi' ha' tomi' ha' pi' pin quequem pain pawin ma'.

Mateus 6:33

Win xumu cain' jun Iri' Jam. Tomi' ha' jun pain ca taramaxicon pe ho' cuhu' ma'. Cut mi' ac cuhu' tara pain oro carawa ca om nuhu' ma'.

Marcos 1:15

Ca' na ca pijim' nucun pane: Wixicam pin na xec nein ca taramaxicon pe ho' xim capari' Iri' Jam ta na. Cwirin' je, howa jein capijacon ca tomi' hwet nuhu' pain ca to' witan xim cuhu' ta na ca pijim' nucun pane.

Marcos 1:4

Wirico João co wara tomi' pe wa pane, pain ca tomi' hwet tarain capija ta ca Iri' Jam pane. Je ca pe cain mahweri pane. Ja' nonon pain com oro wari', pijim' ac cocon na: Ja' je com, ma' ta querec pin' xihwe pain ca cwirin' pin hwein ca caracat nuhu', je pain ca xic am pin cain ca caracat nuhu' Iri' Jam quem ta tata.

Marcos 6:12

Mama' ac caca na, pijim' mi' ac tococwa na pain capijacon Iri' Jam oro wari' ma' quem. Cwirin' je, an to pin jein ca caracat nuhu' ta tata.

Lucas 1:16

Quep xiho' mija totoron oro win ma' ma pain ca wari' nein Israel hwe ma', quep xiho' totoron pain ca cwirin' pin xin cacain ca caracat nucucun ma', in hwet ac cocon tara Iri' Jam co Iri' Taramaxicon ne caca oro hwanana nuhu' pane.

Lucas 11:20

Ane mi' pan capa' pain ca hwara' opa wa Iri' Jam ne. Je ca ha' capa' pain ca tomi' jein pin toton oro caxicon jam cwa'. Je ca to' querec pin' pan cuhu' pain ca maqui' pin ne xec nein ca taramaxicon pe ho' pin cuhu' Iri' Jam ta na ca tomi' tococwa ma'.

Lucas 13:3

Om na ta, tomi' iri'o' inuhu'. Mo ta om cwirin' pin hwein ca caracat nuhu' ma', cono' cono' pi' pin ac hwe tara quem.

Lucas 13:5

Om na ta, tomi' iri'o' inuhu'. Mo ta om cwirin' pin hwein ca caracat nuhu' ma', cono' cono' pi' pin ac hwe tara quem na ca tomi' tococwa ma'.

Lucas 15:10

Je ca tomi' xuhu' ca' ac tococwa na. Tomi' querec te ac i ma' nana oro jam co taramaja mi' nonon Iri' Jam, tomi' querec te tamana nonon wari' co cwirin' pin nain ca caracat nucun. Xica' pe paxi' na, tomi' querec te tamana nonon ta na ca tomi' tococwa ma'.

Lucas 15:7

Je ca tomi' xuhu' ca' ac tococwa na. Ac i ma' tara Iri' Jam cocon oro jam co taramaja mi' nonon pain pawin cain, tomi' querec te tamana tatara con wari' co cwirin' pin nain ca caracat nucun ta. Xica' pe paxi' tara, tomi' querec te tiquin' ca' totoron cocon ca 99 nucucun co wara xuruxut xo' nana ma', co wara cwirin' pin nanain ca caracat nucucun ta na ca tomi' tococwa ma'.

Lucas 16:30

Om na ta jeo' Abraão ac ca na. Mo xi hwet cocon wari' co e' mami' ma', cwirin' pin ac caca xira ta na.

Lucas 21:31

Ac i ma' tara pain ca in qui' ta' ne quem. Querec iri jein ca hwet pin ne oro ca tomi' hwet xuhu' ca' ne, taxi' ac hwein tara ca wixicam pin ne xec pain ca taramaxicon pe ho' ton cocon oro wari' Iri' Jam.

Lucas 24:47

Xirao' to ca' nana pane quem: Oro wari' co howa nonon ma', na e' na pain ca pijim' hwet cocon oro wari' con Cristo ta nana pata'. Pijim' pijim' pi' pin totoron oro wari' pain oro xijein macan'. Pijim' ca' totoron: Cwirin' pin jein ca caracat nuhu', ma' ta xic am pin cain Iri' Jam ta totoron. Pijim' cain' to tatarain Jerusalém, mao ac ne ma' tara cocon, pijim' mama' ac cacain tara oro xijein macan' ta na ca xirao' to caca pane.

Lucas 6:20

Noro ac tococwa na co taxipa' ca ma'. Tomi' ac tococwa na: Wahu' pain ca ximin hwe ma', param mi' nuhu' pain ca awi wa Iri' Jam. Xi wari' ne ara cuhu' pain ca taramaxicon pe ho' xim cuhu' ta.

Lucas 9:2

Pijim' mi' jujun pain ca taramaxicon pe ho' toton cocon oro wari' Iri' Jam ta. Quep xio pin jujun co caxi nana quem ac tococwa na.

Atos 11:18

Taraju iri nanain ca pijim' nucun ne, tomi' napat tomi' napat om pin ac cocon na Pedro. Tomi' querec te pin nonon Iri' Jam quem. Awi na Iri' Jam ta nana. Wa wa urut con pain ca xiram pa' cocon oro wari' co om judeu nana ta. Xiram pa' inuhu', ma' ta cwirin' pin hwein ca caracat nuhu', ma' ta e' cara hwe pain pawin ta cocon ma' ira, ac i ma' na ca tomi' caca pain ca tomi' querec te nucucun ma'.

Atos 17:30

Iri' Jam ma', om ca wap hap cocon oro hwanana pain cara pane, om ca wap hap cocon pain oro ca coromicat ximama' nucucun pain ca om taxi' querec cocon pane. Ane cwirin' pin jein ca caracat nuhu' pain xocori ca' capari' ne, tomi' tomi' xam' napari' pain oro xijein macan' ca to iri'.

Atos 2:38

Cwirin' pin jein ca caracat nuhu' ta ac cocon na Pedro. Ja' ja' pi' pin ac xihwe tara pain com quem. Ma' ta querec pin' xihwe pain ca howa pin hun Jeju Cristo. Ma' ta xic am pin cain ca caracat nuhu' Iri' Jam ma' quem. Mi' ac cuhu' tara pain Tamataracon.

Atos 20:21

Hu hu pi' pin inonon oro wari' quem, co judeu nana ma', co om judeu nana ma' quem. Na e' na pain ca coromicat ni hwe, an to pin jein ca caracat nuhu', tomi' hwet jun pain Iri' Jam quem inonon. Howa jun Taramaxicon nexi' Jeju ta inonon quem.

Atos 26:20

Pijim' cain' inonon co to nanain Damasco, pijim' ac toton na co to nanain Jerusalém, wiricoco co to nanain oro xijein cidade pain Judeia ma' quem. Pijim' inonon co om judeu nana quem. Cwirin' jein ca caracat nuhu', howa jun Iri' Jam quem inonon. Ara jein ca awi wa, ma' ta querec pin' xihwe pain ca cwirin' pin hwein ca caracat nuhu' ta inonon pain ca pijim' toton pane.

Atos 3:19

Je ca tomi' xuhu' ca' ac tococwa na. Cwirin' pin je. Coromicat ni pin je. Howa jun Iri' Jam, ma' ta xic am pin cain ca caracat nuhu'.

2 Coríntios 7:10

Je ca tomi' xuhu' ca'. Ja' tomi' xaxa' iri napari' pain ca caracat nexi' Iri' Jam ne, cwirin' pin ac iri' na, coromicat ni pin ac iri' na, witan pin ac iri' na, e' pin ac iri' na quem. Hohot hohot pi' pin napari' ca ja' tomi' xaxa' ac i ma' capari' Iri' Jam ta. Ane om ac i ma' ne cocon oro wari' co om howa nonon ne. Tomi' xaxa' iri nana pain ca caracat nucucun ne, om ca cwirin' cacain. Aram aram cono' pin e' ac caca na quem.

Colossenses 1:13

Xi wirico ara ca co to' witan ca' napari' con Caxicon Jam ma', co taramaxicon pe nain ca jitacat nein xim ma'. To' witan ca' napari' con, an to pin ac capari' na pain ca taramaxicon pe ca Panxica co om noc ca ma'.

2 Timóteo 2:25

Na e' na pain ca hu wixite xuxun co tomi' in pin nanapari'. Am mi' ton cocon pain ca cwirin' wa Iri' Jam ma'. Am mi' ton cocon pain ca taraju pa' wa capijacon ca iri'o' ma' quem.

Hebreus 6:1

Je ca tomi' xuhu' ca'. Hohot na pain ca om noro in hwet noro in hwet e' xin oro capijacon Iri' Jam con Cristo ca wara ca' na qui' urut pahu' pain cara pane. Ca' na ca' na tiquin' xut urut pahu' pain oro xocori capijacon Iri' Jam con Cristo quem, ma' ta horon horon tiquin' hwe pain ca howa nuhu' ta urut pahu'. Wara pijim' ca' ara xi' urut pahu' pane: An to pin jein oro ca ara ximama' ne wara curuhu' ma'. Howa e' jun Iri' Jam ta, ac i ma' na ca wara pijim' urut pahu' pane.

2 Pedro 3:9

Xi ma' ara caca oro wari' co coromicat ca' nana: I'ina na Iri' Jam, xi ara pin cain ca wara tomi' pe nucun ta nana. Ane om i'ina ca ne, om ca om om ca. Winim' cara e' nuhu'. Noc noc xam' napari' pain ca pan' ara'am iri' pain ca wap xim capari'. Param e' napari' pain ca cwirin' cwirin' pi' pin xin ca caracat nexi' ta.

Apocalipse 2:21

Cwirin' pin rain ca caracat nem ta paxi' inam, winim' paxi' inam pain ca an pe pin camain ca caracat nequem ma', ane noc camain ca cwirin' wa ne. Quep ne quep ne tiquin' nonon oro xucun tarama' ma'.

Apocalipse 2:5

Je ca tomi' xuhu' ca': Mam' pe wet jein ca tomi' querec te nuhu' pane, pain ca tomi' ha' xixim na mahu' pain ca xo' howa ten qui' mahu' pane. Cwirin' pin jein ca caracat nuhu', jain jain mami' xine pain ca tama' tomi' ha' xixim na mahu' ma', tomi' querec te ac i ma' mami' xine. Ac pain cara pane tara pain ca xo' howa qui' mahu' pane. Mo ta om cwirin' pin hwein ca caracat nuhu' ma', hwet ac xuhu' tara, an ca' ac xuhu' tara pain ca mam' tom pe ne naran nuhu' ma'. Pe pe om pin ac nein tara maxinain pahu'.