Mateus 3:11 - Tradução Bíblica Pacaas Novos

¹¹ Ja' inuhu' pain com, xi om ne ca cwirin' pin ara hwe ta ac tococwa na. Wara maqui' paxi' ina, ane maqui' ta' pa'ao' ca xucun co hwara' opa tiquin' ca' napa' ne. Iri' wari' na quem. Om ca hohot ne pain ca quep xiho' camain' ton pain ca cut mi' ton pain caji caximacon ma', xi iri' wari' ta' ta. Mo ta cwirin' pin hwein ca caracat nuhu' ma', mi' ac cuhu' tara pain Tamataracon Iri' Jam. Mo ta om cwirin' je na hwein ca caracat nuhu' ma' quem, wixicaracao' mi' ac cuhu' tara pain cote ne xe ta.

Mateus 3:11 Iomraidhean Croise

Mateus 3:6

Tomi' hwet pin iri nanain ca caracat nucucun ne, ja' pan ac cocon na pain com João ma'. Ja' pe tata pain Jordão ma'.

Marcos 1:4

Wirico João co wara tomi' pe wa pane, pain ca tomi' hwet tarain capija ta ca Iri' Jam pane. Je ca pe cain mahweri pane. Ja' nonon pain com oro wari', pijim' ac cocon na: Ja' je com, ma' ta querec pin' xihwe pain ca cwirin' pin hwein ca caracat nuhu', je pain ca xic am pin cain ca caracat nuhu' Iri' Jam quem ta tata.

Lucas 1:17

Wirico tara panxima co wara o ta' na con Iri' Taramaxicon co wara tomi' pe ca Iri' Jam pane. Pijim' hwara' opa tamana tara, win ca profeta Elias cara pane, an xiho' toron Elias pain ca pijim' hwara' opa nucun. To' om pin tarain ca mana' caracan xucucun mana cote caca cocon mana panxicaca, tomi' querec te pin mami' ac xucucun tara. To' coromicat xo' pin ac cocon tara oro wari' co ari nonon Iri' Jam ma', aram aram coromicat an xiho' pin ac cocon tara co tomi' ha' nana ma' quem. Tomi' tomi' wara awori xo' totoron oro wari', ma' ta winim' xo' cocon Iri' Taramaxicon pain ca aram aram maqui' nucun. Ac i ma' na ca tomi' con Zacarias jam co taramaja mi' non Iri' Jam pane.

Lucas 3:16

Ane tomi' xo' ca' cocon João ne: Ja' paxi' inuhu' pain com ta, ane maqui' ta' ca xucun co hwara' opa tiquin' ca' napa' ne. Iri' wari' na. Om ca hohot ne pain ca taramaja mi' ton, om xi quep xiho' camain' ton pain ca tacom' mi' ton pain macorinain caji caximacon ma', xi iri' wari' ta' ta. Mo ta cwirin' pin hwein ca caracat nuhu' ma', mi' ac cuhu' tara pain Tamataracon Iri' Jam. Mo ta om cwirin' je na hwein ca caracat nuhu' ma' quem, wixicaracao' mi' ac cuhu' tara pain cote ne xe ta.

Lucas 3:3

Ma ac ca na, pijim' mao ac cain na oro xijein cidade ca to ja' pan nain iri' cwerein com ma', Jordão ma'. Pijim' ac tococwa na oro wari': Ja' je com ta. Ma' ta querec pin' xihwe pain ca cwirin' pin hwein ca caracat nuhu', je pain ca xic am pin cain ca caracat nuhu' Iri' Jam quem ta tata.

João 1:15

Tomi' hwet nonon oro wari' João pane, tomi' hwet mi' nonon con co ma' co capijacon Iri' Jam na wixicon. Ca' na ca tomi' cocon pane: Wirico co tomi' hwet xuhu' pane. Tomi' ca' inuhu' pane: Wara maqui' ina. Maqui' ta' pa'ao' na xucun co hwara' opa tiquin' ca' napa'. Xi om ne ca wara ma' ara ca pain ca om pan' querec ta' pane na ca tomi' tococwa ma'.

João 1:30

Wirico co ma' co tomi' ta' ne ac ca na. Wara maqui' ina. Maqui' ta' pa'ao' na xucun co hwara' opa tiquin' ca' napa'. Xi om ne ca wara ma' ara ca pain ca om pan' querec ta' pane, ac i ma' na ca tomi' xuhu' ne.

Atos 1:5

João cara pane, ja' nonon pain com oro wari'. Wahu' iri tara ne, om ta pain homa ne, mi' ac xihwe tara pain Tamataracon Te. Ac i ma' na ca tomi' tococwa.

Atos 19:4

Tomi' xo' ac tococwa na: João cara pane, ja' nonon pain com oro wari' co cwirin' pin nanain ca caracat nucucun pane, co an to pin nanain ca caracat nucucun pane. Tomi' ca' nonon quem: Main maqui' tara pa'ao' xucun ma', Jeju ma'. Wirico tara co howa hwe ta nonon oro wari' João pane, tomi' xo' ac i ma' nonon Paulo ma'.

Atos 8:36

Ca tiquin' mama' caca pain wana ma', aram aram hwet ac cacain na com ma', xuterem' ma'. Tomi' ac ca na wari': Noro ra, main ma' com ma'. Hohot na pain ca ja' mapa' pain com quem? Ac i ma' na ca tomi' con ma'.

Atos 8:38

Je ca tomi' con wari' co cuc in cuc in nain cavalo nein carroça. Quep xat rain ta, quep xat ac cain na. Xat iri na ne, quiji' ca' ac cacain na. Wirico Filipe ma', wirico wari' ma' quem, quiji' hwet ac cacain na com ma', ja' pan ac con pain na Filipe.

1 Coríntios 12:13

Ac i ma' iri' pain ca curucun Cristo iri' quem. Mija paxi' iri'. Ma' nana co judeu nana. Ma' nana co om judeu nana. Ma' nana co taramaja mi' e' nonon oro xucucun wari'. Ma' nana co om taramaja mi' nonon oro xucucun wari'. Mija paxi' iri', ane cut corom to cut corom to xam' capari' pain curucun Cristo Tamataracon Iri' Jam ne. An xiho' nain ca ja' iri' com pane, pain ca cut corom to mi' capari' pain curucun Cristo. Ma' xica' pe na Tamataracon Iri' Jam ca cut corom to mi' napari' pain curucun Cristo, om na xijein. Pe ho' pe ho' xam' napari' quem.

Efésios 3:8

Om paxi' na ca awi ta' pane. Awi tiquin' ca' paxi' nanapa' oro xucucun wari' nucun Iri' Jam cwa'. Ane mi' pan capa' pain ca pijim' mi' wa capijacon ne. Xiram pa' napa' pain ca pijim' mi' roron pain capija oro wari' co om judeu nana ta capa' pane. Pijim' hwet roron pain carawa ca awi tamana ca mi' toton capari' Cristo ta napa'. Xi na capari' pain ca querec pin' pi' pin xin ta.

Tito 3:5

to' witan pin ac capari' na. Om ca to' witan capari' pain carawa ca awi ca ara xi' paxi' iri' pane, om na. To' witan e' napari' pain ca xiram pa' pan capari'. Mam' to' witan napari' pain ca hwara' opa nein Tamataracon ca hohoc napari' pain ximixi' ca', ca to' xo' camara' mami' napari' pain ca mi' capari' pain xocori ca e' nucun quem. Mam' to' xocoricon wari' pin napari' pain quem.

1Pedro 5:5

Tomi' mip inuhu' pain ca xo' horon hwe ma' quem. Tomi' ha' jujun oro co wara tiquin' mama' cawaxi' nucucun ma'. Tomi' tomi' pi' pin inuhu', an hwet mi' xujuhu' pain ca om xec xec nuhu' ta, xi xirao' pe ara xine pain capijacon Iri' Jam ta. Ca' na ca xirao' pe nein: Ari nonon oro co xec xec nana Iri' Jam ta. Oro co om xec xec nana ma' iri nana ne, xiram pa' tata, quep xiho' tata quem. Ac i ma' na ca xirao' pe xine pain capijacon Iri' Jam.