Mateus 26:39 - Tradução Bíblica Pacaas Novos

³⁹ Xut xut xat, pe torotop tucu hwet mi' ac cain na macan'. Tomi' ac con na Cote ca: Te ac con na. Am xin ne mapa' pain ca tomi' xim ca'. Nain ho' ne pain ca jain jain ta' ne ca', pain ca mi' pin ta' ne ca' quem Te. Tara pum, nain ho' ne pain me paxi' inem, ane param e' tain ca param pan nem ne. Noc inain ca param ne ca' na ca tomi' con Cote ca.

Mateus 26:39 Iomraidhean Croise

Mateus 20:22

Xi taxi' hwein carawa ca wajim' mahu' ta ac tococwa na. Jain jain tamana ta' pain ca quep em' xim cacapa' oro wari' ta. Ha' turuhu' pain ca jain jain xiho' ac i ma' mahu' quem na ca tomi' tococwa ma'. Ha' naparut ta nonon.

Mateus 26:42

In ca' mami' ac tococwa na, tomi' mami' ton Te ta ac ca na quem. Te ac con na. Am om xin ne mapa' pain ca tomi' xim ca', pain ca nain ho' ne pain ca jain jain ta' ne pain ca mi' pin ta' ne ca' xim ca'. Mo ta jain jain ra mapa', mo ta mi' pin ra mapa' quem. Je i ma' pum ta Te. Param e' inain ca param pan nem ta na ca tomi' con ma'.

Lucas 17:16

Pe torotop mi' ac con na pain caximacon. Tomi' querec te tamana inem pain ca to' xio mapa' ca' ac con na. Co ma' co to' xio wa ma', om ca judeu ca. Wari' nein Samaria na.

João 11:41

Joc hwet pin ac cacain na pacun ma'. Noro pawin ac ca na, tomi' ac con na Cote ca: Tomi' querec te inem pain ca ha' mapa' pain ca tomi' xim ca' Te.

João 14:31

Ane na e' ne pain ca tomi' ha' tomi' ha' pi' pin tain oro ca ara ra capa' Te ne, pain ca mi' pin ra capa' ca'. Mi' pin ta' pan ina pain ca tomi' ha' ton ca'. Om ca nain ho' xije. Ma' ta taxi' cacapa' oro wari' pain ca om noc ton ca' naparut. Tequi' to je e'. Maji mama' xi' ta ac caparut na.

João 18:11

Om na, joc corom pin rain cote ne quit nem pain jajinain ma' ta Pedro ac con na Jeju. Cain' cain' xima quem ac con na. Noc inain xiton Te pain ca jain jain ra capa' pain ca mi' pin ra capa' ra? Om ca noc inain ton ta. Na e' na pain ca tomi' ha' ton, na e' na pain ca jain jain ta' pain ca mi' pin ta' ta' ca', xi wirico ara ca co jain jain ra napa' ta na ca tomi' con ma'.

João 5:19

Tomi' ac cocon na oro taramaxicon Jeju: Wata' pain ca Panxica Iri' Jam ta' ca', om na carawa ca ara taxi' ta' pain ca param pan ne. Tomi' iri'o' inuhu' ta. Querec iri inon Te pain ca ara cain ma' ne, je ca ara ta' ca'. Oro carawa ca ara ca Te cwa', je ca ara ta' quem.

João 5:30

Om na carawa ca ara taxi' ta' pain ca param pan ne. Tomi' querec iri inonon oro wari' pain ca ac juiz ta' cocon ne, pain ca tomi' querec toton pain carawa ca ara caca ma', pain ca wum co em' ta toton ma', tomi' ha' e' inain ca tomi' nucun Te pain ca tomi' querec roron capa' ma'. Tomi' xo' e' inonon pain ca em' hwe, mama' jein cote ne xe ta toton. Xi win xumu tain ca param pan ne ta. Win xumu e' inain ca param pan nucun Te co hwet roron oro wari' ta napa' cwa' na ca tomi' cocon oro taramaxicon Jeju pane.

João 6:38

Pain ca quiji' qui' tain pawin pane, om ca maqui' ta' pain ca ara tain ca param pan ne ta', om na. Ara tain ca param nucun Te co hwet roron oro wari' ta napa', je ca ara ta' ta' pain ca quiji' qui' tain pawin pane.

Atos 10:25

Hwet ac cain na xiricon Cornélio Pedro ma'. Corom mao ta' iri na ne, hwet qui' ac ca na Cornélio. Maqui' ma? Maqui' ina ta ac xucucun na. Pe torotop mi' querec te pan ac con na Cornélio.

Filipenses 2:8

Pain ca wari' pin ca ma', tomi' ha' cara non Cote ca pain ca om xec xec nucun. Xin ne pan non pain ca to' pa' pin teterem ta con. Om ca nain ho' pan xucun pain ca tomi' noro tocwa ma', pain ca tatatain mi' tocwa pain pana pane.

Hebreus 5:7

Pain ca pe pe wet cain macan' Jeju pane, tomi' non Cote ca. Merem na, merem mip na pain ca tomi' con ma'. Aca na quem. Xiram pa' ne me Te ac con na. Wum co to' witan taxi' ca' napa' pain ca mi' pin wa ca' ac con na. Ha' ac ca na quem, xi om ne ca xut xo' pan ara ca pain ca win xumu e' cain ca param nucun ta.

Apocalipse 19:10

Pan' hwet ac ton na pain caximacon jam co taramaja mi' non Iri' Jam. Ma' ta pe torotop mi' querec te ton inon ira. Ane tomi' capa' ne: Ta pe torotop mi' querec te mapa' me ta. Xi ac wum ara ta' ta, taramaja mi' e' inon Iri' Jam. An xiho' inem, an xiho' inonon oro win howa ma ma', co win xumu cara nonon Jeju ma', pain ca om an to camain' cacain oro ca tomi' hwet xine con. Pe torotop mi' querec te pan ron Iri' Jam ta! Xi wirico pan ara ca Jeju co tomi' hwet iri' pain ca pijim' hwet xuxun con oro wari' ta. Ac i ma' na ca tomi' capa' jam co taramaja mi' non Iri' Jam.