Mateus 26:24 - Tradução Bíblica Pacaas Novos

²⁴ Mi' pin ta' ina pain ca Iri' Wari' ta' ca'. Win ne ca xirao' pe cacapa' oro profeta pane. Mi' pin ta' paxi' ina. Ane ximin pan ta' ca co ma' co tomi' mi' xim napa' cocon co noc nanapa' ma' ne, co quep xim nanapa' ma'. Ximin tara. Hohot xira pain ca om pan' ne ca pije' nucun cam jicon ta na ca tomi' caparut ma'.

Mateus 26:24 Iomraidhean Croise

Mateus 18:7

Ximin nana oro wari' pain macan' ca', xi mija ara ne oro ca to' caracat nonon ta ac caparut na. To' caracat paxi' tata wari' ma', je cwerein mao na. Ane ximin tamana pan xi' caca oro wari' co to' caracat nonon oro win ma' caca ne. Wap tamana pan totoron Iri' Jam ta.

Mateus 26:31

Tomi' ac caparut na pain ca taxipa' urut con ca'. Pain xim ca', om ta xec querec ne, paca' paca' pi' pin ac mahu' tara. Xi xirao' pe ara xine pain capijacon Iri' Jam pata' pane. Ca' na pata': To' pa' pin ton co querec wet taxipa' nain ovelha ma', wawaran mama' ac ne tara oro ovelha nucun. Ac i ma' na ca xirao' pe xine ca tomi' nucun Iri' Jam pata' pane.

Mateus 26:54

Ane om na capa' pain ca quep xiho' ne ton ne. Mo xi quep xiho' ne ton, pan' am ac ne xira ca xirao' to caca oro profeta co wara tomi' pe nanain carawa ca ara xim napa' ta na ca tomi' con win ma' nuxut ma'.

Mateus 26:56

Je i ma' pahu' ta ac tococwa na. Oro ca ara napa' ca', ca xirao' to caca oro profeta pain capijacon Iri' Jam pane, na e' na pain ca hwerehwet pin ne pain xocori ca', ac i ma' na ca tomi' tococwa ma'. Paca' ac urut con na Jeju pain ca taxipa' urut con ca'. Jein mama' jein mama' pi' pin urut.

Marcos 14:21

Mi' pin ta' paxi' ina pain ca Iri' Wari' ta' ca'. Win ne ca xirao' pe cacapa' oro profeta pane. Mi' pin ta' paxi' ina. Ane ximin pan ta' ca co ma' co tomi' mi' xim napa' cocon co noc nanapa' ma' ne, co quep xim nanapa' ma'. Ximin tara. Hohot xira pain ca om pan' ne ca pije' nucun cam jicon ta na ca tomi' tococwa ma'.

Marcos 9:12

Tomi' iri'o' paxi' nana ta ac tococwa na. In qui' cain' tara ta nonon Elias oro profeta pane. Ma' ta an to xo' cain ximicocon oro wari' nucun Iri' Jam pain ca winim' cocon co wara tomi' pe ca pane paxi' nonon. Ac i ma' paxi' na ca xirao' pe cacain ca in qui' nucun Elias pane. Je ca tomi' xuhu' ca' ac tococwa na. Mo xi an to xo' xine ximicocon oro wari' ma', je xi om xirao' pe ca' caca oro profeta pane quem: Na e' na pain ca jain jain tamana ca co wara tomi' pe ca Iri' Jam ma', co Iri' Wari' ma'. Na e' na pain ca noc cocon oro wari' ta, je xi om xirao' ac i ma' caca pane quem?

Lucas 22:22

Mi' pin ta' paxi' ina pain ca Iri' Wari' ta' ca'. Win ne ca wara coromicat an pe xo' cain Iri' Jam pata'. Mi' pin ta' paxi' ina. Ane ximin pan ta' ca co ma' co tomi' mi' xim napa' cocon co noc nanapa' ne, co quep xim nanapa' ma'. Ximin tara ta na ca tomi' tococwa ma'.

Lucas 24:46

Tomi' ac tococwa na: Je i ca' ca xirao' to caca pata' pane: Cristo ma', na e' na pain ca jain jain ca pain ca to' pa' pin tocwa ta. 3 pin iri tara xec pain ca mi' pin nucun ne, e' mami' ac ca tara ta na ca xirao' to caca pata' pane.

João 17:12

Pe ho' pe ho' wet iri inonon ne, narain ho' ac toton na pain oro ca om awi wa pane, mam' narain ho' inonon pain ca hwara' opa nem ca mi' mapa' pane. Querec wet xo' inonon. Om ca pan' ara'am camain' caca. Ma' xica' pe e' na co ma' co mao tarain cote ne xe ta ma pain cara pane, pan' am na co ma'. Ma' ta hwet pin ne ca xirao' pe xine pain capijam con pane ta non.

João 19:24

Om ta i' xun iri' curucun cwa' ac caca na. Ara e' xin ca ara taxipa' iri', ma' ta taxi' xun co an ton non ma' nana, ara ac cacain na. Ac i ma' na ca hwet pin ne ca xirao' pe xine capijacon Iri' Jam pane. Ca' na ca xirao' nein con: An an xam' nonon womu. Ara ac cacain na ca ara taxipa' caca ma'. Ma' ta taxi' xun wari' co an ton non ta ac caca na con iri' curucun womu quem, ac i ma' na ca xirao' pe xine pain capijacon Iri' Jam pane. Je ca ara caca oro soldado ma'.

João 19:28

Taxi' pin ac xucun na Jeju pain ca ara awori pi' pin cain ca ara ra con Cote ca pane. Ma' xica' pe na ca xirao' pe xine capijacon Iri' Jam ca om hwet querec con. Je ca tomi' ca' ca: Toc xita' com na ina me na.

Atos 2:23

Iri' Jam ma', wara an pe xo' nain ca coromicat nucun pane, pain ca main quep totoron ta cuhu' con. Je ca om narain ho' cuhu' con. Quep hun, to' pa' pin jun ta ac huhun na oro caracat co om tomi' ha' camain' nonon Iri' Jam. Tatatain mi' ac cocon na pain pana.

Atos 28:23

Je i ma' ta ac ca na Paulo ma', an pe xo' ac cacain na xec nein ca cut in mami' xi' caca ma'. Maqui' iri na xec nein ne, in hwet ac cocon na Paulo pain xiricon. Ma' mija nana oro win ma' caca co o qui' caca ma' quem. Hwet nonon Paulo pain xo' xec, pijim' pijim' ac tococwa na. Pijim' xo' tata con Iri' Jam ma', pain ca taramaxicon pe ho' xim capari' con Jeju. Noro mi' tata pain oro ca xirao' nucun Moisés je oro ca xirao' nucucun oro profeta ma' quem. Momon pijim' pijim' mi' ac tococwa pain na. Ma' ta taraju pa' hwe ta tata. Howa xiroron Jeju na paxi' tata pain ca pijim' nucun. Momon pijim' momon pijim' irawin pa' ac tococwa na.

Atos 4:28

Pain ca tomi' xo' xucucun pain ca to' pa' pin xun cocon pane, ara e' nanain ca wara coromicat an pe xo' pan nem pane. Xi om ne ca hwara' opa pan ara ma ta. Wum co param mi' nonon pain, om ca tomi' caho' momon pain ca to' pa' pin cocon Panxima pane.

1 Coríntios 15:3

Pijim' hwet inuhu' pain capijacon Iri' Jam ca wara tomi' hwet capa' pane. Awi tiquin' ca' nain oro xijein capijacon ta. Ca' na con: Mi' pin caho' napari' Cristo, ma' ta om wap xihwe pain ca caracat nuhu' ta napari'. Win ne ca xirao' pe xine pain capijacon pane.