Mateus 23:15 - Tradução Bíblica Pacaas Novos

¹⁵ Wa inuhu' me oro co ca' na taxipa' nanain ca xirao' nucun Moisés! Wa inuhu' quem oro fariseu! Ximin hwe ta. Ac ca iri'o' xi' ca' tara me hwe. Wap tamana turuhu' Iri' Jam ta. Jain jain paxi' huhun co om judeu nana ma', pain ca pijim' mama' hwein oro xijein macan' ma'. Pan horoho mama' hwein cote ne com, xuruxut mama' ac hwein na oro xijein macan' pain pira. Pijim' xuxun, ma' ta an xiho' cacapari' pain ca howa nexi' ca' hwe. Am ma' xica' pe ca co an xiho' napari', je i ma' ira, xica' pe ma' tarapari' ne, ac i ma' paxi' hwe pain ca jain jain huhun oro wari' pain oro pira. Ma' pin iri na wari' co an xiho' pin nuhu' ne, ara em' pin ac hun na, ac iri' panxica Caxicon Jam pin ac ca na pahu'. Pan tem tiquin' ca' ac cuhu' na pain ca pan teretem nuhu' quem. Wap tamana ac tocwa tara pain cote ne xe ta.

Mateus 23:15 Iomraidhean Croise

Mateus 23:13

Tomi' ac tococwa na: Wa inuhu' me oro co ca' na taxipa' nanain ca xirao' nucun Moisés! Wa inuhu' quem oro fariseu! Ximin hwe ta. Ac ca iri'o' xi' ca' tara me hwe. Wap tamana turuhu' Iri' Jam ta. Xi to' i'ina ara huhun oro wari' pain ca ca' na pan teretem huhun pain capijacon ta. Ac ca narain ho' huhun na pain ca xin ne cocon Iri' Jam pain ca taramaxicon pe ho' xuhu' ta cocon ma'. Om pan na ca xin ne hun pain ca taramaxicon pe ho' xim cuhu' ma', narain ho' huhun pain ca xin ne cocon pain quem.

Mateus 3:7

Mija nana oro fariseu cocon oro saduceu co hwet nonon João ma'. Ma' ta ja' capari' pain com ta nana. Querec iri nonon João pain ca maqui' nucucun ma' ne, tomi' ac cocon na: He! Ja' xi' com hwe ra oro caxicon em', ac i ma' na ca tomi' tococwa ma'. Witan ca' xin hwein ca mana' tamana nucun Iri' Jam ra? Ma' co jein ca' jun nuhu' ma' quem?

Mateus 5:22

Ane tomi' pan xuhu' pain i ca' ne: Wari' co mana' ximao non win ma' ca ma', tomi' mi' ac tocwa tara pain ca wap wa pain ca wum co em' ta tocwa. Wari' co tamanain ma ta non win ma' ca pain ca tomi' ximao con ma' quem, o mi' ac tocwa tara cocon oro juiz co tomi' mi' taxipa' nonon oro caracat pain ca wap wa ma'. Wari' co tomi' noro non win ma' ca pain ca iri' tamanain ma, om ca awi camain' ma ta con ma', ximin na co ma' ta. Hohot na pain ca xin mi' tocwa pain cote ne xe ta.

Mateus 5:29

Tomi' inem pain ca caracat ma pain ca querec param ximao ma ma'. Mo ta to' caracat quem tucum ma', pain ca querec param ximao main ca om awi wa ma', noro maho' rain. Ac ca horohot pin main tara tucum ma', ac ca wixicao' pin main tara. Cain' cain' xira quem? Hohot xira pain ca ma' ma' wet ne tucum pain ca mao main cote ne xe ra? Om xi hohot ne ta. Hohot pan xira pain ca om pin ne tucum pain ca mao main pawin ta.

João 8:44

Te hun Caxicon Jam ma' ira. An xiho' hun quem. Wara to' pa' taxipa' non wari' pain ca xo' quep qui' xine macan' pane, mao ac ne ma' na con, je curucun mao na. Noc nain ca tomi' iri'o' wa. Om ca tomi' iri'o' taxi' ca. Tomi' mixein iri na ne, ara e' nain carawa ca maqui' nain ximicon. Xi tomi' mixein taxipa' ara ca ta. Wirico co ja' tomi' mixein nonon oro wari' co tomi' mixein nana ma' quem.

Atos 13:10

An xiho' a ximon Caxicon Jam ta! Ari ari pi' pin main oro ca awi wa ta. Iri' waximain ca mixein wa pain ca pan tem wa a xima. Je xi tomi' napat maho' qui' mon Iri' Jam pain ca iri'o' nucun quem? Mixein taxipa' a xima, tomi' ni ca' a ximain capijacon ca iri'o' ta na ca tomi' carapita con ma'.

Atos 13:43

Hwerehwet hwerehwet pi' pin ac caca na co cut in nana ma'. Ma' mija ac caca na co ja' ja' nonon Paulo con Barnabé quem. Co judeu nana ma', co om judeu nana co an xiho' e' nonon oro judeu pain ca howa nucucun ma' quem, ja' ja' ac cocon na Paulo con Barnabé. Tomi' pan nonon Paulo con Barnabé ma' quem: Howa howa tiquin' jein capijacon Iri' Jam ca tomi' hwet napari' pain ca xiram pa' capari' ca' nonon.

Atos 14:19

Ma' ac caca na oro judeu co maqui' nanain xijein cidade ma', maqui' nanain Antioquia ca pe nain Pisídia ma', maqui' nanain Icônio ma' quem. Ja' teretem ac tococwa na oro wari' ma'. Om na, ta howa huhun me ta tata, tomi' tomi' na pin ac tococwa na, to' to' ac cocon na pain pacun Paulo ma'. Coc ororo coc ororo, wara ca' na cacarain cidade ma', xin pin ac cocon na. Mi' pin tara ma' nonon.

Atos 14:2

Ane ma' caca oro judeu co om howa je na nana ne. Ja' teretem ac tococwa na co om judeu nana co om howa nana ma'. Mana' in pin jujun co howa nana ta ac tococwa na.

Atos 17:13

Oro judeu co to nanain Tessalônica ma', taxi' pin iri nonon Paulo pain ca pijim' pe cain Bereia capijacon Iri' Jam con Jeju ma' ne, maji pain Bereia ta ac caca na, ja' teretem ac tococwa na oro wari' pain Bereia. Teretem tamana nana quem.

Atos 2:10

je Frígia, je Panfília quem. Ma' nana co maqui' nanain Egito. Ma' nana co maqui' nanain oro xijein cidade pain Líbia ca pe ja' pan nain Cirene ma' quem, ac i ma' na oro macaraxi'. Ma' nana co maqui' nanain Roma quem.

Atos 6:5

Awi na ca tomi' nuhu' ta ac caca na co howa nonon Jeju. Xin ne xin ne pi' pin nana. Tora' ac tococwa na. Mo nana: Ma' na Estêvão ma'. Howa mip na Estêvão. Pe ho' mip non Tamataracon Iri' Jam quem. Ma' ac ca na Filipe con Prócoro con Nicanor con Timon con Pármenas con Nicolau ma' quem. Wari' nein Antioquia na Nicolau pane. Om paxi' na ca judeu ca pain cara pane, ane tomi' ha' taxipa' cain ca xirao' nucun Moisés ne. Win caca oro judeu ma'.

Gálatas 4:17

Om ca ara xo' caca caram ma' co jain jain nunuhu' ma', pain ca tomi' ha' jein oro ca xirao' nucun Moisés ta cucuhu' ma'. Quep xiho' xim paxi' nunuhu', ane om quep xiho' iri'o' cucuhu' ne. Param e' nunuhu' pain ca noc pin mahu', param nunuhu' pain ca to ni ca' mahu'. Ma' ta tomi' querec te e' maparut ta nunuhu'.

Gálatas 6:12

Oro wari' co wac xirac jein taparinain ca xirac nuhu' ta nunuhu' ma', xec xec e' nana. Querec pin' tataraparut oro win judeu urut pain ca tomi' ha' taxipa' urut pain oro ca xirao' nucun Moisés ta nana. Jin' nonon oro win ma' caca. Tomi' ca' nana: Mo ta pijim' e' xut pain ca mi' pin nucun Cristo ma', pain ca to' witan e' napari' ca mi' pin nucun ta urut ca', mo ta pijim' ac i ma' urut, quep em' ac cacaparut tara ta na ca coromicat pan teretem nucucun. Je ca wac xirac jein ta cucuhu'.

Efésios 2:3

Je cwerexi' pane quem. Ac i ma' ac i ma' pi' pin iri' pane ira. Ara e' irin ca param ne cwerexi'. Tomi' ha' e' irin ca param pan teretem ne cwerexi' pain ca coromicat pan teretem nexi'. Wap xim napari' Iri' Jam pane quem. Win ne ca wap wap pi' pin tococwa oro wari' co pan teretem nana ma'.