Mateus 20:21 - Tradução Bíblica Pacaas Novos

²¹ Ma' carawa ca param ma quem ac cam na. Tomi' pe mi' ne pain ca tomi' nem cocon humaju cwa', co 2 nana cwa' ac con na. Maqui' iri tara xec nein ca taramaxicon pin ta' ma ne, mi' ac momon tara pain ca xao to ho' quequem pain iri' cwerem je pain parajum ma' quem na ca tomi' con ma'.

Mateus 20:21 Iomraidhean Croise

Mateus 18:1

Om ca pain homa ne, xuruxut hwet ac urut con na Jeju ma'. Warut pain ca taxipa' urut con ca', tomi' querec ac urut con na: Ma' co hwara' opa tiquin' ca' nonon oro xucucun wari' co taramaxicon pe ho' ca Iri' Jam quem na ca tomi' querec urut con.

Mateus 19:28

Ame hwe e' ac caparut na. Maqui' cain' tara xec nein ca quep xocori pin tain cain oro carawa pain macan' ta na Iri' Jam ca'. Xao pe ho' pin ac tain tara ca mam' xao pe ne pain ca taramaxicon pin ta' ta' ca'. Wata' pain ca Iri' Wari' ta' ca', taramaxicon hwara' opa pin ac ta' tara ta. Awi tamana tara ca taramaxicon ne. Taramaxicon wi ac mahu' tara quem. Wahu' pain ca taxipa' mahu' ma', xao to xao to xam' ac hwein tara ca mam' xao pe nucun taramaxicon. Ma' 12 tara ca mam' xao to nuhu' pain ca taramaxicon wi mahu'. Taramaxicon to ho' ac huhun tara waram winacocon mana panxica Israel cara pane, co ma' 12 nana cara pane. Tomi' iri'o' inuhu'.

Mateus 20:22

Xi taxi' hwein carawa ca wajim' mahu' ta ac tococwa na. Jain jain tamana ta' pain ca quep em' xim cacapa' oro wari' ta. Ha' turuhu' pain ca jain jain xiho' ac i ma' mahu' quem na ca tomi' tococwa ma'. Ha' naparut ta nonon.

Mateus 20:32

Xat ac ca na Jeju. Harahap je ac tococwa na. Ma' i ma' pahu' quem? Ma' carawa ca ara mi' xine mahu' quem tata.

Marcos 10:51

Ma' carawa ca ara mi' ne mapa' ma' quem ac con na Jeju. Om na, querec mami' xita' na ina ta Taramaxicon co ca' na taxipa' capijacon Iri' Jam ac con na.

Marcos 16:19

Taramaxicon nexi' Jeju ma', tomi' ac i ma' iri nonon co taxipa' ca ma' ne, an piri' mao ac tocwa na pain pawin. Xao pe ho' pin ac cain na iri' curucun Iri' Jam.

Marcos 6:22

Pain ca tomi' querec te pan xucucun ma', corom ac cama na cainacam Herodias ma'. Pi' xirao' in pi' xirao' in ac cama na, tomi' querec te ac cam na Herodes ma'. Tomi' querec te nanam oro win ma' ca co win tomi' querec te ca ma' quem. Tomi' ac cam na: Ma' carawa ca param ma quem? Carawa ca mi' ne mapa' ma', mi' ac xim pain tara.

Lucas 18:41

Ma' carawa ca ara mi' ne mapa' ma' quem non. Om na, querec mami' xita' na ina ta Taramaxicon ac con na.

Lucas 19:11

Taraju nonon Jeju oro wari' ma', pain ca tomi' ac i ma' ca ma'. Coromicat ca' nana: Wa' mao iri tarain Jerusalém ne, taramaxicon hap pin ac ca tara ta nonon. Coromicat ac i ma' nana, xi om ne ca wixicam pin ara cacain Jerusalém ma'. Je ca pijim' joc mam' mi' tococwa con taramaxicon cocon co taramaja mi' nonon ma'.

Lucas 22:24

Tomi' caracan ac xucucun na co taxipa' ca Jeju: Cain' ca coromicat mi' cacapari' oro wari' ma' quem? Wata' co hwara' opa tiquin' ca' pahu', coromicat mi' nanapa' pain ca hwara' opa tiquin' ca' xuhu' ra xucucun. Om na, wata' ta, coromicat mi' nanapa' pain ca hwara' opa tiquin' ca' xuhu' ta ac ca na xucun. Wata' pan ta ac ca na xucun ma' quem.

João 15:7

Mo ta win cwere cara mahu', mo ta to ho' cara cuhu' oro ca tomi' ne quem, na ac cuhu' tara pain ca tomi' hun Te ma', pain ca mi' xut hun pain oro carawa ca param hwe ma'. Mi' mi' pi' pin ac cuhu' pain tara quem.

Atos 1:6

Aram aram maqui' ac ne na xec nein ca cut in mami' xucucun quem. Tomi' querec ac cocon na Jeju co taxipa' ca ma': Taramaxicon nuxut. Je i ca' tara oro xec ca to' quiji' pin toton momon oro romano co taramaxicon to ho' nanaparut pain xocori ca' ra? Om ta mi' maparut pain ca taramaxicon pan ta' ca win ma' nuxut pain ca wari' nein Israel urut ca' ra? Ac i ma' na ca tomi' querec cocon ma'.

Romanos 12:10

Tomi' querec te xujuhu'. Win ne ca xere xujuhu' tara pain ca howa hun Iri' Jam ma'. Awi tiquin' ca' napa' co cwa' ta, ac i ma' tara ca coromicat nuhu'.

Romanos 8:34

Ma' tara wari' co em' pin hwe ta napari' ra? Om na ta. Mi' pin caho' ara xi' napari' Cristo Jeju. Mi' pin na, e' mami' ac ca na quem. Xao pe ho' pin nain iri' curucun Iri' Jam. Tomi' mi' napari' con quem.

Colossenses 3:1

Je ca tomi' xuhu' ca': Ma' pin nuhu' xocori ca e' wa pain ca howa hun Cristo. Ac ca to' e' mami' wi xihwe con na. Je ta win xumu qui' hwein oro caramaji pawin cain, ca xao pe pe ca Cristo cwain, pain ca xao pe ho' cain iri' curucun Iri' Jam cwain, pain ca taramaxicon wi pin con co Te ca quem.