Mateus 2:12 - Tradução Bíblica Pacaas Novos

¹² Tomi' ac tococwa na pain ca tohwein' nucucun. Ma' tara xumuhu' con taramaxicon Herodes me ta tata. Ta in hwet hun me ta ac tococwa na. Ma ac caca na, moji'ac ca' xun ta, ac ni xin xijein wana ta, in mama' ac cacain na macaracocon.

Mateus 2:12 Iomraidhean Croise

Mateus 1:20

Pain ca coromicat coromicat wet cain i ma' ne, tohwein' ac con na jam co taramaja mi' non Iri' Jam. Wirico jam co hwet pan non pain ca tohwein' nucun José. José winacon taramaxicon Davi ac con na. Ta hehe ma cam me ta. An ram narima' nem ma', Maria ma'. Je Tamataracon Iri' Jam ca mi' nam pain ca nam' nequem ta na ca tomi' con ma'.

Mateus 2:13

Mama' iri nana caram ma' co noro nonon pijo' ma' ne, tohwein' ac ca na José. Tohwein' non jam co taramaja mi' non Iri' Jam. Tequi' pe ra ta José. An mao ron pije' ma'. An mao ram jicon ma' quem. Jein mama' jein Egito cain. To wet ac hwein i cain tara. Aram aram tomi' ac xuhu' tara, in qui' ac hwe tara. Pirao' ton ara xi' non pije' Herodes ma'. To' pa' pin ton ta na, ac i ma' na ca tomi' con pain ca tohwein' nucun.

Mateus 2:19

Mi' pin iri na Herodes ne, om om, tohwein' ac ca na José. Wirico jam co taramaja mi' non Iri' Jam co hwet non pain ca tohwein' nucun pain ca pe pe wet cain Egito pane.

Mateus 2:22

Xuruxut xuruxut, taraju ho' na José: Taramaxicon pe nain Judeia Arquelau ma', pe pin nain maxicon cote ca, ac i ma' na ca taraju ca ma'. Jin' pin ac ca na quem. Jin' nain ca mao wa pain Judeia. Tomi' ac ca na Iri' Jam, tomi' non pain ca tohwein' nucun. Ta mama' hwein i cain me ta non. Ma ac ca na, mama' ac cacamain na macarain Galileia ma'.

Mateus 27:19

Xao pe xao pe wet nain ca mam' xao pe nucun Pilatos ma', ca tomi' xo' pe tococwa oro wari' ma'. Maqui' ac ca na wari' co mo pin nain ca xirao' nequem manacon. Mi' ac con pain na. Ca' na ca xirao' nequem: Miri'om roron caram ma' co quep em' xun nonon tarama' ma' me. Xi pan tem ca ta. Tohwein' inon pain xim ca' ne. To' jain jain tamana napa', toron tamana napa' xumu con ta na ca xirao' mi' con taxicam.

Lucas 2:26

Wara tomi' pe non Tamataracon Iri' Jam pane. Om ta mi' pin querec ma, querec ac mon tara Cristo co wara tomi' pe ca Iri' Jam pane na ca tomi' pe con pane.

Atos 10:22

Om na, mo'o jun Pedro ta naparut taramaxicon nuxut Cornélio pum. Xut xo' taxipa' na Cornélio. Tomi' ha' taxipa' non Iri' Jam. Querec pin' querec pin' pi' pin nonon oro judeu pain ca xut xo' nucun. Tomi' ca' non jam co taramaja mi' non Iri' Jam quem: Tomi' roron oro wari' nem ma'. O qui' totoron Pedro pain xurum ca'. Ma' ta taraju mon pain ca tomi' xim ta, ac i ma' na ca tomi' con taramaxicon nuxut jam co taramaja mi' non Iri' Jam pum ta nonon.

Atos 4:19

Ane tomi' pan caca ne: Cain' cain' xuxut quem? Tomi' in pin xut con Iri' Jam pain ca tomi' ha' xut pahu' ra? Hohot toron Iri' Jam pain ca tomi' in pin xut con ra? Cain' cain' xuxut quem? Tomi' xut e'.

Atos 5:29

Cain' cain' xuxut quem ac ca na Pedro cocon oro win apóstolo ca ma'. Hohot xiraparut pain ca tomi' in pin urut con Iri' Jam pain ca tomi' ha' pan urut pahu' pain ca wari' nuhu' ra? Om na ta! Na e' na pain ca tomi' ha' pan urut con Iri' Jam ta.

1 Coríntios 3:19

Xi taraju pa' caca oro wari' co taraju pa' urut xi' ma nana pain macan' ca' ta na Iri' Jam. Taraju pa' urut xi' ma paxi' nana, ane tamanain hwe ta pan cocon Iri' Jam ne. Xi xirao' pe ara xine pain capijacon Iri' Jam ta. Ca' na con pane: Taraju pa' urut xi' ma nana pain ca coromicat ximama' nucucun pain ca mixein nucucun. Ane to' i'ina pan cocon Iri' Jam ne. Mam' to' i'ina pan nonon pain ca mixein pan nucucun. Hehe pin ac cocon na ta. Ac i ma' na ca xirao' pe xine pain capijacon Iri' Jam.

Hebreus 11:7

Howa non Iri' Jam Noé cara pane. Tomi' hwet iri ta pain carawa ca om hwet pa' querec nonon ne, tomi' ha' ac con na. Quep ac cain na mam' horoho wa, ma' ta witan pin ta' cocon oro ca nari ne cwa' ta na pane. Howa pan iri na Noé ne, querec pin' ac tococwa na oro win ma' caca pain ca om howa nucucun ma', wap pin ac tococwa na quem. To' hohot pin inem, xi howa ara mapa' ta pan ac con na Iri' Jam quem.

Hebreus 8:5

Taramaja to nanain xiricon Iri' Jam ca pe nain macan' ca', ca an xiho' e' nein xiricon Iri' Jam ca pe nain pawin cain. Je ca hu tocwa Moisés pane quem, pain ca quep tain cain xiricon Iri' Jam ca mam' quep xine pain tapari carawa pane. Hu ca' non Iri' Jam: Ma' tara xumum me. An xiho' an xiho' pi' pin rain oro jaminain coximinain ca an hwet mi' xim pain tamain pacun ca' non.