Mateus 19:16 - Tradução Bíblica Pacaas Novos

¹⁶ Ma' ac ca na wari' co xut hwet non Jeju. Tomi' querec ac con na: Taramaxicon co ca' na taxipa' capijacon Iri' Jam ac con na. Cain' cain' xita' quem? Ma' carawa ca awi ca ara ra mapa', ma' ta e' cara pe ho' ton Iri' Jam quem na ca tomi' querec con ma'.

Mateus 19:16 Iomraidhean Croise

Mateus 19:15

Quep ac tacacama na pain winacacam. Param inon Iri' Jam pain ca ara mi' cuhu' pain oro ca awi wa ta hwijima' tata. Mao ac ca na quem.

Mateus 19:26

Noro ac caparut na. Om na, wari' ma', om ca to' witan pan ac xucun. Iri' Jam ma' iri na ne, ha' non pain ca to' witan cocon oro wari'. Ha' ha' pi' pin non oro carawa ta naparut.

Mateus 19:29

Oro wari' co paca' nanain xiricocon cocon xurucucun cocon cote caca cacam jicocon cacam mana panxicaca je totacocon quem, oro wari' co ara ac i ma' nana pain ca taramaja mi' xim cacapa' ma', cut tamana ac cacain tara carawa ca awi. Mija tara carawa ca awi ca cut xi' caca ma', mija tiquin' ca' tarain carawa ca paca' caca. Moin' tamana tara cocon. Mi' ac tococwa tara pain ca om pi' ra ha' ne ca e' wa quem.

Mateus 25:46

Je ca tomi' xuhu' ca' ac caparut na. Oro wari' co om xuruxut xo' nana ma', mama' ac cacain tara ca wap to xun tococwa. Om ta pi' ra ha' ne ca wap cara tococwa ta. Oro wari' co xuruxut xo' nana ma' iri na ne, mama' ac cacain tara ca e' cara to xi' caca quem. Om ta pi' ra ha' ne ca e' cara nucucun ta na ca tomi' caparut pane.

João 10:28

Mi' inonon pain ca e' cara wa. Om ta pan' ara'am camain' caca. Quep xat cara inonon, om na wari' co coc xicot ca' ac napa' cocon.

João 12:25

Win ca wari' co win xumu e' nain ca param pan nucun pain macan' ca'. Om ta e' cara pe cain pawin ta. Wari' co om win xumu nain ca param pan nucun pain macan' ca' iri na ne, aram aram maqui' pa' ac con tara xec nein ca om pi' ra ha' ne ca e' nucun pain pawin.

João 3:15

Ma' ta e' cara e' cara xam' caca oro wari' co howa nanapa'. E' cara to ho' totoron Iri' Jam ta na ca tomi' con ma'.

João 4:14

Wari' co toc nain com ca mi' ta' ta' ca' iri na ne, om ta toc ta' com mami' ca. Com ca mi' ta' ta' ca', an xiho' nain ca hoi hoi ne com ca weweweo cara ma'. Weweweo pe tarain ximicon wari' co howa napa'. To' e' cara ac con tara, mi' ac tocwa tara pain ca pe ho' cara con Iri' Jam pain pawin quem na ca tomi' cam ma'.

João 5:39

Noro tamana paxi' hwein capijacon Iri' Jam ca xirao' pe xine ma'. Coromicat ac hwe na: Mo ta noro xin capijacon Iri' Jam ca', mam' ac xin tara ca om pi' ra ha' ne ca e' wa pain pawin ta paxi' na ca coromicat nuhu' ma'. Je capijacon Iri' Jam ca tomi' hwet pan napa' quem.

João 6:47

Je ca tomi' xuhu' ca', tomi' iri'o' inuhu' ta ac tococwa na. Oro wari' co howa nanapa' ma', ma' nonon ca e' cara wa pain pawin ta.

João 6:68

Om na ta Taramaxicon ne ac con na Simão Pedro. Ma' wari' xi ja' ja' urut quem? Wum co tomi' hwet naparut pain capijam ca mi' nain ca e' cara wa pain pawin ta.

Atos 16:30

O qui' ac tococwa na, tomi' ac tococwa na: Cain' cain' xita' quem ta caram ma'? Param inon Iri' Jam pain ca to' witan ca' capa' pain ca caracat ne ca' na.

Romanos 2:7

Oro wari' co tama' ara nanain oro ca awi wa pain ca win xumu cacain ca tomi' querec te nucun Iri' Jam ma', coromicat ca' ac caca na: Tomi' querec te tarapari' Iri' Jam ta. Hohot hwe tarapari', to' e' cara xuhu' tarapari' ta nana. Wiricoco tatara co mi' wawa pain ca e' cara wa.

Romanos 5:21

Je ca tomi' xuhu' ca': Win ne ca hwara' opa ne ca caracat wa pane. To' cono' napari'. Ac je na ca xiram pa' e' nucun Iri' Jam quem. Hwara' opa na ca xiram pa' e' nucun. To' hohot pin napari'. Je ca e' cara je ta capari' ca'. Wirico Taramaxicon nexi' Jeju Cristo co ara mi' napari' pain i ma' ta.

1 Timóteo 1:16

Caracat ac i ma' paxi' ina pane. Ane xiram pa' pan capa' Cristo Jeju ne. Ma' ta querec pin' cacapa' oro wari' pain ca an hwet mi' toton pain ca tomi' pan hot tamana ne ca', je pain ca winim' toton pain ca howa cacapa' ta nonon. Tomi' pan hot tamana ara xi' napa' pain ca winim' capa' pain ca howa ton pane quem. Tomi' ca' nonon oro wari' co howa xun nonon pa'ao': Win ton Paulo pane nonon. Caracat tiquin' ca' paxi' nuhu' pane, ane tomi' pan hot tamana ton pain ca winim' ton pain ca howa xim capa' pane nonon.

1 Timóteo 6:12

Pain ca howa cara mon Cristo Jeju ma', ma' mija tara oro ca to' i'ina nem ma'. Je i ma' ira, na e' na pain ca momon hwara' opa tiquin' ca' main ta. Querec pin' ron Iri' Jam pain ca pe ho' cara ne ta quem, pain ca mi' xim pain ca om pi' ra ha' ne ca e' wa ta quem. Wara tomi' pe ara xi' nem pain ca e' cara wa pain ca xo' tora' qui' quem pane ta. Mija nana wari' co taraju nenem pain ca tomi' hwet main ca howa nem pane quem.

1 Timóteo 6:19

Mo ta ara ac i ma' caca co caramaju nana pain macan' pain xocori ca', ac ca cut in xo' tamana cacain na iri' carawa ca awi tamana pain pawin cain. Om ta pan' ara'am camain' ne caramaxicocon pain pawin quem, to wet cara tara ta. Mi' ac tococwa tara pain iri' ca e' wa pain ca e' cara caca quem.

Tito 1:2

Ma' ta om tara pum ta'a camain' cacapa' pain ca mi' ton toton pain ca e' cara wa ta napa' cocon. Wara tomi' pe mi' napari' pain ca e' cara wa Iri' Jam. Pain ca om tom ma' querec cain macan' pane, wara tomi' pe mi' napari' pain. Om ca tomi' mixein camain' capari' ta.

Tito 3:7

Mi' napari' pain Tamataracon. Ma' ta om tara con ta'a camain' mahu' pain ca mi' xim xuhu' pain ca e' cara wa ca' napari'. Je ca howa iri' ca' quem. To' hohot pin napari' con Jeju. Om xi to' hohot pin capari', xi iri' wari' iri' ta. Ane xiram pa' pan capari' ne. Je ca to' hohot pin capari' con.

1João 1:2

Hwet naparut pain macan' pane. An hwet mi' xucun pain ca mi' cain ca e' wa. Querec urut con, wirico co tomi' hwet urut cwa'. Pijim' hwet urut pahu' con, pain ca wirico co mi' nain ca om pi' ra ha' ne ca e' wa ta urut pahu'. Wara pe ho' paxi' non Cote ca pain cara pane, ane an hwet mi' caparut con ne.

1João 2:25

Je ca wara tomi' pe mi' capari' ca'. Mi' xuhu' pain ca om pi' ra ha' ne ca e' wa ta napari' ta.

1João 5:20

Taxi' urun Panxica Iri' Jam pain ca wara maqui' cain macan' pane quem. Mi' napari' pain ca taraju pa' wa, ma' ta querec pin' hun Te Iri' Jam co iri'o' ta napari'. Win cwere urun co ma' co iri'o' quem, win cwere urun Panxica Iri' Jam Jeju Cristo. Wirico Jeju Cristo co iri' co Iri' Jam iri'o' ta. Wirico co e' cara ta.

Judas 1:21

Tama' mam' pe wet jun Iri' Jam pain ca om noc cuhu' ma'. Winim' cara jein xec nein ca mi' xim cuhu' pain ca om pi' ra ha' ne ca e' wa Taramaxicon nexi' Jeju Cristo quem. Mi' turuhu' pain, xi xiram pa' ara cuhu' ta.