Mateus 16:26 - Tradução Bíblica Pacaas Novos

²⁶ Je ca tomi' xuhu' ca' ac caparut na. Mo ta ma' ma' xam' capari' oro carawa pain macan' ca'. Mo ta miri'om xin ca e' cara wa pain pawin cain, mo ta mama' xin cote ne xe quem. Ma' na ca quep xiho' ac capari' oro caramaji macan' ca cut iri' pain ca e' e' wet nexi' ra? Om ca quep xiho' capari' ta! Xi ma' ne caramaji macan' ca mam' an in ac xin ca e' cara nexi' ta.

Mateus 16:26 Iomraidhean Croise

Mateus 16:25

Xi e' cara pe tain cain pawin wari' co win xumu e' nain ca param pan nucun pain macan' ta. Wari' co miri'om nain ca param pan nucun pain macan' ca' iri na ne, pain ca win xumu e' capa' ma', wirico tara co e' cara pe tain nain pawin ta.

Mateus 16:27

Je ca tomi' xuhu' ca' ac caparut na. Ja' ja' xine. Ta jin' huhun oro wari' co quep em' xim nunuhu' pain ca ja' ja' mahu' me. Maqui' ta' ara xi' na xec nein ca in qui' ta' ne ca', wata' pain ca Iri' Wari' ta' ca', in qui' ac tain tara pawin. Maqui' wi ta' cocon oro jam co taramaja mi' nanapa'. Maqui' wi ta' pain ca hwara' opa nucun Te quem. Pagar ac toton tara oro wari', pagar toton pain oro ca ara caca pain ca e' e' wet nucucun. Win ne ca ara hwe pane toton, mi' mi' xam' ac toton pain tara. Wahu' quem, win ne ca ara hwe pain ca ja' ja' mahu' pane xuhu', pagar pagar xam' ac xuhu' tara quem.

Mateus 5:29

Tomi' inem pain ca caracat ma pain ca querec param ximao ma ma'. Mo ta to' caracat quem tucum ma', pain ca querec param ximao main ca om awi wa ma', noro maho' rain. Ac ca horohot pin main tara tucum ma', ac ca wixicao' pin main tara. Cain' cain' xira quem? Hohot xira pain ca ma' ma' wet ne tucum pain ca mao main cote ne xe ra? Om xi hohot ne ta. Hohot pan xira pain ca om pin ne tucum pain ca mao main pawin ta.

Lucas 12:20

Ac i ma' paxi' na ca coromicat nucun, ane tomi' ca' con Iri' Jam ne: Mi' pin ho' ra ta inem ta tamanain co om coromicat xo'. Mi' pin ho' ra pain xim ca'. Ma' xi wari' co cut tain nain oro caramajum ca an to xo' ta' ma ma' quem, ac i ma' na ca tomi' con ma'.

Lucas 16:25

Ane tomi' in pin con Abraão ne: Om na ta arain. Mam' pe wet rain oro carawa ca hohot nem pain ca e' e' wet ma pain macan' pane. Tomi' querec te ma pain oro carawa ca awi ca param ma pane quem. Lázaro cwa' iri na ne, ximin na pane. Om ca ma' camain' con carawa ca awi. Ac i ma' paxi' hwe pain cara pane. Ane ja' tomi' querec te tocwa Lázaro pain i ca' ne. Wum iri na ne, jain jain tamana pan ma pain cote ne xe ma' ta.

Lucas 9:25

Je ca tomi' xuhu' ca' ac tococwa na. Mo ta ma' ma' xam' capari' oro carawa pain macan' ca', mo ta miri'om xin ca e' cara wa pain pawin cain, mo ta mama' xin cote ne xe quem. Ma' na ca quep xiho' ac capari' oro caramaji macan' ca cut iri' pain ca e' e' wet nexi' ra? Om ca quep xiho' capari' ta.