Mateus 16:21 - Tradução Bíblica Pacaas Novos

²¹ Je i ma' xec nein ca tomi' xo' pin caparut Jeju pane. Tomi' xo' pin naparut pain ca taxipa' urut con ca'. Tomi' ho' tomi' ho' ac caparut na. Na e' na pain ca mao tain Jerusalém ta. Wa' mao iri tain i cain ne, quep em' ac cacapa' tara oro taramaxicon nexi' pain ca judeu iri' ca', cocon oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés. To' jain jain tamana tatarapa', to' pa' pin ac cacapa' tara. Ma' 3 pin iri tarapa' xec pain ca mi' pin ne ne, e' mami' ac ta' tara ta na ca tomi' xo' caparut ma'.

Mateus 16:21 Iomraidhean Croise

Mateus 12:40

Win ne pain ca corom pe cain moji cote ne hwam Jonas cara pane. Ma' 3 na xec, ma' 3 na xim quem, pain ca corom pe cain moji cote ne hwam con Iri' Jam pane. Ac i ma' ta' pain ca Iri' Wari' ta' ca' quem. Corom pe tain macan'. Ma' 3 tarapa' xec, ma' 3 tarapa' xim quem, pain ca corom pe tain macan' ta.

Mateus 16:22

Quep ac cain na taparacon Jeju Pedro. Coc papan hwet mao ac con na, tomi' ac cain na taraxicon: Om na ta Taramaxicon ne. Nain ho' terem pain Iri' Jam ta. Om ta to' pa' quequem oro wari' ta non.

Mateus 16:28

Wahu' pain ca to ho' mahu' ca', ma' tatara co querec xim nanapa' pain ca taramaxicon pe ho' pin toton toton oro wari' ne quem. Querec tatarapa' pain ca Iri' Wari' ta' ca'. Om ta cono' querec caca, wara querec tatarapa', ame hwe e'. Tomi' iri'o' inuhu' ta na ca tomi' caparut ma'.

Mateus 17:12

Ac i ma' paxi' na ca tomi' caca pane, ane tomi' pan xuhu' pain i ca' ne: Wara in qui' paxi' na Elias cara pane, ane om querec pin' cocon oro taramaxicon ne. Quep em' nonon, om ca xiram pa' camain' cocon. Ac i ma' tatarapa' pain ca Iri' Wari' ta' ca' quem. Quep em' tatarapa' quem na ca tomi' tococwa ma'.

Mateus 17:9

Quiji' mama' ac cacain na pacun. Pain ca xuruxut xuruxut wet nucucun ma', tomi' ac tococwa na: Ta tomi' hwet huhun oro wari' pain ca querec hwe pata' me. To' e' mami' cain' tarapa' Te ta. Wata' pain ca Iri' Wari' ta' ca', to' e' mami' cain' tarapa' Te. Tomi' hwet ac huhun pain tara ca querec hwe pata' ta na ca tomi' tococwa ma'.

Mateus 20:28

Win ta' ca', pain ca Iri' Wari' ta' ca'. Om ca maqui' ta' pain ca taramaja mi' xine xuhu', om na. Taramaja mi' pan xim inuhu'. Mi' pin caho' xim inuhu', ma' ta witan mija hwe ta inuhu'. Je ca maqui' ta' ca' na ca tomi' caparut ca'.

Mateus 26:2

Taxi' hwein ca wixicam pin ne Páscoa. Ma' 2 pin iri tara xec ne, maqui' ac ne tara, ma' ac ca tara wari' co tomi' mi' xim napa' cocon oro taramaxicon. Tatatain mi' ac cacapa' tara pain pana. Wata' pain ca Iri' Wari' ta' ca', tatatain mi' tatarapa' pain pana, wa wa mi' pin pe ac tain tara ta na ca tomi' caparut.

Mateus 26:47

Tomi' tomi' wet na Jeju, maqui' ac ca na Judas ma', co to' 12 naparut pain ca taxipa' urut con Jeju cwa'. Mija nana wari' co ja' ja' nonon. Om ca paric camain' caca, mija nana. Wiricoco oro taramaxicon co hwet jun nonon. Mo nana: Oro taramaxicon nucucun oro sacerdote ma', oro taramaxicon nuxut pain ca judeu urut ca' quem, wiricoco co hwet jun nonon. Cut nana cote ne quit je pana ca mam' wap wa quem.

Mateus 27:12

Tomi' em' ac cocon na oro taramaxicon nucucun oro sacerdote cocon oro taramaxicon nuxut pain ca judeu urut ca' quem. Em' na co cwa' ta, om ca awi camain' ca, pan tem na ta nonon. Ane tacana pe ca Jeju ma' ne. Om ca tomi' in pin camain' ca.

Mateus 27:63

Taramaxicon ac cocon na. Mam' pe wet urut pain ca tomi' nucun co pacara ne, co tama' mixein cara ne. Ca' na ca tomi' nucun pain ca e' e' wet nucun pane: Ma' 3 pin iri tara xec pain ca mi' pin ne ne, e' mami' ac ta' tara ta na ca tomi' mixein nucun pane.

Mateus 28:6

Om pin nain i ca'. E' mami' na ta. Win ne ca wara tomi' pe cain pane. Harahap je, noro jein ca terem' pe ca ira.

Marcos 8:31

Tomi' xo' ac tococwa na: Na e' na pain ca jain jain tamana ta' ta' ca'. Wata' pain ca Iri' Wari' ta' ca', jain jain tamana ta'. Noc tatarapa' oro taramaxicon nexi' pain ca judeu iri' ca'. Noc tatarapa' oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés ma' quem. To' pa' pin tatarapa' quem. Ma' 3 pin iri tarapa' xec pain ca mi' pin ne ne, e' mami' ac ta' tara ta na ca tomi' tococwa ma'.

Marcos 9:12

Tomi' iri'o' paxi' nana ta ac tococwa na. In qui' cain' tara ta nonon Elias oro profeta pane. Ma' ta an to xo' cain ximicocon oro wari' nucun Iri' Jam pain ca winim' cocon co wara tomi' pe ca pane paxi' nonon. Ac i ma' paxi' na ca xirao' pe cacain ca in qui' nucun Elias pane. Je ca tomi' xuhu' ca' ac tococwa na. Mo xi an to xo' xine ximicocon oro wari' ma', je xi om xirao' pe ca' caca oro profeta pane quem: Na e' na pain ca jain jain tamana ca co wara tomi' pe ca Iri' Jam ma', co Iri' Wari' ma'. Na e' na pain ca noc cocon oro wari' ta, je xi om xirao' ac i ma' caca pane quem?

Lucas 17:25

Ame hwe e' ac tococwa na. Na e' na pain ca jain jain cain' ta'. Jain jain tamana ta'. Oro wari' co e' e' wet nana pain xocori ca', noc tatarapa' quem.

Lucas 24:46

Tomi' ac tococwa na: Je i ca' ca xirao' to caca pata' pane: Cristo ma', na e' na pain ca jain jain ca pain ca to' pa' pin tocwa ta. 3 pin iri tara xec pain ca mi' pin nucun ne, e' mami' ac ca tara ta na ca xirao' to caca pata' pane.

Lucas 9:31

Toc meremem nana quem. Tomi' tomi' nonon Jeju pain ca mi' pin ta' nucun, je pain ca hwet pin ta' ne ca param nucun Cote ca pain ca mi' pin pe tain cain Jerusalém ma'.