Mateus 13:22 - Tradução Bíblica Pacaas Novos

²² Oro xucucun ma' iri nana ne, co tomi' joc mam' mi' nanain macan' ca ma' pi ma', taraju paxi' nanain capijacon Iri' Jam. Aram aram coromicat ni ca' ac cacain na. Toron ximama' ac ne na ximicocon pain oro ca to' i'ina nonon, caramaju xixi' na nana quem. Mo xi quep xiho' cocon oro caramaji macan' ca', ane om quep xiho' cocon ne, mixein e' nonon. Ac ca mo' nein pi na capijacon Iri' Jam pain ximicocon. Ac ca om wina ne na, xi to' xucun wari' tococwa pain ta.

Mateus 13:22 Iomraidhean Croise

Mateus 12:32

Wari' co tomi' napat napa' pain ca Iri' Wari' ta' ca' quem, xic am pin ac xine tara ca caracat nucun. Wari' co tomi' napat nain Tamataracon Iri' Jam ma' iri na ne, om ta xic am pin camain' xine ca caracat nucun ta. Om om tara, om tara pain oro xec nexi' ca', om om tara pain oro xec ca maqui' ta' ma' quem na ca tomi' tococwa ma'.

Mateus 13:39

Wari' co wixicaracao' nain tocwi caji tononoin ma', co noc non waximain xitot ma', an xiho' non Caxicon Jam. Xec nein ca caracat xine trigo ma', an xiho' nain oro xec nein ca win pi' pin ta' ne macan'. Oro wari' co caracat nanain trigo ma' iri nana ne, an xiho' nonon oro jam co taramaja mi' nonon Iri' Jam quem.

Mateus 13:40

Je ca tomi' xuhu' ca' ac caparut na. Win ne ca horohot xine caji tononoin ma', win ne ca tom pin xine ma' quem, ac i ma' tara pain oro xec nein ca win pi' pin ta' ne macan' quem.

Mateus 13:7

Camara' to ac nein na pi wirain tocwi trigo ma' quem. Hwara' ac ne na pi ma', mo' ac nein na quem.

Lucas 12:15

Tomi' ac tococwa na oro wari': Ma' tara xumuhu' me. Ta param ximama' hwein oro caramaxicocon oro win ma' nuhu' me ta. Ta caramaju xixi' na urut me camain' hwe me ta. Xi to' e' taxi' capari' ca ma' mija capari' oro carawa ta na ca tomi' tococwa ma'.

Lucas 12:21

Je ca tomi' xuhu' ca' ac tococwa na. Ac i ma' na wari' co an to xo' hwara' mi' pan xucun pain oro carawa. Caramaju paxi' na pain ca cut mi' pan xucun pain oro carawa pain xocori ca'. Ane om caramaju ca con Iri' Jam ne na ca tomi' tococwa ma'.

Lucas 21:34

Ma' tara xumuhu' me ac tococwa na. Ta win xumu e' hwein oro ca tamanain to wa pain ca toc ximama' wa ca mana' nein tocwa me. Ta toron ximama' ne xumuhu' pain oro ca to' i'ina nuhu' quem me. Mo ta xuruxut ximama' ac i ma' hwe, mo ta om winim' xo' mahu', ane ane hwet pa' ac cuhu' tara xec nein ca in qui' ta' ne.

Lucas 8:14

Carawa ca ara nain tocwi trigo ca camara' to nain pi ma', tomi' joc mam' mi' nain carawa ca ara nonon oro wari' co taraju paxi' nanain capijacon Iri' Jam. Pain pin iri na ne, ma' ac ne na oro ca to' i'ina nonon. Win ne tocwi trigo pain ca mo' nein pi ma', ac i ma' na ca to' i'ina tococwa ma'. Toron toron na ximicocon, coromicat ni ca' ac cacain na capijacon Iri' Jam, win xumu win xumu ac cacain na oro caramaji macan' je oro ca param ximama' nucucun ca mam' tomi' querec te caca ma' quem. Om ca horon tiquin' caca pain ca howa nucucun.

Atos 8:18

Querec nain i ma' Simão ma' quem. Querec tata co xo' howa nana ma', pain ca mam' mi' tococwa pain Tamataracon Iri' Jam pain ca quep pan cocon pain winacocon oro apóstolo ma', Pedro con João ma'. Je ca tomi' con Pedro con João ma': Mi' xuhu' pain dinheiro ca'.

Romanos 12:2

Ta an xiho' huhun oro wari' co pan teretem nana ma' me ta. To' jimama' xut pain iri' xumuxut ca' me jun Iri' Jam. To' xocori pin rain iri' ca coromicat nuxut ca' me jun. Ma' ta ha' cuhu' pain ca querec pin' hwein oro ca param nucun ca an pe mi' capari' ca', ma' ta ara hwein quem. Param ara xi' nain oro ca awi wa Iri' Jam ta. Param nain carawa ca hohot non. Om ca param ni ca' cain oro ca param nucun

1 Coríntios 1:20

Je ca tomi' xuhu' ca': Cain' cain' caca oro wari' co taraju pa' tamana urut xi' ma nana ma'? Cain' cain' caca oro wari' co xirao' taxi' tamana urut xi' ma nana ma' quem? Cain' cain' caca oro wari' co tomi' taxi' tamana urut xi' ma nana pain macan' ca' quem? Taraju pa' tamana urut pain ca coromicat xo' nuxut ta iri nana oro co om howa nana ma' ne, om ca an hwet pe pin cain ca tamanain nucucun pain ca om coromicat xo' nucucun Iri' Jam ra? An hwet pe pin cain ma' ira. Querec pin' tata pain ca om coromicat xo' nucucun ta.

1 Coríntios 2:6

Ane pijim' hwet urut cocon pain ca coromicat nucun Iri' Jam oro wari' co hwara' opa nana pain ca howa cocon ma' ne, co ac ximicon hwanana nana pain ca howa nucucun ma', pijim' aramao ac urut cocon na pain iri' ca coromicat nucun Iri' Jam. Om ca pijim' aramao urut cocon pain ca coromicat pan nucucun oro wari'. Om ca pijim' aramao urut cocon pain ca coromicat pan nucucun oro taramaxicon co om howa nana cwa' quem, xi om pin ta' ara ne ca hwara' opa nucucun ta.

1 Coríntios 2:8

Om ca taraju pa' caca oro taramaxicon co om howa nana cwa', om ca ma' camain' ca taramaxicon co taraju pa' nain ca coromicat nucun Iri' Jam. Mo xi taraju pa' cacain, om xi tatatain mi' qui' cocon pain pana Taramaxicon nexi' co awi tamana pain ca om caracat nucun pain ca hwara' opa tamana nucun.

1 Coríntios 3:18

Ma' tara xumuhu' me, coromicat xo' je. Howa maho' jein oro ca coromicat ximama' nuhu' ma'. Mo ta ma' ca win ma' nuhu' co taraju pa' ina xi' ma ma', pain ca an xiho' cain ca coromicat nucucun oro wari' co om howa nonon Iri' Jam ma', na e' na pain ca an pe pin cain ca coromicat ximao nucun. Ac ca an xiho' pin tococwa tara co tamanain nana ta caca oro wari' co om howa nonon Iri' Jam ma'. Taraju pa' iri'o' pin ac ca tara quem.

2 Coríntios 4:4

Wirico Caxicon Jam co ac Iri' Jam nonon oro co om howa nonon Cristo ma', wirico co to' i'ina nonon pain ca coromicat xo' nucucun. Ac ca to' om pin cain na tococon pain ca om coromicat nucucun. Ma' ta om taraju pa' hwe ta nonon. Ma' ta om querec pin' hwein naran nein capijacon Iri' Jam ca an hwet pe nain ca toc meremem nucun Cristo pain ca hwara' opa tamana nucun ma' nonon. Wirico Cristo ara xi' na co an tan pan non Iri' Jam ma', iri' wirico na.

Gálatas 1:4

Taramaxicon nexi' Jeju Cristo ma', om ca narain ho' xucun pari'. Mi' pin caho' napari', xic am ca' napari' pain ca caracat nexi'. To' witan napari', ma' ta ha' cuhu' pain ca om an xiho' mami' huhun pain oro ca pan teretem nucucun oro wari' co om howa nanapa' ta napari'. Je ca param mi' capari' Cotere' Iri' Jam.

Efésios 2:2

Pan teretem taxipa' hwe, je curuhu' pane. An xiho' e' huhun oro wari' co om howa nonon Iri' Jam. Tomi' ha' taxipa' hun Caxicon Jam co taramaxicon pe ho' nonon oro caxicon jam co taramaja mi' nonon pain nanawin ma'. Wirico Caxicon Jam co taramaja pe ho' nain ximicocon oro wari' co om tomi' ha' camain' nana cwa', wirico co tomi' ha' hwe pane.

1 Timóteo 6:17

Hu mip roron co howa nana ma', co caramaju nana pain macan' pain xocori ca'. Ta xec xec hwe pain caramajuhu' me ta roron. Ta howa hwein me roron. Main om pin ta' ara xi' na oro caramajixi' ta. Howa e' jun Iri' Jam ta roron. Wirico pan na Iri' Jam co mi' mi' pi' pin napari' pain oro carawa ca om napari' ca'. Ma' ta tomi' querec te hwe ta napari'.

2 Timóteo 4:10

Xi paca' ara capa' Demas cara pane. Win xumu ara xi' nain oro caramaji macan', paca' ac capa' na, mao ac cain na Tessalônica. Mao nain Galácia Crescente, mao nain Dalmácia Tito quem.