Mateus 13:21 - Tradução Bíblica Pacaas Novos

²¹ Ane om tomi' querec te cara cacain ne. Om ca corom mao nein ximicocon capijacon Iri' Jam ca taraju caca. Maqui' iri na carawa ca to' i'ina nonon ne, ja' tequi' quep em' iri tata oro wari' pain ca howa cacain capijacon Iri' Jam ma' ne, an to hap ac cacain na ca howa wa.

Mateus 13:21 Iomraidhean Croise

Mateus 10:22

Noc noc pi' pin tuturuhu' oro wari', xi om ne ca howa ara mahu' ta. Ane tomi' xuhu' pain i ca' ne: Wari' co howa cara napa' ma', pain ca howa howa pi' pin pa' con oro ca quep em' wa ma', wirico tara co to' witan wa ta.

Mateus 11:6

Tomi' jun pain i ca' quem: Wari' co howa cara napa' ma', co om tara con ta'a napa' ma', wirico tara co param mi' ca pain ca awi wa Iri' Jam ta, ac i ma' na ca tomi' xo' tococwa ma'.

Mateus 13:20

Oro wari' co tomi' joc mam' mi' nanain pacun ca ma' wijimain macan' ma' iri na ne, taraju paxi' nanain capijacon Iri' Jam. Tomi' querec te hap paxi' nanain, howa pin paxi' nanain quem.

Mateus 13:57

Cain' cain' xira con ne nana, miri'om ac cocon na quem. Om ca howa camain' cocon. Ane tomi' pan cocon Jeju ne: Tomi' querec te paxi' ta profeta pain oro xijein cidade ma'. Pain iri' macaracon ma' iri na ne, om ca tomi' querec te tocwa. Iri' ca nari nucun ma', noc pan nonon ta na ca tomi' tococwa ma'.

Mateus 13:6

Hwet iri na xina ne, nonoc ac cain na, cono' pin ac ne na quem, xi mama' nein pira caximain ta.

Mateus 24:13

Wari' co howa cara napa' ma' iri na ne, pain ca howa howa pi' pin pa' cain oro ca quep em' wa ma', wirico tara co to' witan wa ta.

Mateus 26:31

Tomi' ac caparut na pain ca taxipa' urut con ca'. Pain xim ca', om ta xec querec ne, paca' paca' pi' pin ac mahu' tara. Xi xirao' pe ara xine pain capijacon Iri' Jam pata' pane. Ca' na pata': To' pa' pin ton co querec wet taxipa' nain ovelha ma', wawaran mama' ac ne tara oro ovelha nucun. Ac i ma' na ca xirao' pe xine ca tomi' nucun Iri' Jam pata' pane.

Mateus 26:33

Tomi' pan ac con na Pedro: Paca' paca' pi' pin paxi' teterem oro xucucun co taxipa' ma cwa'. Wata' iri na ne, om ta paca' camain' xim ta na ca tomi' con ma'.

Marcos 4:17

Ane om tomi' querec te cara cacain ne. Tomi' joc mam' mi' nanain pana ca om corom mip caximain pain macan' ma', om ca corom mao nein ximicocon capijacon Iri' Jam. Maqui' iri na carawa ca to' i'ina nonon ne, ja' tequi' quep em' iri nonon oro wari' pain ca howa cacain capijacon Iri' Jam ma' ne, an to hap ac cacain na ca howa wa.

Lucas 8:13

Carawa ca ara nain tocwi trigo ca camara' to nain pacun ma', tomi' joc mam' mi' nain carawa ca ara nonon oro wari' co tomi' querec te paxi' nanain capijacon Iri' Jam pain ca xo' taraju cacain ma'. Ane om tomi' querec te cara cacain ne. Tomi' joc mam' mi' nanain pana ca om corom mip caximain pain macan' ma', om ca corom mao nein ximicocon capijacon Iri' Jam. Howa howa ca' nanain, maqui' iri na carawa ca to' i'ina nonon ne, quep em' iri nonon oro wari' pain ca howa cacain capijacon Iri' Jam ma' ne, an to pin ac cacain na ca howa wa.

João 6:26

Om na, pirao' paxi' mahu', xi cao' ara hwein capam' pata' ta ac tococwa na. Pirao' paxi' mahu', xi ma'am ara hwein ta. Om ca pirao' mahu' pain ca querec pin' hwein ca an hwet mi' xuhu' pain ca hwara' opa ne ca', pain ca mi' xim xuhu' pain ca e' cara wa pain pawin cain. Tomi' iri'o' inuhu' ta.

Romanos 2:7

Oro wari' co tama' ara nanain oro ca awi wa pain ca win xumu cacain ca tomi' querec te nucun Iri' Jam ma', coromicat ca' ac caca na: Tomi' querec te tarapari' Iri' Jam ta. Hohot hwe tarapari', to' e' cara xuhu' tarapari' ta nana. Wiricoco tatara co mi' wawa pain ca e' cara wa.

Gálatas 5:6

Xi quep xiho' capari' ca wac xirac xine taparinain ca xirac nexi' ta. Pain ca howa xun Cristo Jeju pain ca to' hohot pan capari' ca', mo ta wac xirac cacapari', mo ta om wac xirac cacapari', an an ari na con Iri' Jam. Om ca tocojin' capari' pain i ma'. Noro e' nain ca howa nexi' pain ca howa xun Cristo. Om iri na ca noc caracan xijexi' ne, querec pin' ac capari' na pain ca howa xun quem.

Gálatas 6:12

Oro wari' co wac xirac jein taparinain ca xirac nuhu' ta nunuhu' ma', xec xec e' nana. Querec pin' tataraparut oro win judeu urut pain ca tomi' ha' taxipa' urut pain oro ca xirao' nucun Moisés ta nana. Jin' nonon oro win ma' caca. Tomi' ca' nana: Mo ta pijim' e' xut pain ca mi' pin nucun Cristo ma', pain ca to' witan e' napari' ca mi' pin nucun ta urut ca', mo ta pijim' ac i ma' urut, quep em' ac cacaparut tara ta na ca coromicat pan teretem nucucun. Je ca wac xirac jein ta cucuhu'.

Gálatas 6:15

Mo ta wac xirac cacapari', mo ta om wac xirac cacapari', an an ari na con Iri' Jam. Om ca noro capari' pain i ma'. Noro e' nain ximixi' pain ca to' xocoricon wari' pin capari' ca'.

Efésios 3:17

E' pe ho' tarain ximicocon Cristo ta inon pahu' quem. Win ne ca howa cocon ma' inon pahu'. Mi' roron pain ca om noc camain' quequem je pain ca om noc camain' xucucun quem. Hwara' opa tatara, om ta camara' caca pain ca caracat wa ta inon pahu'.

Filipenses 1:6

Wara meo nain xumuhu' Iri' Jam pane, wirico co ara nain ca awi wa pain xumuhu' ma', pain ca to' xocoricon wari' pin cuhu' ma'. Taxi' inon pain ca meo meo tiquin' tain cain xumuhu' quem. Aram aram maqui' pa' ac cuhu' tara xec nein ca in qui' ta' nucun Cristo Jeju ma', awori pin ac ne tara oro ca awi wa ca ara pe cain xumuhu' ma' quem.

2 Timóteo 1:15

Taxi' mapa' pain ca an pe pin cacapa' oro xerexi' co maqui' nanain oro xijein cidade pain macarain Ásia ca'. Wirico Fígelo con Hermógenes quem, noc noc pi' pin nanapa'.

2 Timóteo 4:10

Xi paca' ara capa' Demas cara pane. Win xumu ara xi' nain oro caramaji macan', paca' ac capa' na, mao ac cain na Tessalônica. Mao nain Galácia Crescente, mao nain Dalmácia Tito quem.

Tiago 3:2

Camara' camara' pi' pin ara xi' iri', xi om ne ca ma' taxipa' ara capari' oro xijein ca caracat wa ta. Wari' co om pan' ma', pain ca om tomi' pan tem ca ma', wirico co iri' wari' ta. Ximicon hwanana na, xi om ne ca miri'om taxi' ara cain ca param nucun. Om ca ara e' cain ca param nucun.

1Pedro 1:5

Querec wet xo' nuhu' quem, xi om ne ca howa ara hun ta. Mam' querec wet xo' nuhu' pain ca hwara' opa nucun. Querec wet xo' querec wet xo', aram aram maqui' pa' ac cuhu' tara xec nein ca to' witan pin toton cuhu' ma'. Wara awori xo' na, winim' e' nain xec nein ca an hwet mi' toton cuhu' pain ca param nucun ma', pain ca to' witan pin toton cuhu' ma'.

Apocalipse 2:13

Taxi' inuhu' pain ca to hwein i ma', pain ca taramaxicon pe ca Satanás ma'. Ane win xumu mahu' ne. Om ca an pe pin mahu', howa cara mahu'. To' pa' pin paxi' ta Antipas co win xumu napa' pain ca tomi' hwet capa' cocon oro wari' pane, to' pa' pe paxi' ta pain ca to pan nuhu' pain Pérgamo ma', ca pe pan ca Satanás ma'. Ane howa cara pan mahu' ne.