Mateus 13:19 - Tradução Bíblica Pacaas Novos

¹⁹ Oro wari' co tomi' joc mam' mi' nanain cacarain wana ca wixicaracao' to xine tocwi trigo ma', taraju paxi' nanain capijacon Iri' Jam pain ca taramaxicon pin nucun ma', ane om taraju pa' cacain ne. Maqui' ac ca na Caxicon Jam, cut ca' ac tococwa pain na oro ca wixicaracao' mi' wa pain ximicocon.

Mateus 13:19 Iomraidhean Croise

Mateus 12:26

Ac i ma' na con Caxicon Jam cocon oro win caxicon jam ca ma' quem. Mo xi mana' caracan xucucun, mo xi tomi' jein pin caracan xucucun, ma' xira ca hwara' opa cara ac caca quem ra? Om na. To' om pin ac xucucun xira pain ca hwara' opa nucucun.

Mateus 13:20

Oro wari' co tomi' joc mam' mi' nanain pacun ca ma' wijimain macan' ma' iri na ne, taraju paxi' nanain capijacon Iri' Jam. Tomi' querec te hap paxi' nanain, howa pin paxi' nanain quem.

Mateus 13:38

Totacon ma' iri na ne, an xiho' nain macan' ca to pan caca oro wari'. Trigo ca awi tocwi ma', an xiho' nonon oro wari' co taramaxicon pe ho' ca Iri' Jam. Caji tononoin ma' iri na ne, an xiho' nonon oro wari' nucun Caxicon Jam quem.

Mateus 4:23

Jeju ma', xut mao ac cain na oro xijein cidade pain Galileia ma'. Ca' na pe nain oro xirim ca cut in xucucun oro win judeu urut quem. Pijim' mi' tata pain capijacon Iri' Jam ma', pain ca taramaxicon pe ho' pin xim cuhu' Iri' Jam ta tococwa ma'. Quep xio ac tococwa na oro wari' pain oro xijein ca caxi nucucun quem.

Mateus 5:37

Je ca tomi' xim ca': Mo ta ara tain main oro ca ara ta' ma ma', ara tain ta e' ra. Mo ta om ara tain main, om ta ara tain ta e' ra. Mo ta tomi' waraju ximao main oro wixinain carawa pain ca tomi' pe pin main ca tomi' nem ma', wirico Caxicon Jam co mi' nem pain ca tomi' waraju nem ma'.

Marcos 4:15

Tocwi trigo ma', ca camara' to nain cacarain wana ma', tomi' joc mam' mi' nain capijacon Iri' Jam. Carawa ca ara nain pain ca itac pin nein oro wijimain me ma', tomi' joc mam' mi' nain carawa ca ara nonon oro wari' co taraju paxi' nanain capijacon Iri' Jam. Taraju iri nanain ne, maqui' hap ac ca na Caxicon Jam, cut ca' ac tococwa na pain capijacon Iri' Jam ca wixicaracao' mi' wa pain ximicocon.

Lucas 10:9

Mo ta ma' caca oro win ma' caca co caxi nana, quep xio pin ac huhun tara. Tomi' ca' jujun quem: Wixicam pin na xec nein ca taramaxicon pe ho' xim cuhu' Iri' Jam ta jujun.

Lucas 9:2

Pijim' mi' jujun pain ca taramaxicon pe ho' toton cocon oro wari' Iri' Jam ta. Quep xio pin jujun co caxi nana quem ac tococwa na.

João 18:38

Ma' tara wari' co taxi' nain ca iri'o' wa ra na ca tomi' querec ca Pilatos. Tomi' iri nain i ma' Pilatos ne, hwet mao mami' ac ca na, tomi' ac cocon na oro taramaxicon nuxut pain ca judeu urut ca'. Om ca mam' camain' tain ca pan tem wa con ta nonon.

João 8:43

Je xi taraju pa' mahu' pain ca tomi' xuhu' ca' quem? Ane noc hwein ca taraju wet wa ne.

Atos 17:32

Oro taramaxicon ma', taraju iri nonon Paulo pain ca to' e' mami' non Jeju Iri' Jam ta ca ma' ne, ma' ac caca na co tatam' e' nonon. Tomi' xirac nonon quem. Ma' ac caca na oro xucucun co taraju wet nonon quem. Taraju mami' xixin na urut pain ca pijim' mi' maparut ca' nonon.

Atos 18:15

Ane tomi' caracan pan xujuhu' ne. Tomi' caracan e' xujuhu' pain oro xijein ca pijim' wa ma', je pain oro ca wuxu wa, je pain oro ca xirao' pe wa ca tomi' ha' taxipa' hwe pain ca judeu hwe ma'. Je xi tomi' xo' pan xujuhu' pain ta! Noc inain ca taraju wa. Om ca juiz ta' pahu', om ta tomi' xo' xuhu' pain ta na ca tomi' in pin tococwa ma'.

Atos 20:25

Taraju wet ho' xine ta ac tococwa na. Wahu' ma', pain ca taraju mahu' pain ca pijim' hwet xuhu' pane, pain ca pijim' hwet xuhu' con Iri' Jam pain ca taramaxicon pe ho' xim capari' ca', om ta querec mami' mahu' ta. Taxi' ina, om ta querec mami' mahu'.

Atos 28:23

Je i ma' ta ac ca na Paulo ma', an pe xo' ac cacain na xec nein ca cut in mami' xi' caca ma'. Maqui' iri na xec nein ne, in hwet ac cocon na Paulo pain xiricon. Ma' mija nana oro win ma' caca co o qui' caca ma' quem. Hwet nonon Paulo pain xo' xec, pijim' pijim' ac tococwa na. Pijim' xo' tata con Iri' Jam ma', pain ca taramaxicon pe ho' xim capari' con Jeju. Noro mi' tata pain oro ca xirao' nucun Moisés je oro ca xirao' nucucun oro profeta ma' quem. Momon pijim' pijim' mi' ac tococwa pain na. Ma' ta taraju pa' hwe ta tata. Howa xiroron Jeju na paxi' tata pain ca pijim' nucun. Momon pijim' momon pijim' irawin pa' ac tococwa na.

Romanos 1:28

An to pin xun Iri' Jam, om ta mam' pe wet mami' xun ta nana. Je ca pin caca ma' ne tococwa pane. Wirico Iri' Jam pan na co pin caca ma' ne nonon pane. Coromicat pan teretem cara je ta ac tococwa na. Ara cara jein oro ca om awi wa ta ac tococwa na quem.

Romanos 14:17

Xi tomi' xeo pa' capari' Iri' Jam pain carawa ca cao' wa pain ca taramaxicon pe ho' capari' ta. Om ca tomi' xeo pa' capari' pain carawa ca toc iri' quem, om na. Ma' na xijein carawa ca tomi' capari': To' hohot pin nuhu' Tamatara ta napari'. Mi' nuhu' pain ca om toron ne xumuhu' Tamatara ta napari'. Ja' tomi' querec te nuhu' Tamatara ta napari' quem, je i ma' ca tomi' capari' Iri' Jam.

Romanos 2:8

Co tama' win xumu e' nanain ca param pan nucucun ma' iri nana ne, pain ca om tomi' ha' cacain capijacon Iri' Jam ca iri'o' ma', je pain ca param e' cacain ca pan teretem wa ma', wiricoco tatara co mana' tamana ca Iri' Jam. Wiricoco tatara co wap tamana ca quem.

Efésios 3:8

Om paxi' na ca awi ta' pane. Awi tiquin' ca' paxi' nanapa' oro xucucun wari' nucun Iri' Jam cwa'. Ane mi' pan capa' pain ca pijim' mi' wa capijacon ne. Xiram pa' napa' pain ca pijim' mi' roron pain capija oro wari' co om judeu nana ta capa' pane. Pijim' hwet roron pain carawa ca awi tamana ca mi' toton capari' Cristo ta napa'. Xi na capari' pain ca querec pin' pi' pin xin ta.

2 Tessalonicenses 2:12

Ma' ta tomi' mi' tomi' mi' pi' pin xuhu' pain ca wap wa pain ca em' hwe ta xuhu' ca', pain ca mama' jein cote ne xe ta xuhu' ta nonon oro wari' co om howa nanain capijacon ca iri'o' ma', co tomi' querec te pan nanain ca caracat wa ma'.

Hebreus 2:1

Hwara' opa tamana pan na Taramaxicon nexi' Jeju Cristo. Je ca na e' ne pain ca taraju wet xin ca tomi' nucun ca taraju iri' ca'. Ma' ta om aram aram an pe pin xin quem.

1João 3:12

Om ta an xiho' xun Caim co wari' ne ca Caxicon Jam pain cara pane. To' pa' pin non coxa' ca pane. Para to' pa' pin con quem? Om na, taraju pa' je e'. To' pa' pin non coxa' ca, xi om ne ca pan tem taxipa' pan ara ca ta. Noc non coxa' ca pain ca ara xo' taxipa' ca quem.

1João 5:18

Oro co mana panxita' ca Iri' Jam ma', taxi' ururun pain ca om caracat taxipa' caca ma'. Xi narain ho' pan ara tococwa con Caxicon Jam ta. Wirico Panxica Iri' Jam co narain ho' nonon ma'. Om ca quep xirac pan ac cocon Caxicon Jam ta.

1João 5:20

Taxi' urun Panxica Iri' Jam pain ca wara maqui' cain macan' pane quem. Mi' napari' pain ca taraju pa' wa, ma' ta querec pin' hun Te Iri' Jam co iri'o' ta napari'. Win cwere urun co ma' co iri'o' quem, win cwere urun Panxica Iri' Jam Jeju Cristo. Wirico Jeju Cristo co iri' co Iri' Jam iri'o' ta. Wirico co e' cara ta.