Mateus 13:11 - Tradução Bíblica Pacaas Novos

¹¹ Tomi' ac caparut na: Wara coromicat xo' na Iri' Jam pane. Main taramaxicon pe ho' toton oro wari' co howa nanapa' ta na, ac i ma' paxi' na ca coromicat xo' nucun pane. Ane om tomi' hwet tococwa pain oro wari' ne. Wahu' pain ca taxipa' mahu' ca', an hwet mi' nuhu' pain ca coromicat xo' nucun. Mi' nuhu' pain ca taraju pa' wa. Oro xucucun wari' co om howa nanapa' ma' iri nana ne, om ca mi' tococwa pain ca taraju pa' wa quem.

Mateus 13:11 Iomraidhean Croise

Mateus 13:10

Tomi' querec xun e' ac urut na pain ca taxipa' urut con ca', mo hwet ac urut con na. Para pijim' joc mam' mi' momon pain oro carawa pain ca ca' na momon oro wari' pain capijacon Iri' Jam ma' quem urut con.

Mateus 16:17

Param mi' nem pain ca awi wa Iri' Jam ta Simão panxica João ac con na Jeju. Xi wari' ca co an hwet mi' nem pain ca tomi' nem ma', pain ca Cristo ma ta mapa' ma', pain ca Panxica Iri' Jam ma ta mapa' ma'. Te ma', co pe pawin cain, wirico co an hwet mi' nem pain ca tomi' nem.

Mateus 19:11

Tomi' ac caparut na Jeju: Oro wari' ma', om ca taraju pa' xam' ac cacain ca tomi' nuhu' ma', pain ca awi na pain ca om an tacama narima' ta hwe ma' naparut. Taraju pa' e' nana co mi' wawa pain ca coco' e' wa ma'.

Mateus 20:23

Je i ma' ira, an xiho' xim mahu' pain ca jain jain ta' ne ca' ira. An xiho' xim mahu' pain ca quep em' xim cacapa' oro wari' quem ac tococwa na. An xiho' ac i ma' xim paxi' mahu', ane om wata' ne co tora' pan toton nonon oro wari' co xao to ho' xim nanapa' ne. Wirico pan na Te co wara tora' an to xo' nonon wari' co xao to ho' xim nanapa' ta na ca tomi' tococwa ma'.

Marcos 10:40

An xiho' ac i ma' xim paxi' mahu', ane om wata' ne co tora' pan toton nonon oro wari' co xao to ho' xim nanapa' pain iri' cwere je paraju ne. Wara tora' an to xo' tata co xao to ho' nanapa' ta na ca tomi' tococwa ma'.

Marcos 4:11

Om na, wara coromicat xo' na Iri' Jam pane ac tococwa na. Main taramaxicon pe ho' toton oro wari' co howa nanapa' ta na, ac i ma' paxi' na ca coromicat xo' nucun pane. Ane om tomi' hwet tococwa pain oro wari' ne. Wahu' pain ca taxipa' mahu' ca', an hwet mi' nuhu' pain ca coromicat xo' nucun. Mi' nuhu' pain ca taraju pa' wa. Oro xucucun wari' co om howa nanapa' ma' iri nana ne, pijim' joc mam' mi' e' inonon pain oro ca pijim' wa.

Lucas 8:10

Om na, wara coromicat xo' na Iri' Jam pane ac tococwa na. Main taramaxicon pe ho' toton oro wari' co howa nanapa' ta na, ac i ma' paxi' na ca coromicat xo' nucun pane. Ane om tomi' hwet tococwa pain oro wari' ne. Wahu' pain ca taxipa' mahu' ca', an hwet mi' nuhu' pain ca coromicat xo' nucun. Mi' nuhu' pain ca taraju pa' wa. Ane om ac i ma' ne cocon oro xucucun wari' co om howa nanapa' ne. Ca' na toton pain capijacon Iri' Jam iri inonon ne, pijim' joc mam' mi' e' inonon pain oro ca pijim' wa. Ma' ta hwet pin ne ca xirao' pe nucun profeta cara pane. Ca' na con pane: Querec paxi' nana, ane om querec pin' caca ne. Taraju taraju paxi' nana, ane om taraju pa' caca quem ne. Ac i ma' na ca xirao' pe nucun profeta cara pane ta na ca tomi' tococwa ma'.

João 6:65

Je ca tomi' xuhu' ne ac tococwa na. Oro wari' co howa xim nanapa' ma', mo ta om mi' cocon pain ca howa wa Te Iri' Jam ma', om ta howa ac cacapa' ta ac tococwa na.

João 7:17

Wari' co ara tain nain ca param nucun Iri' Jam ma', querec pin' ac cain tara ca pijim' ne pain ca ca' na tain capijacon ca'. Querec pin' tarain pain ca om maqui' capa' ca'. Querec pin' tarain pain ca maqui' con Iri' Jam.

Atos 16:14

Pe nain i ma' narima' co taraju wet naparut quem. Lídia na wixicam. Maqui' nain Tiatira, je i ma' wixinain cidade nequem. Vender taxipa' non wom co awi tamana. Iri' wom cam, ca paca' nucun womicocon co caramaju nana ma', wirico co vender taxipa' cama ma'. Wara tomi' ha' paxi' non Iri' Jam Lídia ma'. Taraju iri nain ca tomi' nucun Paulo ne, mi' pan ac cam na pain ca taraju pa' wa Taramaxicon nexi', howa pin ac cama na.

Romanos 11:25

Je ca tomi' xuhu' ca' xere: Ma' na ca coromicat nucun Iri' Jam ca om taraju pa' wa ira. Taraju pa' ho' jein inuhu'. Ma' ta om coromicat ximama' hwe pain ca awi tamana urut ximama' hwe ma'. Ca' na ca coromicat nucun Iri' Jam ca om an hwet querec ca ira: Oro judeu cwa', co waram winacon Israel nana cwa', om ta ari cara cacapa'. Ari ari ca' tatarapa'. Xam' iri tatara oro co om judeu nana ne, co howa xim nanapa' ma', ari ari om ac cacapa' tara oro judeu cwa', ac i ma' na ca coromicat nucun Iri' Jam.

Romanos 16:25

Tomi' querec te xun Iri' Jam co hwara' opa tamana ta. Ha' non pain ca to' hwara' opa cuhu' quem. Je ca xirao' pe xine pain capijacon ca tomi' hwet napari' con Jeju pain ca to' witan xim capari' ca'. Je ca pijim' taxipa' ta' ca', pain ca pijim' hwet xuhu' con Jeju Cristo. Om paxi' na ca taraju pa' xine ca coromicat xo' nucun con Jeju pane, om ca taraju pa' xine pain ca xo' ma' qui' ne oro carawa cara pane.

1 Coríntios 13:2

Mi' paxi' tarapa' pain ca pijim' hwet taxi' tain capijacon Iri' Jam ma'. Mi' paxi' tarapa' pain ca taraju pa' taraju pa' pi' pin tain oro capijacon ca om an hwet querec ca ma'. Mi' paxi' tarapa' pain ca taraju pa' taraju pa' pi' pin tain oro ca coromicat nucun quem. Howa tamana paxi' ton pain ca ha' capa' cote ne pacun pain ca tomi' pe ni pin tain ta' ca'. Mo ta om an xiho' ton Iri' Jam pain ca om noc capari' ca', je pain ca om noc cocon oro wari' ma' quem, ac caxicon pije' ma ta ac capa' tara quem.

1 Coríntios 15:51

Taraju wet jein ca tomi' xuhu' ca'. Tomi' hwet xuhu' pain ca coromicat nucun Iri' Jam ca om an hwet querec ca pane ira. Om paxi' tara ca cono' cono' pi' pin xi'. Ane to' jimama' to' jimama' pi' pin toton capari' Iri' Jam ne.

1 Coríntios 2:14

Om ca howa je na caca oro wari' co om nonon Tamataracon Iri' Jam. Om ca howa je na cacain ca tomi' nein. Xi tomi' ximao na ta ara cacain ta. Om ca taraju pa' ac cacain quem, xi ma' cocon Tamataracon Iri' Jam ca to' taraju pa' nonon ta.

1 Coríntios 2:7

Je ca tomi' xuhu' ca': Tomi' hwet jein ca coromicat ne naparut Iri' Jam ma', pain ca param mi' capari' pain carawa ca awi tamana ca quep xiho' xim napari'. Om ca an hwet querec cain ira. Wara coromicat xo' qui' nain pain cara pane, pain ca om ma' querec ne macan' pane.

1 Coríntios 4:1

Je ca tomi' xuhu' ca'. Na e' na pain ca querec pin' querec pin' pi' pin maparut pain ca taramaja mi' urut con Cristo ta. Querec pin' xut pain ca mi' pan caparut pain ca taramaja nuxut pain ca tomi' hwet jein ca coromicat xo' nucun Iri' Jam ca om an hwet querec ca pane caparut quem.

1 Coríntios 4:7

Xi awi tiquin' ca' xujuhu' ta. Oro caramaxicon Iri' Jam ca', wirico co mi' nuhu' pain. Je xi om tomi' xec xec qui' hwe quem? Ac ca om querec pin' hun a xira pain ca mi' cuhu' pain ta.

Efésios 1:18

Tomi' mi' inuhu' con. Ma' ta mi' cuhu' pain ca taraju pa' wa pain iri' xumuhu' ma'. Ac ca toha mi' cuhu' tara pain ca coromicat nuhu'. Ma' ta querec pin' hwein oro ca howa iri' ca', ca mi' toton capari' pain ca xo' howa xine qui' capari' pain ca wari' ne capari' pane.

Efésios 1:9

Je ca ara pin cain ca wara coromicat an pe xo' ca pane. An hwet mi' ac capari' na pain ca param nucun ca om an hwet querec ca ira. Wirico Cristo tara co ara mi' nuhu' pain napari'.

Efésios 5:32

Pain capijacon Iri' Jam ca tomi' ta' ca', con tarama' co pe ho' pin nam manacon ma', awi tamana na ca coromicat nucun ca an hwet mi' capari' ca', ca om taraju pa' iri' ira. Ca' na ca taraju pa' ne quem: Tomi' non Cristo pain ca om noc capari' pain ca howa xun ca', ac i ma' na ca taraju pa' ne.

Efésios 6:19

Wata' quem, tomi' mi' xine con quem. Ma' ta mi' capa' pain ca pijim' xo' wa pain ca aram aram pijim' ta' ta' ca'. Ma' ta pijim' quereme tain capijacon Iri' Jam ca an hwet mi' capari' con Jeju ma', pain ca to' witan toton capari' ca'.

Colossenses 2:2

Jain jain inuhu', ma' ta hwara' opa hwe pain xumuhu' ta inuhu'. Ma' ta xica' pe ne xumuhu' pain ca tomi' querec te caracan xujuhu' ma' inuhu'. Ma' ta taraju pa' taraju pa' pi' pin hwein ca coromicat nucun Iri' Jam ca om taraju pa' hwe con Cristo ira inuhu'. Ma' ta querec pin' iri'o' hun ta inuhu'.

1 Timóteo 3:16

Iri' Jam ma', om ca an hwet querec cain ca coromicat an pe xo' nucun ca howa iri' con Cristo Jeju pane. Pain xocori ca' iri na ne, an hwet mi' napari' con. Ca' napari' con: Wari' pin na Cristo. An hwet mi' napari' pain ca awi nucun Tamataracon Iri' Jam. Querec nonon oro jam co taramaja mi' nonon Cote ca. Pijim' hwet ac tocwa na cocon oro wari' co om judeu nana. Mija nana oro wari' co howa nonon pain oro xijein macan'. Piri' in hwet ac con na Cote ca pain pawin. Ac i ma' na tamara' ca com mi' xun ca'.

1 Timóteo 3:9

Howa iri'o' tatarain capijacon Iri' Jam ca an hwet mi' capari' ca'. Om ta tara ta'a camain' cacain. Na e' na pain ca xuruxut xo' caca pain ca tomi' ha' iri'o' cacain quem.

Tiago 1:5

Mo ta ma' ca win ma' nuhu' co om taraju pa' xo' ma', pain ca om querec pin' cain ca param nucun Iri' Jam ma', tomi' pan toron ta. Mi' ne pain ca taraju pa' wa, mi' ne pain ca querec pin' tain ca param nem pain ca xut xo' wa ta toron. Mi' ac tocwa pain tara. Xi xiram pa' taxipa' ara capari' pain ca tomi' xun ca'. Om ca pan to' cain tarajixi' pain ca tomi' xun quem, ara mi' querec te napari' pain, je curucun mao na.

1João 2:20

Wahu' iri na ne, ma' nuhu' Tamataracon Iri' Jam. Wirico co awi tamana ma', co pe ni ca' nain ca caracat wa ma', wirico co mi' nuhu' pain Tamataracon. Je ca querec pin' querec pin' pi' pin hwein oro ca pijim' xo' xine pain capijacon ma'. Querec pin' ac hwein na oro ca pijim' mixein xine ma' quem.

1João 2:27

Ane ma' cuhu' Tamataracon Iri' Jam ne. Win cwere nuhu' quem. Ca' na nuhu' pain oro capijacon Iri' Jam ca taxi' je cuhu' ma'. Om ca ximin hwe pain, om ca ma' xirapari' na hun xucun co ca' na nuhu' pain, om na. Ca' na xo' nuhu' pain. Om ca ca' na mixein cuhu', ca' na iri'o' nuhu' pain oro capijacon Iri' Jam ca taxi' je cuhu' ma'. Je ta win cwere qui' hun Cristo ta.