Mateus 11:23 - Tradução Bíblica Pacaas Novos

²³ Wahu' quem oro wari' co to nanain Cafarnaum ma'. Xec xec a xihwe! Awi urut, querec pin' taraparut pain ca awi nuxut xi' ma hun Iri' Jam ra? Om na ta! Wixicaracao' mi' turuhu' pain cote ne xe ta! An hwet mi' paxi' inuhu' pain ca hwara' opa ne ca', querec paxi' mahu' pain ca ara tain oro ca om ara taxi' ne ca wari' wa ca'. Ane om cwirin' je na hwe ne. Mo xi an hwet mi' ac i ma' toton pain ca hwara' opa ne oro caracat co to nanain Sodoma cara pane, cwirin' pin ac caca xira, ma' ma' wet ac ne xira cidade nucucun pain xocori ca', ac i ma' paxi' xira cocon.

Mateus 11:23 Iomraidhean Croise

Mateus 10:15

Je ca tomi' xuhu' ca', tomi' iri'o' inuhu' ta ac caparut na. Maqui' iri tara xec nein ca wap toton oro wari' pain ca caracat nucucun Iri' Jam ne, wap tamana ac cocon tara co om tomi' querec te nunuhu' pain ca pijim' nuhu' ma'. Wap paxi' totoron oro wari' nein Sodoma cocon oro wari' nein Gomorra co caracat tamana nana pain cara pane. Ane wap tamana pan ton cocon oro wari' co om tomi' querec te nunuhu' pain ca pijim' nuhu' ma' ne, ac i ma' na ca tomi' caparut ma'.

Mateus 16:18

Je ca tomi' xim ca' Simão ac con na. Pedro na xijein wuxum. Xi om ne ca ac pacun ara ma ta. Je ara xi' na ca tomi' mao nein wuxum. Ca tomi' hwet nem ma' quem, pain ca howa inem pain ca Cristo ma ma', pain ca Panxica Iri' Jam ma mapa' ma', ac iri' cote ne pacun na. Oro wari' co howa ac i ma' xi' nanapa' ma', iri' wari' ne ac toton tara, to' hwara' opa ac toton tara quem. Om ta to' quiji' pin ac cocon Caxicon Jam co taramaxicon pe ho' nonon oro win caxicon jam ca quem.

Mateus 17:24

Maji pain Cafarnaum ta ac urut na, xuruxut mama' ac urut na. Warut, Jeju, ca' urut. Tan' mama' iri urut pain i cain ne, xuruxut hwet ac cocon na Pedro caram ma' co cut taxipa' nanain wijimain imposto nein cote ne xiricon Iri' Jam ma'. Tomi' querec ac cocon na: Cain' cain' ca taramaxicon nuhu' ma' quem? Om ca pagar cain imposto nein cote ne xiricon Iri' Jam ra? Ac i ma' na ca tomi' querec cocon ma'.

Mateus 4:13

Wa' mao paxi' nain Nazaré ma', ane om mon to wet cain i cain ne. Pe pin tain Cafarnaum ta ac ca na. Cafarnaum ca pe ja' pan nain cote ne com pain Galileia ma', ca pe ja' pan nain oro xijein cidade pain Zebulom je Naftali ma', je ca pe pan ta' ca Jeju quem.

Mateus 8:5

Mao ac cain na Cafarnaum Jeju ma'. Wa' mao iri na ne, xut hwet ac con Jeju na taramaxicon nucucun oro soldado ma'. Romano na. Ma' 100 nana oro soldado co taramaxicon ne nonon. Tomi' ac con na: Taramaxicon ne. Caxi tamana na wari' ne co taramaja mi' e' napa'. Carama pe na, om ca meo mami' ca pain ca caxi tamana nucun. Terem' e' na, terem' pe nain xuru cain. Jain jain na pain ca caxi tamana nucun ta non.

Lucas 10:15

Wahu' quem oro wari' co to nanain Cafarnaum ma'. Xec xec a xihwe! Awi urut, querec pin' taraparut pain ca awi nuxut xi' ma hun Iri' Jam ra? Om na ta! Wixicaracao' mi' turuhu' pain cote ne xe ta na ca tomi' tococwa ma'.

Lucas 14:11

Je ca tomi' xuhu' ca' ac tococwa na. Oro wari' co xec xec nana ma', pain ca hwara' opa na xi' ma caca ma', to' wixipa' to' wixipa' pi' pin ac tococwa tara. Wari' co om xec xec ma' iri na ne, pain ca om ca hwara' opa ta' pan xucun ma', to' hwara' opa pin ac tocwa tara quem na ca tomi' tococwa ma'.

Lucas 16:23

Jain jain pe pan ac cain na cote ne xe quem. Mija na ca jain jain ca. Querec pira ac con na Abraão. Querec pira non Lázaro pain ca pe ho' con quem.

Lucas 4:23

Tomi' ac tococwa na: Taxi' inuhu' pain ca tomi' ca' xim mahu' pain i ca' quem, ca tomi' taxipa' caca oro wari' ma'. Tomi' ca' xim mahu': Taraju urut pum pain ca quep xio pin momon oro wari' co to nanain Cafarnaum cain. Je xi quep xio pin momon oro wari' co to nanain macaraxi' ca' quem, ac i ma' paxi' xim mahu' ma' na ca tomi' tococwa ma'.

Atos 2:27

Om ta an pe mapa' pain ca to pan caca co wara cono' nana. Om ta miri'om mapa' pain ca Iri' Wari' ta' ca', pain ca win xumu xim pain ca tama' tomi' ha' xim ca'. Nain ho' xim mapa' pain ca cunu mao ne cwere.

Atos 2:31

Wara taxi' nain carawa ca ara ton non Cristo co wara tomi' pe ca Iri' Jam pane. Je ca na con pain ca xirao' pe cain ca e' mami' nucun. Wara taxi' non pain ca om an pe pin xun tocwa pain manain pacun. Wara taxi' non pain ca om cunu mao ta' ne curucun quem.

Judas 1:7

Pan teretem ac i ma' nana oro wari' co to nanain Sodoma je Gomorra je oro xijein cidade ca to ja' pan nain pane quem. Mija na ca quep ximama' caca, ara taxipa' nanain ca om hohot camain' ma', je pain ca quep caracan xucucun pain ca tarama' nucucun ma' quem. Je ca wap tococwa ma', mam' wap tata pain xe ca om pi' ra ha' ma'. Tomi' ac tococwa na oro wari': Ma' tara xumuhu' me. Ac i ma' inonon oro wari' co pan teretem nana ta ac tococwa na.

Apocalipse 1:18

Wata' co e' cara cwa'. Mi' pin paxi' ina pane, ane e' cara ta' pain xocori ca' ne. Om ta pi' ra ha' ne ca e' ne ta. Wata' co taramaxicon hwara' opa tiquin' ca' nain ca cono' wa. Taramaxicon pe ho' inonon oro co cono' nana ma' quem, to ho' napa' oro ca mam' pa xine ca to pan caca ta, ac i ma' na ca tomi' capa' ma'.

Apocalipse 11:8

To wet iri caca ma' ac tococwa tara pain wana ca xuruxut ac caca oro wari' pain ximijain cote ne cidade ma', pain Jerusalém ma', ca tatatain pe tocwa pain pana Taramaxicon nexi' co taramaja mi' caca ma'. Ma' na ca wuxu ni mao ne Jerusalém ma' quem. Sodoma, je Egito, ac i ma' na ca wuxu ni mao ne ma'. Tomi' joc mam' mi' ara xi' tata oro wari' nein pain ca caracat tamana nucucun ta.

Apocalipse 20:13

Oro wari' co wara cono' nana pane, co cono' to nanain cote ne com pane, co cono' to nanain macan' pane, co wara mama' nanain ca to pan caca oro co cono' nana ma' quem, coco' quima hwet nonon co ma' co xao pe pe nain cote ne ca mam' xao pe ca taramaxicon ma'. Win ne ca ara hwe pane ac tococwa na, wap wap xam' ac tococwa na quem.

Apocalipse 6:8

Noro ac ta' na, pe quima hwet ac capa' na cavalo ca coxic. Ma' na wixicon co ma' co xao pe nain. To' Cono' Wari' na wixicon. Ma' na xucun co ja' ja' non ma'. Ma' na wixicon co ma' quem, Maxicocon Co Cono', ac i ma' na wixicon. Mi' ac tococwa na ca hwara' opa wa quem. Tomi' ac tococwa na: To' parapa' um quarto pin jujun oro wari' pain oro xijein macan' ma'. Mi' jujun pain ca mixita caracan xucucun. Mi' jujun pain ca pe' tamana wa, mi' jujun pain oro ca xirac wa. Mi' jujun pain oro caji carawa ca mana' tamana quem, ac i ma' tara ca to' parapa' pin tococwa ta. Ac i ma' na ca tomi' tococwa ma'.