Mateus 11:21 - Tradução Bíblica Pacaas Novos

²¹ Wa inuhu' me oro wari' co to nanain Corazim ma'! Wa inuhu' me oro wari' co to nanain Betsaida ma' quem! Ximin hwe. Wap tamana turuhu' Iri' Jam ta. An hwet mi' paxi' inuhu' pain ca hwara' opa ne ca', querec paxi' mahu' pain ca ara tain oro ca om ara taxi' ne ca wari' wa ca'. Ane om cwirin' je ha' hwe ne. Mo xi an hwet mi' ac i ma' toton pain ca hwara' opa ne oro caracat co to nanain Tiro je Sidom cara pane, wara cwirin' pin ac caca xira pain cara pane, wara to ac cocon xira caxicon wom, wara maxoc pa' ac xucucun xira pain topacon pain winacocon pain ca an hwet pe cacain ca cwirin' pin cacain ca pan teretem nucucun pane quem, ac i ma' paxi' xirara pane.

Mateus 11:21 Iomraidhean Croise

Mateus 11:22

Ane tomi' pan xuhu' pain i ca' ne, tomi' iri'o' inuhu': Maqui' iri tara xec nein ca wap toton oro wari' pain ca caracat nucucun Iri' Jam ne, wap ac cuhu' tara. Wap pije' totoron oro caracat co to nanain Tiro je Sidom cara pane. Wahu' iri na ne, pain ca to hwein Corazim je Betsaida ma', wap tamana pan ac cuhu' tara ta!

Mateus 15:21

Maji ta ac caparut na Jeju, mama' ac urut na pain macarain Tiro je Sidom.

Mateus 18:7

Ximin nana oro wari' pain macan' ca', xi mija ara ne oro ca to' caracat nonon ta ac caparut na. To' caracat paxi' tata wari' ma', je cwerein mao na. Ane ximin tamana pan xi' caca oro wari' co to' caracat nonon oro win ma' caca ne. Wap tamana pan totoron Iri' Jam ta.

Mateus 26:24

Mi' pin ta' ina pain ca Iri' Wari' ta' ca'. Win ne ca xirao' pe cacapa' oro profeta pane. Mi' pin ta' paxi' ina. Ane ximin pan ta' ca co ma' co tomi' mi' xim napa' cocon co noc nanapa' ma' ne, co quep xim nanapa' ma'. Ximin tara. Hohot xira pain ca om pan' ne ca pije' nucun cam jicon ta na ca tomi' caparut ma'.

Marcos 3:8

Ma' nana co maqui' nanain Judeia quem. Maqui' nanain Jerusalém, maqui' nanain macarain Idumeia ma', maqui' nanain xijein cacarain com ma' quem, pain xijein cacarain Jordão ma', maqui' nanain oro xijein cidade ca to ja' pan nain Tiro je pain Sidom ma' quem, je ca maqui' caca oro wari' pane. Mija nana. Taraju ara xi' nanain oro ca ara ca Jeju pane. Hwet ac cocon na.

Marcos 6:45

Pan cut pin iri nanain pawirinain capam' con hwam co taxipa' ca ne, tomi' ac ca na Jeju: Piton to jein mam' horoho wa ma' ac tococwa na. Wara pan horoho mama' jein xijein cacarain pain Betsaida cain ta tata. Querec querec mama' toton oro wari' pa'ao', aram aram hwet ac xuhu' tara quem ac tococwa na quem.

Marcos 7:24

Maji ta ac ca na Jeju ma', mama' ac cacain na oro xijein cidade ca to ja' pan nain Tiro je Sidom. Corom tain xirim ma' ac ca na, corom mao ac cain na. Noc paxi' tata oro wari' pain ca taxi' cocon pain ca pe cain i cain, ane aram aram taxi' pin cocon ne.

Marcos 7:31

Maji ta ac ca na Jeju ma', paca' ac cacain na oro xijein cidade ca to ja' pan nain Tiro ma'. Xuruxut tiquin' ca' ac cacain na xijein cidade pain Sidom ma' quem. Aram aram hwet ac cacain na cote ne com pain Galileia ma', je pain oro xijein cidade pain Decápolis ma'.

Marcos 8:22

Mama' ac cacain na Betsaida. Ma' ac caca na oro wari' co o qui' nonon co om tocon ma'. Quep xio ron win ma' nuxut cwa' ac cocon na.

Lucas 4:26

Ane om quep xiho' raram ta con Elias Iri' Jam ne. Om ca ma' camain' cacama co quep xiho' wawa pain Israel, om na. Quep xiho' ram ta non cam narima' co om judeu ma', co pe nain wijimain cidade ca pe ja' pan nain Sidom pane. Sarepta na wixinain cidade nequem. Wara mi' pin ca' nam taxicam pane, quep xiho' ram ta ac con na Elias Iri' Jam.

Lucas 6:17

Quiji' wi ac cocon na pain pacun ma', wirico Jeju, wiricoco co taxipa' ca ma' quem. Coco' to ac cacain na ca om tamaja nein ma' quem. Mija nana wari' co to nanain i ma'. Mija nana co wara taxipa' nonon, mija nana wari' co maqui' nanain oro xijein cidade pain Judeia, maqui' nanain Jerusalém, maqui' nanain cacarain iri' cote ne com pain Tiro je Sidom ma' quem. Om ca paric camain' caca.

Lucas 9:10

In hwet iri nonon Jeju oro apóstolo ma' ne, tomi' hwet ac cocon na pain oro ca ara caca ma'. Harahap je ta ac tococwa na, mama' ac cacain na Betsaida ma', je i ma' wixinain cidade ca mama' caca ma'. Mama' xica' to nana, om na wari' co ja' ja' nonon.

João 1:44

Wari' nein Betsaida na Filipe ma'. Je ca maqui' ca André con Pedro quem.

João 12:21

Mo hwet ac cocon na Filipe ma', co wari' nein Betsaida pain Galileia ma'. Querec xuxun Jeju na urut ta ac cocon na.

Atos 12:20

Ac i ma' ac i ma' nana, mana' tamana ac tococwa na oro wari' nein Tiro je Sidom ma'. Cain' cain' xira con ne ac caca na. Na e' na pain ca tomi' xo' xun ta, xi maqui' pan ara nein macaracon oro carawa ca cao' iri' ca' ac caca na. Mo hwet xun ta ac caca na. Tomi' toto cain' nonon Blasto ma', co hwara' opa ma', pain ca taramaja mi' con Herodes ma', pain ca querec wet cain xiricon ma'. Quep xiho' xut me ac cocon na. Tomi' xo' ron Herodes ma', pain ca mana' caparut ca'. Mana' maho' xijexi' quem ca' xun urut quem, tomi' toto ac i ma' nonon Blasto ma'. Ma ac ca na.

Atos 27:3

Xec pin iri na ne, piri' to ac urut pain na xijein cidade ma', Sidom na wixinain. Xiram pa' ac con Paulo na Júlio ma' quem. Hohot na pain ca mo hwet momon oro win ma' ma co to nanain Sidom ca' ac con na. Ma' ta quep xiho' quequem, ma' ta mi' quequem pain oro ca param ma ma' non.

Judas 1:11

Wa inonon me! Ximin nana. Wap tamana totoron Iri' Jam ta. Xi an xiho' ara cocon Caim cara pane, an xiho' nonon pain ca xut pan tem nucun. Param tamana nanain dinheiro. Win ca Balaão cara pane, co mixein nonon oro wari' pane. Ac ca ja' ja' cocon na pain ca pan tem nucun. To' om pin ac tococwa tara. Win ne ca to' om pin tococwa Corá cocon oro win ma' ca pane quem.

Apocalipse 11:3

Ma' 2 tatara wari' ne co pijim' xin nanain capija ca iri'o'. To totoron caxicon wom, ma' ta querec pin' cacapari' pain ca tomi' xaxa' nexi' pain ca caracat nucucun oro wari' ta tatara. Pijim' hwet ac cacain tara capija. Ma' 1.260 tara xec pain ca pijim' nucucun. Ac i ma' na ca tomi' capa' ma'.

Apocalipse 6:12

Querec ac ton na co ma' co ac Wijimain Taramaji Ovelha ma', pain ca pa cain wirain ca hupa' caho' nein tapari carawa ca joc top ma', ma' 6 pin ac ne na ca pa nein. Pa pin iri nain ne, cocoroc mip ac ne na macan'. Mixem pin ac ne na tocon xina. Iri' mixem na, win ca wom co mixem mip ma', ac i ma' na ca mixem pin ne tocon xina. Paca' pin ac ca na panawo'. Win ne wic pain ca paca' nein ma' quem, ac i ma' na ca paca' pin ca panawo'.