Mateus 10:41 - Tradução Bíblica Pacaas Novos

⁴¹ Wari' co tomi' querec te non co pijim' hwet nain capijacon Iri' Jam ma', mo ta tomi' querec te con pain ca pijim' nucun ma', mi' ac tocwa tara pain oro ca awi wa. An tarain co pijim' ma', an ac cain tara co tomi' querec te non ma' quem, je je ari tara carawa ca cut xi' caca. Wari' co tomi' querec te non co xut xo' ma' quem, mo ta tomi' querec te con pain ca xut xo' nucun ma', mi' ac tocwa tara pain oro ca awi wa. An tarain co xut xo' ma', an ac cain tara co tomi' querec te non ma' quem, je je ari tara carawa ca cut xi' caca ta.

Mateus 10:41 Iomraidhean Croise

Mateus 16:27

Je ca tomi' xuhu' ca' ac caparut na. Ja' ja' xine. Ta jin' huhun oro wari' co quep em' xim nunuhu' pain ca ja' ja' mahu' me. Maqui' ta' ara xi' na xec nein ca in qui' ta' ne ca', wata' pain ca Iri' Wari' ta' ca', in qui' ac tain tara pawin. Maqui' wi ta' cocon oro jam co taramaja mi' nanapa'. Maqui' wi ta' pain ca hwara' opa nucun Te quem. Pagar ac toton tara oro wari', pagar toton pain oro ca ara caca pain ca e' e' wet nucucun. Win ne ca ara hwe pane toton, mi' mi' xam' ac toton pain tara. Wahu' quem, win ne ca ara hwe pain ca ja' ja' mahu' pane xuhu', pagar pagar xam' ac xuhu' tara quem.

Mateus 25:44

Tomi' querec ac cacapa' tara: Cain' cain' xira quem Taramaxicon nuxut ac cacapa' tara. Ma' xec ca querec urut pum pain ca pe' nem pane quem? Ma' xec ca querec urut pum pain ca toc xita' com na ma pane quem? Ma' xec ca querec urut pum pain ca tatirim ma pane quem? Ma' xec ca querec urut pum pain ca om quem wom co pe wa pane quem? Ma' xec ca querec urut pum pain ca caxi nem pane quem? Ma' xec ca querec urut pum pain ca tao' pe pin quequem pain xirinain ca tao' to tao' to to wa pane quem? Ma' xec ca om quep xiho' urut pum pane quem? Ac i ma' tara ca tomi' querec cacapa'.

Mateus 25:45

Tomi' ac toton tara: Om iri na ca quep xiho' huhun oro wari' co howa nanapa' ne, co om hwara' opa camain' nana pane, wata' ac ne na co om quep xiho' hwe pane quem. Tomi' iri'o' inuhu' ta, ac i ma' tara ca tomi' toton ta.

Mateus 6:1

Ma' tara xumuhu' me. Ara iri jein ca awi wa pain ca ara xin hwein ca param nucun Iri' Jam ne, ta ara hwet to hwein cocon oro wari' me ta ac tococwa na. Ta querec ma' tatarapa' pain hwe me. Mo ta querec ma' tatarapa' pain hwe, om ta mi' cuhu' pain oro ca awi wa Cotere' co pe pawin cwain.

Mateus 6:18

Ma' ta om querec pin' quequem oro wari' pain ca an pe main ca cao' wa ma', pain ca momon tomi' e' ton mon Iri' Jam. Taxi' e' terem Cotere' co om querec wa ma'. Taraju pa' ra e': An pe iri rain ca cao' wa pain ca momon tomi' e' ton mon pain ca xica' pe nem ne, om paxi' na ca querec quequem oro wari' cwa', ane querec pan quem Cotere' ne. Wirico tara co cut mi' nem pain oro ca awi wa ta.

Mateus 6:4

Ma' ta om taxi' quequem oro wari' pain ca mi' mon pain caramajum. Cut mi' ac quem, pain tara ca awi wa Cotere'. Taraju pa' ra e': Ara iri irin ca awi wa pain ca xica' pe nexi' ne, om paxi' na ca querec cacapari' oro wari' ma'. Ane querec pan capari' Cotere' ne ta. Wirico tara co cut mi' nem pain oro ca awi wa quem.

Mateus 6:6

Wum iri na ne, pain ca tomi' ton mon Iri' Jam ma', corom mao ac main tara man pain tequipain xirim ma', tao' pa' ac main tara manain, tomi' ac mon tara Cotere' co om querec wa. Taraju pa' ra e': Tomi' ton iri mon Iri' Jam pain ca xica' pe nem ne, om paxi' na ca querec quequem oro wari' cwa', ane querec pan quem Cotere' ne ta. Wirico tara co mi' nem pain oro ca awi wa quem.

Mateus 7:8

Xi taraju wet ara tococwa oro wari' co mi' ne nonon pain carawa ta. Oro co tama' mi' ne nonon pain carawa ma', mi' mi' xam' ac tococwa pain tara. Oro co tama' pirao' nanain carawa ca param caca con, mam' ac cacain con tara. Oro co tama' tomi' nonon pain ca quep xiho' xut me cocon ma', co ac ca tama' tataca tataca cacain na manain xiricon ma', ac ca pa xat mi' tococwa pain tara man quem, quep xiho' ac tococwa tara quem.

Atos 16:15

Ja' ac tacama na pain com. Wiricam, wiricoco oro win ma' cama co to ho' nanam pain xiricam ma' quem, ja' ac tacacama na pain com. Ja' iri tata ne, tomi' mip ac caparut na: Mo ta querec pin' mahu' pain ca howa ton Taramaxicon nexi' cwa', je ta to ho' qui' mahu' pain xuru ta naparut, tomi' tomi' na ac caparut na. Ma ac urut cam na, to ho' ac urut cam na.

Romanos 16:23

Mam' pe wet inonon ta nuhu' Gaio cwa'. Pi'am pe inain xiricon Gaio cwa'. Cut in to xucucun pain xiricon oro xerexi' co howa nonon Jeju quem. Mam' pe wet inonon ta nuhu' Erasto cwa', co querec wet nain dinheiro nein cidade ca' quem. Mam' pe wet inonon ta nuhu' coxari' Quarto cwa' quem.

1 Coríntios 9:17

Mo xi pijim' pan ta' ta', mo xi maqui' nein xumu pain ca pijim' ta' ne ca', je i ma' xira ca cut qui' ta' carawa pain ca taramaja ne ta. Ane pijim' ra pan capa' Iri' Jam ne. Tora' napa', pijim' ra ta napa'. Na e' na pain ca pijim' tain capijacon Iri' Jam con Jeju ta.

Hebreus 6:10

Om ca pan tem camain' ca Iri' Jam, ara xo' taxipa' na. Om ta ji'am pin cuhu' pain ca taramaja tamana nuhu' ma', om ta ji'am pin cuhu' pain ca an hwet hwein ca tomi' querec te nuhu' pain ca om noc hun ma' quem, xi quep xiho' ara huhun oro win howa hwe ta, quep xiho' quep xiho' wet huhun pain xocori ca' quem.

2João 1:8

Ma' tara xumuhu' me. Mo ta ha' huhun co pijim' mixein ac i ma' nana ma', waraju ac hwein tara oro ca taramaja nexi' pain ca taramaja mi' xun Iri' Jam. Howa cara iri jein oro ca pijim' mi' xihwe pain capijacon Iri' Jam ne, cut mi' cut mi' pi' pin ac cuhu' tara pain oro ca an to xo' mi' cuhu' Iri' Jam pain pawin cain.