Lucas 9:11 - Tradução Bíblica Pacaas Novos

¹¹ Ane taxi' pin cocon oro wari' ne. Maji cocon ta ac caca na, ja' ja' ac cocon na quem. Hwet iri nonon ne, tomi' querec te pan ac tococwa na. Tomi' hwet ac tococwa na con Iri' Jam pain ca taramaxicon pe ho' xim capari' ca'. Quep xio pin ac tococwa na co caxi nana ma' quem.

Lucas 9:11 Iomraidhean Croise

Mateus 12:15

Taxi' nonon oro fariseu Jeju quem. Taxi' nonon pain ca to' pa' pin xun cocon ma'. Je ca mao ni ca' tococwa ma'. Ja' ja' ac cocon na oro wari'. Mija nana co ja' ja' nonon. Quep xio quep xio xam' ac tococwa na quem.

Mateus 14:14

An tac iri urut pain mam' horoho nuxut ne, piri' ac ca na Jeju. Querec ac tococwa na oro wari' quem. Mija nana wari' ta. Om ca paric camain' caca. Xiram pa' tata, quep xio quep xio ac tococwa na co caxi nana ma'.

Mateus 21:31

Tomi' querec ac tococwa na: Ma' co tomi' ha' pan non cote ca quem tata. Wirico co pan' cain' ta nonon. Je ca tomi' xuhu' ca', tomi' iri'o' inuhu' ta ac tococwa na. Oro caracat ma', cocon oro caxicon wari' cacam oro caxicam narima' ma' quem, hohot nonon Iri' Jam, om ca i'ina cacam pain ca xin ne cocon Iri' Jam pain ca taramaxicon pe ho' tatam cacam ta. Wahu' iri na ne, om ca hohot hun Iri' Jam. I'ina tamana nuhu' pain ca xin ne hun pain ca taramaxicon pe ho' xim cuhu' ma'.

Mateus 21:43

Je ca tomi' xuhu' ca' ac tococwa na. Iri' Jam ma', wari' ne paxi' nuhu' pain ca taramaxicon pe ho' toton cuhu' ira. Ane noc pin mahu' ne. Je ca maho' pin xim cuhu' pain ca judeu hwe ma'. Wari' ne wari' ne om pin xim nuhu' Iri' Jam. Wari' ne pin totoron oro xucucun wari' co tomi' ha' xun nonon ma'.

Lucas 1:53

Oro wari' co pe' nana ma', xiram pa' ac tococwa na, to' ma'am ac tococwa na pain oro carawa ca awi. Oro xucucun wari' co caramaju nana ma' iri nana ne, om ca xiram pa' tococwa, in ca' xine tata, werem pa' e' nana.

Lucas 5:31

Tomi' ac cocon na: Om ca cwirin' je toton oro wari' co awi urut xi' ma nana ma'. Cwirin' je e' inonon co querec pin' pan xucucun pain ca caracat nucucun. Win ne ca om aramao xio tococwa oro wari' co om caxi nana ma'. Aramao xio e' tata co caxi nana ma'. Ac i ma' ina quem, cwirin' je e' inonon oro caracat. Je ca maqui' ta' ca' na ca tomi' tococwa ma'.

Lucas 8:1

Om ca pain homa ne, maji ta ac ca na Jeju, mao ac cain na oro xijein cidade, je pain oro ca paric to ne xirim ma' quem, pijim' mi' ac tococwa na pain capijacon Iri' Jam pain ca taramaxicon pe ho' toton cocon ma'. Ja' ja' nonon co taxipa' ca ma', co ma' 12 nana ma'.

Lucas 8:10

Om na, wara coromicat xo' na Iri' Jam pane ac tococwa na. Main taramaxicon pe ho' toton oro wari' co howa nanapa' ta na, ac i ma' paxi' na ca coromicat xo' nucun pane. Ane om tomi' hwet tococwa pain oro wari' ne. Wahu' pain ca taxipa' mahu' ca', an hwet mi' nuhu' pain ca coromicat xo' nucun. Mi' nuhu' pain ca taraju pa' wa. Ane om ac i ma' ne cocon oro xucucun wari' co om howa nanapa' ne. Ca' na toton pain capijacon Iri' Jam iri inonon ne, pijim' joc mam' mi' e' inonon pain oro ca pijim' wa. Ma' ta hwet pin ne ca xirao' pe nucun profeta cara pane. Ca' na con pane: Querec paxi' nana, ane om querec pin' caca ne. Taraju taraju paxi' nana, ane om taraju pa' caca quem ne. Ac i ma' na ca xirao' pe nucun profeta cara pane ta na ca tomi' tococwa ma'.

Lucas 9:10

In hwet iri nonon Jeju oro apóstolo ma' ne, tomi' hwet ac cocon na pain oro ca ara caca ma'. Harahap je ta ac tococwa na, mama' ac cacain na Betsaida ma', je i ma' wixinain cidade ca mama' caca ma'. Mama' xica' to nana, om na wari' co ja' ja' nonon.

Lucas 9:12

Corom mao pin iri na xina ne, mo tomi' xun Jeju ta ac caca na co taxipa' ca ma', xuruxut hwet ac cocon na. Mama' je ximomon oro wari' cwa' ac cocon na. Ma' ta mama' cacain oro xitot, je pain oro ca paric to ne xirim ma'. Mam' ac cacain tara carawa ca cao' wa, mam' ac cacain tara ca pi'am to wa quem. Om ara xi' na wari' pain i ca', om nain i ca' xirim ca cut pe xine carawa ca cao' wa quem na ca tomi' cocon ma'.

Lucas 9:2

Pijim' mi' jujun pain ca taramaxicon pe ho' toton cocon oro wari' Iri' Jam ta. Quep xio pin jujun co caxi nana quem ac tococwa na.

João 4:34

Tomi' ac caparut na: Ac carawa ca cao' wa napa' ca tomi' ha' ton Te co hwet roron oro wari' ta napa' pane. Ac carawa ca cao' wa napa' ca ara ara pi' pin tain ca taramaja ne ca ara ra capa' pane.

João 6:37

Mi' xim iri tarapa' cocon oro wari' Te ne, howa howa pi' pin ac cacapa' tara. Om ta tomi' in pin camain' toton co howa xim nanapa' ma'.

Atos 28:31

Pijim' mi' ac tococwa na pain ca taramaxicon pe ho' capari' Iri' Jam ca'. Ca' na tata con Taramaxicon nexi' Jeju Cristo quem. Om ca pijim' jin' tococwa, pijim' hwara' opa tata. Om ca nain ho' tocwa pain ca pijim' wa quem. Je i ma'.

Romanos 10:14

Je ca tomi' xuhu' ca': Ma' tara wari' co quep xiho' ne ta ac non pain ca om howa querec con ra? Ma' tara wari' co howa ac non pain ca om taraju querec con ra? Ma' tara wari' co taraju ac na pain ca om pijim' tocwa ra?

Romanos 10:17

Je ca tomi' xuhu' ca': Howa urun Cristo, xi om ne ca ma' ara ca wari' co pijim' mi' napari' con. Oro wari' co taraju nanain ca pijim' tocwa Cristo ma', taraju e' nana pain ca pijim' mi' tococwa pain capijacon Iri' Jam ta.

Romanos 15:3

Xi ara pan cain ca param nucun Cristo pane ta. Ara nain ca param nucun Cote ca. Tomi' xirac paxi' ta. Je i ma' ira, ara ara ac cain na ca param nucun Cote ca. Win ne ca xirao' pe xine pain capijacon Iri' Jam ca', pain ca tomi' con Iri' Jam Jeju pane. Ca' na con pane: Tomi' xirac iri nenem oro wari' ma' ne, wata' ac ne na co tomi' xirac pan caca ma', ac i ma' na ca tomi' nucun pane.

2 Timóteo 4:2

Pijim' mi' roron pain capijacon Iri' Jam oro wari'. Am taraju wet xin cacain, am om taraju wet xin cacain. Je i ma' ira, wara awori xo' ra pain, pijim' mi' roron pain. Mo ta caracat caca, tomi' roron pain taraxicocon pain ca pan teretem nucucun. Cwirin' jein ta roron. Hu roron, tomi' pan hot roron pain ca pijim' momon pain capijacon Iri' Jam ma'.

Hebreus 4:16

Je ta wixicam xun Iri' Jam co xiram pa' taxipa' ma', co quep xiho' taxipa' ma' quem. Om ta jin' xun, ac ca wixicam xun tara pain iri' ca xao pe pe ca pain pawin cain. Ma' ta xiram pa' capari', ma' ta quep xiho' capari' quem. Ximin iri xi' ne, pain ca ma' capari' oro ca to' i'ina napari' ma', xiram pa' hap ac capari' tara, quep xiho' hap ac capari' tara quem.