Lucas 8:13 - Tradução Bíblica Pacaas Novos

¹³ Carawa ca ara nain tocwi trigo ca camara' to nain pacun ma', tomi' joc mam' mi' nain carawa ca ara nonon oro wari' co tomi' querec te paxi' nanain capijacon Iri' Jam pain ca xo' taraju cacain ma'. Ane om tomi' querec te cara cacain ne. Tomi' joc mam' mi' nanain pana ca om corom mip caximain pain macan' ma', om ca corom mao nein ximicocon capijacon Iri' Jam. Howa howa ca' nanain, maqui' iri na carawa ca to' i'ina nonon ne, quep em' iri nonon oro wari' pain ca howa cacain capijacon Iri' Jam ma' ne, an to pin ac cacain na ca howa wa.

Lucas 8:13 Iomraidhean Croise

Marcos 6:20

Xi jin' ara con ta. Jin' non pain ca querec pin' con pain ca xut xo' nucun je pain ca taramaja mi' con Iri' Jam ma'. Je ca nain ho' con ma'. Taraju taxipa' non pain ca pijim' nucun quem. Taraju iri non ne, i'ina ac ne na ximicon. Ane hohot cara con ca taraju wa ne.

Lucas 8:12

Carawa ca ara nain tocwi ca camara' to nain cacarain wana ma', pain ca itac pin nein oro wijimain me ma', tomi' joc mam' mi' nain carawa ca ara nonon oro wari' co taraju paxi' nanain capijacon Iri' Jam. Maqui' na Caxicon Jam, cut ca' ac tococwa na pain capijacon Iri' Jam ca wixicaracao' mi' wa pain ximicocon. Ma' ta om howa hwein ta tata, ma' ta om to' witan ca' cuhu' pain ca caracat nuhu' Iri' Jam ta tata.

Lucas 8:14

Carawa ca ara nain tocwi trigo ca camara' to nain pi ma', tomi' joc mam' mi' nain carawa ca ara nonon oro wari' co taraju paxi' nanain capijacon Iri' Jam. Pain pin iri na ne, ma' ac ne na oro ca to' i'ina nonon. Win ne tocwi trigo pain ca mo' nein pi ma', ac i ma' na ca to' i'ina tococwa ma'. Toron toron na ximicocon, coromicat ni ca' ac cacain na capijacon Iri' Jam, win xumu win xumu ac cacain na oro caramaji macan' je oro ca param ximama' nucucun ca mam' tomi' querec te caca ma' quem. Om ca horon tiquin' caca pain ca howa nucucun.

João 15:2

Wari' co querec wet nain panaji uva ma', ton tapiripit taxipa' nain taparain ca om wina. Taparain ca wina ma', wawac wijimain pin ac cain na. Ma' ta wina tamana ne nain.

João 15:6

Wari' co om win cwere napa' ma', ac taparain panaji uva ca om wina ma', ca xin pin wa ma', ca mi' pin ma'. Oro taparain panaji uva ca cono' ac i ma' ma', cut in ac xine na, wixicaracao' mi' ac xine na pain xe ma', wiran mao ac ne na quem.

João 5:35

João cara pane, ac naran na. Ac ca toha ca na pain ca pijim' ca pane. Win ne ca toha ne naran ca tom ma', ac i ma' na ca toha mi' cuhu' pain xumuhu' pane. Tomi' querec te paxi' hwein ca pijim' nucun pain ca an xiho' cain naran pane quem tata.

1 Coríntios 13:2

Mi' paxi' tarapa' pain ca pijim' hwet taxi' tain capijacon Iri' Jam ma'. Mi' paxi' tarapa' pain ca taraju pa' taraju pa' pi' pin tain oro capijacon ca om an hwet querec ca ma'. Mi' paxi' tarapa' pain ca taraju pa' taraju pa' pi' pin tain oro ca coromicat nucun quem. Howa tamana paxi' ton pain ca ha' capa' cote ne pacun pain ca tomi' pe ni pin tain ta' ca'. Mo ta om an xiho' ton Iri' Jam pain ca om noc capari' ca', je pain ca om noc cocon oro wari' ma' quem, ac caxicon pije' ma ta ac capa' tara quem.

1 Coríntios 15:2

Capijacon Iri' Jam con Jeju ca', je ca mam' to' witan xihwe quem. Howa cara iri hwein ne, witan ac hwe na. Tara pahu', mo ta om howa cara hwein, howa ximama' ac hwe na quem.

Gálatas 3:1

Je ca tomi' xuhu' ca' oro win howa ta' pain Galácia. Wa inuhu' me, xi coromicat xo' hwe ta. Ma' co mixein nuhu' ma' quem? Om ca pijim' hwet xo' xuhu' pain ca mi' pin nucun Jeju Cristo pain ca mi' pin pe cain pana pane ra?

Gálatas 3:4

To' i'ina pin iri nuhu' oro carawa pain ca xo' howa ten qui' hwe pane ne, jain jain tamana ac hwe na pain ca quep em' wa. Cain' cain' hwe quem? Jain jain ximama' hwe ra? Tara pahu' ta, am jain jain ximama' hwe.

Efésios 3:17

E' pe ho' tarain ximicocon Cristo ta inon pahu' quem. Win ne ca howa cocon ma' inon pahu'. Mi' roron pain ca om noc camain' quequem je pain ca om noc camain' xucucun quem. Hwara' opa tatara, om ta camara' caca pain ca caracat wa ta inon pahu'.

Colossenses 1:23

Mo ta howa tiquin' howa tiquin' hun Cristo ma', mo ta hwara' opa cara hwe pain ca howa nuhu' ma', mi' ac cuhu' tara pain ca om ma' camain' cuhu' ca to' em' nuhu' ma'. Ta howa ni ca' camain' hwein capijacon Iri' Jam con Cristo me ta. Howa howa tiquin' jein oro ca wara tomi' pe nucun ca ara mi' xim cuhu' con. Wara pijim' xihwe pain pane, taraju hwein. Pijim' hwet pijim' hwet xam' tata pain oro xijein macan' oro wari' quem. Je ca taramaja ne ca' quem. Wata' pain ca Paulo ta' ca', pijim' hwet taxipa' inain capijacon Iri' Jam con Cristo.

Colossenses 2:7

Win ne pana ca hwara' opa ma', pain ca corom mama' nein paxicom caximain ma', ac i ma' tara pain ca hwara' opa hwe con Taramaxicon nexi'. Horon horon tiquin' je pain ca win cwere hun ma'. Howa mip jein oro ca pijim' xihwe con pane. Tama' tomi' hwet tomi' hwet tiquin' jein ca tomi' querec te nuhu' con Iri' Jam quem.

1 Tessalonicenses 3:5

Toron tamana napa' xumu pahu', xi coromicat ara xuhu' pane ta. Am tomi' querec cocon Caxicon Jam ma', am joc camara' cocon ma', am taramaja ximama' iri' pain ca pijim' mi' xuxun pain capijacon Iri' Jam ma', ac i ma' na ca coromicat ne pahu' pain ca jain jain ta' pahu' pane. Je ca hwet roron ton Timóteo pahu' pane. Ma' ta taxi' toton pain ca howa nucucun ta inon pahu' pane.

1 Timóteo 1:19

Howa cara rain capijacon Iri' Jam ca iri'o'. Ara e' rain oro ca awi wa ma', ca taxi' ma pain ca hohot con Iri' Jam ma'. Ma' ara xi' nana co an to pin nanain ca param nucun Iri' Jam. Taxi' paxi' xucucun pain ca om hohot con Iri' Jam oro ca ara caca ma'. Ane opain pin ne ximicocon ne. Je ca an to pin cacain ca howa wa.

Hebreus 10:39

Ane om an xiho' xuxun oro wari' co in ca' nonon Iri' Jam ne, co to' om pin xun wawa ma'. Xi an xiho' ara xuxun co howa cara nonon Iri' Jam con Jeju Cristo ta. To' witan capari' ca' ira.

Tiago 2:26

Je ca tomi' xuhu' ca': Noro jun wari' co mi' pin ma'. Om pin iri na ca wereme ca ne, pain ca hwet ca' con tamataracon ma', taxi' ac xun na pain ca mi' pin nucun. Ac i ma' na pain ca howa nexi' quem. Mo ta om an hwet pe xin ca howa nexi' ca', mo ta om tomi' ha' xun Iri' Jam pain ca ara jein ca awi wa ta capari' ca', je pain ca xiram pa' jujun oro wari' ta capari' ca', om ca howa iri'o' iri'. Ac ca mi' pin ne na ca howa nexi' ta.

2 Pedro 2:20

Je ca tomi' xuhu' ca'. Oro wari' co witan ca' paxi' nanain oro ca to' em' nonon ma', ca maqui' nein oro ca param pan tem wa pain macan' ca', co mam' witan ca' nanain pain ca querec pin' paxi' cocon Taramaxicon nexi' Jeju Cristo co to' witan napari' cwa', mo ta in hwet cacain oro ca pan teretem wa ma', mo ta quep xat mami' tococwa, ximin tamana ac caca tara. Ximin paxi' nana pain cara pane, pain ca om querec pin' querec cocon Jeju pane. Ane ximin tamana pan caca pain ca in hwet cacain ca pan teretem nucucun ne.

2 Pedro 2:22

Oro ca ara caca ma', an xiho' nain ca tomi' joc mam' mi' taxipa' caca oro wari' ma'. Tomi' ca' nana: Cao' pin iri na oromijac ma' ne, we' pin ac cain na, in hwet ac cain na xicawiricon, cao' pin mami' ac cain na quem, ac i ma' na ca tomi' joc mam' mi' taxipa' caca ma'. Ma' na xijein quem: Ja' iri ta pain com caji mijac ne, xuc in hwet ac nein na horowa nein, ac i ma' na ca tomi' joc mam' mi' taxipa' caca oro wari' ma'.

1João 2:19

Co ari nonon Cristo pain ca noc cocon ma', cut in wi paxi' nanapari' pane, ane om iri' win ma' ne cacapari' pain ca howa nexi' con Cristo ne. Je ca paca' cacapari' pane. Mo xi iri' win ma' ne cacapari' con Cristo ma', je xi momon cut in cut in cara cacapari' quem. Ane paca' cacapari' ne. Je ca querec pin' tococwa pain ca om win ma' ne cacapari' con Cristo.

Judas 1:12

Caram ma' co caracat nana pain ca miri'om cocon Iri' Jam ma', to' i'ina nunuhu' pain ca cao' querec te wi xijexi' pain ca xere xijexi' ca' hwe ma'. Win ne ca to' i'ina cuhu' oro pacun ca om hwet pe pain iri' cwerein com ma', pain ca to' mapi' irin, ac i ma' na ca to' i'ina cucuhu' pain ca cao' querec te wi xujuhu' ma'. Om ca wixipa' camain' caca pain ca xocomu caca pain ca wata' ta wata' ta caca pain ca warao' nucucun pain ca cao' xi' caca quem. Om ca quep xiho' camain' cucuhu', quep xiho' e' xucucun. Win ne tajain nanawin ca jitacat paxi' ma', pain ca pan' ta' paxi' ne xowi' ma'. Ane om pan' ne ne, xi om ne ca nuru om pin ara nein hotowa ta. Ac i ma' na ca om quep xiho' cucuhu' ma'. Win ne oro panaji memem ca om mi ma' quem. Wara maqui' paxi' na oro xec nein ca xac xin xine ma', ane om ne winain ne. Wara cono' na, wara horohot pin ta. Taparain, panaji, caximain, horohot pi' pin ta. Ac i ma' nana caram ma' quem, ac ca wara cono' pin caca na.