Lucas 8:1 - Tradução Bíblica Pacaas Novos

¹ Om ca pain homa ne, maji ta ac ca na Jeju, mao ac cain na oro xijein cidade, je pain oro ca paric to ne xirim ma' quem, pijim' mi' ac tococwa na pain capijacon Iri' Jam pain ca taramaxicon pe ho' toton cocon ma'. Ja' ja' nonon co taxipa' ca ma', co ma' 12 nana ma'.

Lucas 8:1 Iomraidhean Croise

Mateus 11:1

Pi' pin iri na ca tomi' xo' caparut pain ca taxipa' urut con Jeju ma' ne, mao ac cain na oro xijein cidade pain Galileia. Ca' na toton pain capijacon Iri' Jam oro wari' cwain, pijim' mi' toton pain ta ac ca na.

Mateus 13:19

Oro wari' co tomi' joc mam' mi' nanain cacarain wana ca wixicaracao' to xine tocwi trigo ma', taraju paxi' nanain capijacon Iri' Jam pain ca taramaxicon pin nucun ma', ane om taraju pa' cacain ne. Maqui' ac ca na Caxicon Jam, cut ca' ac tococwa pain na oro ca wixicaracao' mi' wa pain ximicocon.

Mateus 4:23

Jeju ma', xut mao ac cain na oro xijein cidade pain Galileia ma'. Ca' na pe nain oro xirim ca cut in xucucun oro win judeu urut quem. Pijim' mi' tata pain capijacon Iri' Jam ma', pain ca taramaxicon pe ho' pin xim cuhu' Iri' Jam ta tococwa ma'. Quep xio ac tococwa na oro wari' pain oro xijein ca caxi nucucun quem.

Mateus 9:35

Maji ta ac ca na Jeju ma', mama' ac urut pain na oro xijein cidade, je pain oro ca paric to ne xirim ma' quem. Ca' na pe ac cain na oro xirim ca cut in to xujuxut pain ca judeu urut ma'. Pijim' mi' tata pain capijacon Iri' Jam pain ca taramaxicon pe ho' ton cocon ma'. Quep xio ac tococwa na oro wari' pain oro xijein ca caxi nucucun quem.

Marcos 1:39

Je ca mao mao pi' pin cain oro xijein cidade pain Galileia Jeju pane. Pijim' pe nain oro xirim ca cut in to xucucun oro win judeu urut ma', tomi' jein pin ac tococwa na oro caxicon jam nucucun oro wari' quem.

Lucas 1:80

Hwara' hwara' ac ca na pije' ma'. Ca hwara' hwara' ca ma', ca hwara' opa pin ca pain ximicon ma' quem. Pe taxipa' nain mahweri pane. Pe pe maqui' pa' ac con na xec nein ca pijim' pin cocon oro wari' pane quem.

Lucas 20:1

Maqui' ac ne na xec pain ca pe cain ca tao' caho' nein cote ne xiricon Iri' Jam Jeju. Ca' na nonon pain capijacon Iri' Jam oro wari'. Pijim' mi' nonon pain capijacon Iri' Jam ca tomi' hwet nonon pain ca to' witan toton cocon quem. Xuruxut hwet pan ac cocon na oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés cocon oro xucucun taramaxicon nucucun oro judeu ma' quem.

Lucas 4:18

Pe ho' napa' Tamataracon Iri' Jam. Xi tora' ara capa' ta. Pijim' hwet roron pain capija oro wari' co ximin nana ta napa', pijim' hwet roron pain capija ca tomi' hwet nonon pain ca to' witan ton toton ca' napa'. Oro wari' co om tococon ma', pijim' hwet roron pain napa'. To' querec pin mami' xuhu' ta nuhu' ta napa'. To' witan roron co quep em' wawa ta napa'.

Lucas 9:6

Mama' ac caca na, hwet ac cocon na oro wari' co to nanain oro ca paric to ne xirim ma', pijim' mi' ac cocon na pain ca taramaxicon pe ho' xim capari' Iri' Jam, quep xio quep xio ac cocon na co caxi nana ma' quem.

Atos 10:38

Taxi' hun Jeju co maqui' nain Nazaré, taxi' hun pain ca mi' con pain Tamataracon Iri' Jam, je pain ca mi' con pain ca hwara' opa nucun quem. Taxi' hun pain ca xut mao cain oro xijein cidade pane, pain ca tama' xiram pa' cocon oro wari', je pain ca tama' quep xio cocon oro wari' co ximin nana con Caxicon Jam quem. Ha' non Jeju pain ca ara ac i ma' ca pane, xi om ne ca pe ho' pan ara con Iri' Jam ta.

Atos 13:32

Je ca pijim' urut pahu' ca' ac tococwa na. Pijim' mi' urut pahu' pain capijacon Iri' Jam ca tomi' hwet napari' con Jeju ca', pain ca to' witan xim capari' ca'. Capijacon Iri' Jam ca wara tomi' pe mi' tococwa oro hwanana nexi' pane,

Romanos 10:15

Ma' tara ca pijim' ac tocwa wari' pain ca om mo pijim' je e' tococwa co pijim' xi' nana ra? Win ne ca xirao' pe xine pain capijacon Iri' Jam ca'. Ca' na con: Querec awi tamana na caximacocon oro wari' co mo pin nanain capija con Jeju ta, ac i ma' na ca xirao' pe nein.