Lucas 6:8 - Tradução Bíblica Pacaas Novos

⁸ Ane taxi' cocon Jeju ne, taxi' nonon pain ca coromicat ac i ma' nucucun. Tomi' ac con na co xirac micon ma': Tequi' pe ra e'. Hap ra, xat pe rain ximijaxut ca' non. Tequi' pe ac ca na, hwet ac con na pain ximijacocon.

Lucas 6:8 Iomraidhean Croise

Mateus 9:4

Ane taxi' cocon Jeju ne, taxi' pan nonon pain ca coromicat nucucun. Tomi' ac tococwa na: Para coromicat ac i ma' hwe pain xumuhu' ma' quem? Om ca awi camain' ne ca coromicat nuhu' ta.

Marcos 3:3

Tomi' ac ca na Jeju, tomi' non wari' co xirac micon: Tequi' pe ra e'. Hap ra, xat pe rain ximijaxut ca' non.

Lucas 13:12

Querec iri nam Jeju ne, hap ra ac cam na, tomi' ac cam na: Om pin nem ca caxi nem ta. Xio pin ma ta nam.

Lucas 5:22

Taxi' nonon Jeju pain ca coromicat ac i ma' caca ma'. Taxi' ximao na ximicon. Para coromicat ac i ma' hwe ma' quem ac tococwa na.

Lucas 6:9

Tomi' ac tococwa na co tocojin' nonon ma': Tomi' querec xim inuhu'. Cain' cain' xixi' pain xec nein ca xao to wa ne ca xumu wa ca' quem? Ma' ca ara je capari' Iri' Jam quem? Om ca hohot ne pain ca quep xiho' xun wari' ra? Hohot na pain ca quep em' xun ra? Om ca hohot ne pain ca to' witan xun ra? Hohot na pain ca to' pa' pin xun ra na ca tomi' querec tococwa ma'.

João 2:25

Om ca ma' xirapa' na con wari' co tomi' hwet non pain ca coromicat nucucun oro wari' quem, om na. Taxi' pan tata, taxi' ximao nain ca coromicat nucucun oro wari' ta.

João 21:17

Tomi' querec mami' ac con na quem. Je win 3 pin ne ca tomi' querec con ma': Simão, panxica João. Om ca noc mapa' na ca tomi' querec mami' con ma'. Tomi' xaxa' ac ca na Pedro. Para tama' tomi' querec capa' pain ca om ca noc mapa' capa' ca' ne? 3 pin na ca tomi' querec capa' ma' na ca coromicat nucun. Tomi' ac con na: Taxi' taxi' pi' pin main oro carawa ta Taramaxicon ne. Taxi' mapa' pain ca om noc xim ca' non. Je ca tomi' xim ca' ac con na Jeju. Querec wet roron oro wari' ne co an xiho' nanain ovelha ta non.

João 9:4

Pain ca toha toha wet ca xina cwa', na e' na pain ca ara xin ca ara je capari' Iri' Jam co hwet roron oro wari' ta napa' ma'. Xim pin ta' iri na quem. Xim pin iri na ne, om ta taramaja mami' ac iri'.

Atos 20:24

Je i ma' ira ina ta. To' pa' ma' tatarapa' ne ina. Om ca xiram pa' xije. Ma' xica' pe na carawa ca param ta' ca', param e' inain ca ara ara pi' pin wa ca taramaja ne ca ara ra capa' Taramaxicon nexi' Jeju cwa', pain ca pijim' mi' roron pain capijacon Iri' Jam oro wari' ta capa' pane. Je ca tomi' xuhu' ca', tomi' hwet toton pain capijacon Iri' Jam oro wari' ta. Tomi' hwet toton pain ca xiram pa' capari' Iri' Jam ta. Om xi xiram pa' capari', xi awi iri' ta. Ane xiram pa' e' capari' ne.

Atos 26:26

Taxi' inon taramaxicon Rei Agripa cwa', pain ca wara taraju cain oro ca tomi' hwet ta' con Jeju ca'. Je ca om hehe ta' pain ca tomi' ton ca'. Hohot na pain ca tomi' xo' ton ca', xi taxi' ara ton pain ca taxi' taxi' pi' pin cain oro ca ara non Jeju pane ta. Xi ara taparu xine con ta na.

Filipenses 1:28

Quereme jujun oro wari' co ari nunuhu' ma', ta jin' camain' huhun me. Quereme iri jujun ne, querec pin' caracan ac xucucun tara pain ca to' quiji' pin xun tococwa ma'. Querec pin' pan ac xujuhu' tara pain ca witan xi' hwe ma' quem. Wirico Iri' Jam tara co ara tain nain i ma' pahu'. Wirico pan tara co to' quiji' pin nonon, wirico pan tara co to' witan xim nuhu' ma' quem.

Hebreus 4:13

Oro carawa ca tomi' ma' pin ca Iri' Jam ma', om ca xaraxa ca' ac con. Wari' quem, om ca xaraxa ca' ac xun quem. Om ca ma' camain' ne ca mam' tatep pa' ac xijexi' con. Querec querec pi' pin napari', taxi' taxi' pi' pin nain oro ca ara iri' quem. Main maqui' tara xec pain ca tomi' hwet xun iri' pain oro ca ara iri' quem.

1Pedro 4:1

Je ca tomi' xuhu' ca'. Jain jain na Cristo pain ca wari' nucun pane, pain ca ma' ne curucun pane. Je ta wara awori xo' qui' hwe pain ca an xiho' hun pain ca coromicat nucun quem, pain ca om nain ho' pan xucun pain ca jain jain wa pane. Xi ac i ma' ara ca wari' co quereme nain ca jain jain wa pain ca caxi ne curucun ma'. Noc nain ca caracat wa ta.

Apocalipse 2:23

To' parapa' pin toton oro co an xiho' nanam ma', co ac humaxicam nana ma'. Querec pin' ac cacapa' tara oro co howa nana ma', pain ca cut in xucucun pain oro cidade ma', querec pin' tatarapa' pain ca taxi' tain oro ca coromicat nucucun oro wari' ma', je pain ca taxi' tain oro ca param nucucun ma' quem. Wahu' pain ca pan teretem hwe ma', wap wap xam' xuhu'. Win hwe pane xuhu', win ne ca ara ara hwe pane xuhu', ac i ma' tara ca wap xuhu' ta.