Lucas 24:49 - Tradução Bíblica Pacaas Novos

⁴⁹ Taraju wet xine e': Main mam' xuhu' pain Tamataracon Te ca wara tomi' pe mi' cuhu' pane. Ane na e' ne pain ca winim' cain' hwein ne. Winim' to cain' jein Jerusalém ca', aram aram hwet pa' ac cuhu' tara ca hwara' opa nucun Te co pe pawin cwain na ca tomi' tococwa ma'.

Lucas 24:49 Iomraidhean Croise

João 14:26

Ane maqui' ta' ne Tamataracon Te ca quep xiho' xim nuhu' ne, ame hwe e'. Wirico Te tara co mam' xim nuhu' pain. Pe rain maxicon Panxita' ta tarain. Ma, maqui' ac ne tara, tomi' xo' tomi' xo' pi' pin ac cuhu' tara pain oro ca iri'o' wa con Te Iri' Jam. Mam' pe wet ac cuhu' tara pain oro ca tomi' xuhu' ca' quem.

João 15:26

Hwet iri turuhu' co quep xiho' xim nuhu' ne, tomi' xo' ac cuhu' tara pain oro ca iri'o' wa con Te Iri' Jam ta ac caparut na. Tomi' inain Tamataracon Te ta, taraju pa' hwe? Maqui' toron Te. Wata' tara co mam' nuhu' pain. Tomi' hwet ac cocon tara oro wari' pata'.

Atos 1:4

Maqui' ac ne na xec nein ca cao' pe ho' tococwa pane. Tomi' xo' ac tococwa na: Ta paca' hwein Jerusalém ca' me. Winim' cain' jein Tamataracon Te ca wara tomi' pe mi' cuhu' pane, ca wara tomi' hwet xuhu' pain pane.

Atos 1:8

Na e' na pain ca taxi' hwein i ca' ta ac tococwa na. Maqui' pa' iri turuhu' Tamataracon Te ne, mi' ac cuhu' tara pain ca hwara' opa wa. Tomi' hwet ac mahu' tara cocon oro wari' ma', co to nanain Jerusalém ca', co to nanain oro xijein cidade pain Judeia ma', co to nanain oro xijein cidade pain Samaria ma', co to nanain oro xijein macan' pain pira ma' quem, tomi' hwet ac mahu' tara cocon ta. Ac i ma' na ca tomi' tococwa ma'.

Atos 16:7

Mama' xin xijein macan' ma', Mísia ma' ac caca na quem. Wixicam pin iri nanain cacarain Mísia ne, mama' xin paxi' nanain xijein macan' pain i cain, pain Bitínia cain, ane tomi' caho' mami' tococwa ne. Je Tamataracon Jeju ca tomi' caho' nonon ma'. Ta mama' hwein Bitínia me nonon, na ra ac caca na.