Lucas 23:5 - Tradução Bíblica Pacaas Novos

⁵ Om na ta ac caca na, tomi' mip nonon: Pijim' iri tata oro win ma' nuxut co to nanain Judeia cwa' ne, ta tomi' ha' mami' hun taramaxicon nucucun oro romano me ta tata, ja' teretem ja' teretem ac tococwa na. Pijim' pe cain' nain Galileia cain, mao ac ne ma' na con, aram aram pijim' pe ac cain i ca' na quem na ca tomi' cocon ma'.

Lucas 23:5 Iomraidhean Croise

Mateus 11:1

Pi' pin iri na ca tomi' xo' caparut pain ca taxipa' urut con Jeju ma' ne, mao ac cain na oro xijein cidade pain Galileia. Ca' na toton pain capijacon Iri' Jam oro wari' cwain, pijim' mi' toton pain ta ac ca na.

Mateus 2:1

Pan' pe nain Belém Jeju, pain macarain Judeia ma'. Je ca pan' pe ca pane. Pain ca taramaxicon taramaxicon wet ca Herodes pane, je ca pan' qui' ca Jeju. Om om, maqui' ac caca na caram ma' co noro taxipa' nonon oro pijo'. Maqui' nanain pira pain ca maqui' ac ca xina. Xuruxut xuruxut hwet ac cacain na Jerusalém.

Mateus 27:24

Querec pin' ac tococwa na oro wari' pain ca om ha' je na caca ma'. Querec pin' tata pain ca teretem pin xi' caca quem. Je ca tomi' con wari' nucun ma': Cam mi' ne pain com pain wijimain bacia ma'. Hohoc tain mu ta na. Querec querec xam' ac cocon na oro wari' pain ca hohoc cain micon. Tomi' ac tococwa na: Querec mahu' pain ca hohoc tain mu ca'. Je ca an hwet mi' xuhu' pain ca om hohot capa' pain ca to' pa' pin ron ta mahu' con co cwa' na ca tomi' tococwa ma'. Om ca wata' ne co em' cwa', xi param tain ca to' pa' pin tocwa ta. Wahu' co em' pan nana cwa' ira na ca tomi' tococwa ma'.

Mateus 4:23

Jeju ma', xut mao ac cain na oro xijein cidade pain Galileia ma'. Ca' na pe nain oro xirim ca cut in xucucun oro win judeu urut quem. Pijim' mi' tata pain capijacon Iri' Jam ma', pain ca taramaxicon pe ho' pin xim cuhu' Iri' Jam ta tococwa ma'. Quep xio ac tococwa na oro wari' pain oro xijein ca caxi nucucun quem.

Marcos 1:14

Tao' pe pin iri ta João ma' ne, mao ac cain na Galileia Jeju. Pijim' ac cain na capijacon Iri' Jam ca tomi' hwet napari' pain ca to' witan xim capari' ca'.

Lucas 11:53

Hwet mao iri na Jeju ne, tomi' xirac tamana ac cocon na oro fariseu cocon oro co ca' na taxipa' nanain ca xirao' nucun Moisés. Mija na ca tomi' querec ho' tomi' querec ho' cocon quem.

Lucas 23:23

Ane tomi' mip cocon ne, merem mip merem mip nonon. Tatatain mi' totoron pain pana ta, mija na ca merem ac i ma' cocon ma'. Aram aram ha' ac tococwa na quem.

Lucas 23:6

Taraju iri nain i ma' Pilatos ne, pain ca pijim' pe cain' nain Galileia cain caca ma', tomi' querec ac tococwa na: Wari' nein Galileia na ron nonon.

João 1:43

Xec pin iri na ne, mao tain Galileia ta ac ca na Jeju. Mam' ac con na Filipe. Hap ra, ja' ja' ne ac con na.

João 19:15

Ane merem caca ne: To' pa' pin ron. To' pa' pin ron. Tatatain mi' ron pain pana ta na ca merem nucucun. Cain' cain' xihwe quem? Taramaxicon ne hun ma' ira! Param mahu' pain ca tatatain mi' jun pain pana toton oro soldado ne cwa' ra? Om na, om ca taramaxicon ne urut con ta. Ma' xica' pe na taramaxicon pain Roma ta. Wirico co taramaxicon ne urut ta nonon Pilatos oro taramaxicon nucucun oro sacerdote.

João 2:11

Je win an hwet pe cain ca hwara' opa nucun Jeju pane, pain ca ara cain ca om ara taxi' ne ca wari' wa pane. An hwet pe pe nain pain Caná pain Galileia pane. Ara iri nain ne, an hwet pe ac cain na ca awi tamana nucun pain ca Iri' Jam nucun. Howa ac urut con na pain ca taxipa' urut con ca'.

João 7:41

Ma' ac caca na oro xucucun co tomi' ca' nana quem: Wirico co Cristo ta nana. Ane tomi' in pin cocon oro xucucun ma' ne. Ma' tara ca maqui' ac cain Galileia Cristo ra?

João 7:52

Cain' cain' ma quem? Ac ca maqui' main Galileia na ta! Mo xi noro tamana main capijacon Iri' Jam ma', taxi' ac ma xira pain ca om ma' camain' ca profeta co maqui' nain Galileia ta! Ac i ma' na ca tomi' in pin cocon ma'.

Atos 10:37

Taxi' hwein oro carawa ca ara to nain oro xijein cidade pain Judeia pane quem. Ara pe cain' na pain Galileia, mao ac ne ma' na pain oro xijein cidade pain Judeia. Pijim' iri na João cara pane ne, pain ca ja' je com, ma' ta querec pin' xihwe pain ca cwirin' pin hwein ca caracat nuhu' ta tococwa oro wari' pane, mao ac ne ma' na ca ara ne oro ca awi wa pane, taxi' hwein i ma' quem.

Atos 23:10

Ca tomi' in pin xucucun ma', ca tomi' in pin xucucun ma'. Mija na ca tomi' caracan xucucun pain ca mana' caracan xucucun ma'. Cuc tapiripit pin totoron Paulo xi' na comandante ma' quem. Je ca tomi' tococwa oro soldado nucun ma': Quiji' hwet jun, cuc ca' jujun con, o in qui' ac hun tara pain xirim ca to iri' ca' tata.

Atos 5:33

Taraju iri nonon oro taramaxicon ne, mana' tamana ac cocon na. To' pa' pin xuxun na nonon.

Atos 7:54

Taraju iri nonon Estêvão oro taramaxicon ma' ne, mana' tamana ac cocon na, mija na ca hwerehwet pin ne mixitacocon con. Cacacao' nanain xicocon pain ca mana' tamana nucucun quem.

Atos 7:57

Merem ac caca na: Noc urut pain ca taraju wa, tatep pa' ac cacain na taraxicocon. Jein hwet jein hwet pi' pin ac cocon na.