Lucas 22:37 - Tradução Bíblica Pacaas Novos

³⁷ Xi na ara ne pain ca hwet pin ne ca xirao' pe xine capijacon Iri' Jam ta. Ca' na ca xirao' pe nein: Ac ca caracat ca na cocon, xi to' pa' wi ara cocon cocon oro caracat ta na ca xirao' pe nein. Je ca tomi' xuhu' ca' ac tococwa na. Na e' na pain ca hwet pin ne ca xirao' pe nein pata'. Hwet pin ta' na ca xirao' pe nein pata' na ca tomi' tococwa ma'.

Lucas 22:37 Iomraidhean Croise

Marcos 15:27

Tatatain mi' iri nonon pain panaxicon Jeju ne, ma' 2 ac caca na wari' co tatatain mi' wawa pain pana ma' quem. Iri' caxicon wari' nana, cut noc xa taxipa' nana carawa. Pe nain iri' curucun xucun, pe ac cain na paraxicon xucun ma' quem.

Marcos 15:28

Ac i ma' na ca hwet pin ne ca xirao' pe xine pain capijacon Iri' Jam. Ca' na con pane: Ac ca caracat ca na cocon, xi to' pa' wi ara cocon cocon oro caracat ma' na ca xirao' pe xine con pane.

Lucas 18:31

Harahap je, xuruxut ni ca' xuxun oro wari' cwa' ac tococwa na co taxipa' ca ma', co ma' 12 nana ma', tomi' ac tococwa na: Taraju wet xine e'. Mama' xin irin Jerusalém ta. Tan' mama' iri xi' ne, hwerehwet hwerehwet pi' pin ac ne tara oro ca xirao' nucucun oro profeta cara pane, pain ca xirao' to cacain oro carawa ca ara ton napa' pain ca Iri' Wari' ta' ca'.

Lucas 22:22

Mi' pin ta' paxi' ina pain ca Iri' Wari' ta' ca'. Win ne ca wara coromicat an pe xo' cain Iri' Jam pata'. Mi' pin ta' paxi' ina. Ane ximin pan ta' ca co ma' co tomi' mi' xim napa' cocon co noc nanapa' ne, co quep xim nanapa' ma'. Ximin tara ta na ca tomi' tococwa ma'.

Lucas 22:36

Ane tomi' ni xuhu' pain xocori ca' ne ac tococwa na. Mo ta ma' cuhu' dinheiro, cut ac hwein tara. Mo ta ma' cuhu' caji coco ca mam' cut wa carawa ma' quem, cut ac hwein tara. Mo ta om cuhu' cote ne quit, vender ac hun tara to' om capin' nuhu', mam' an ac hwein tara cote ne quit quem.

Lucas 22:52

Cain' cain' xihwe quem ac tococwa na co quep xun nonon ma', wiricoco oro taramaxicon nucucun oro sacerdote cocon oro taramaxicon nucucun oro guarda co querec wet nanain cote ne xiricon Iri' Jam ma', cocon oro xucucun taramaxicon nucucun oro judeu ma' quem. Tomi' ac tococwa na: Para cut hwein cote ne quit je pana mam' wap wa ma' quem? Ac ca an noc xa taxipa' ta' carawa na pahu' ra na ca tomi' tococwa ma'.

Lucas 23:32

O mama' 2 nonon co pan teretem nana ma'. Tatatain mi' xuxun pain pana nana quem.

Lucas 24:27

Tomi' xo' ac tococwa na pain capijacon Iri' Jam ca tomi' mi' pan non ma', je pain ca xirao' pe nucun Moisés, je pain oro ca xirao' to nucucun oro profeta cara pane, tomi' xo' tomi' xo' pi' pin ac tococwa na pain oro ca xirao' pe xine capijacon Iri' Jam ca tomi' mi' non quem.

João 17:4

An hwet mi' inonon pain ca hwara' opa nem pain ca awi tamana nem pain macan' ca'. Xi om ne ca ara ara pi' pin ara tain ca taramaja ne ca ara ra mapa' ta.

2 Coríntios 5:21

Om paxi' na ca caracat ca Cristo pane, ane cut mi' pan con pain ca caracat nexi' Iri' Jam ne. Ac wari' co caracat pin ma ta non pari'. Ma' ta to' hohot pin xuhu' ta napari'. Win cwere iri jun Cristo ne, querec hohot ac xuhu' tara, ac ca om caracat camain' hwe tara con ta napari' quem.

Gálatas 3:13

Tomi' noro napari' Iri' Jam, xi tomi' ha' xo' ac xin ca xirao' nucun Moisés ta. Ane to' witan pan capari' Cristo ne, to' witan ca' napari' pain ca tomi' noro nucun Iri' Jam. Pe pan tain maxuhu', tomi' noro e' tarapa' pahu' ta napari'. Xi xirao' pe ara xine pain capijacon Iri' Jam ta: Oro wari' co to' pa' pin wawa pain ca tatatain mi' wawa pain pana ma', wiricoco co tomi' noro ca Iri' Jam ta na capijacon Iri' Jam.