Lucas 2:46 - Tradução Bíblica Pacaas Novos

⁴⁶ Xec pa' ac cacam na, xec pa' ac cacam na. Xijein xec pin iri na ne, mam' ac cocon na. Mam' pe nonon pain ca tao' caho' nein cote ne xiricon Iri' Jam. Xao pe pe nain ximijacocon oro co ca' na taxipa' nanain capijacon Iri' Jam ma'. Taraju tata pain ca ca' na cacain, tomi' querec tomi' querec ac tococwa na quem.

Lucas 2:46 Iomraidhean Croise

Mateus 12:40

Win ne pain ca corom pe cain moji cote ne hwam Jonas cara pane. Ma' 3 na xec, ma' 3 na xim quem, pain ca corom pe cain moji cote ne hwam con Iri' Jam pane. Ac i ma' ta' pain ca Iri' Wari' ta' ca' quem. Corom pe tain macan'. Ma' 3 tarapa' xec, ma' 3 tarapa' xim quem, pain ca corom pe tain macan' ta.

Mateus 16:21

Je i ma' xec nein ca tomi' xo' pin caparut Jeju pane. Tomi' xo' pin naparut pain ca taxipa' urut con ca'. Tomi' ho' tomi' ho' ac caparut na. Na e' na pain ca mao tain Jerusalém ta. Wa' mao iri tain i cain ne, quep em' ac cacapa' tara oro taramaxicon nexi' pain ca judeu iri' ca', cocon oro taramaxicon nucucun oro sacerdote cocon oro co ca' na taxipa' nanain ca xirao' nucun Moisés. To' jain jain tamana tatarapa', to' pa' pin ac cacapa' tara. Ma' 3 pin iri tarapa' xec pain ca mi' pin ne ne, e' mami' ac ta' tara ta na ca tomi' xo' caparut ma'.

Lucas 2:47

Caram ma' co taraju nonon pain ca tomi' querec ca ma', wa wa wa wa pi' pin nonon quem. Taraju pa' na xin co cwa' ne ta? Tomi' xo' na xin ne ca' nonon.

Lucas 5:17

Maqui' ac ne na xec pain ca ca' na tococwa pain capijacon Iri' Jam oro wari'. Pain ca ca' na tococwa ma', taraju nana oro fariseu cocon oro co ca' na taxipa' nanain ca xirao' nucun Moisés ma' quem. Maqui' nanain oro ca paric to ne xirim pain Galileia, je pain Judeia, maqui' nanain Jerusalém quem. Xao to to nanain i ma'. Jeju ma', pe ho' non ca hwara' opa nucun Iri' Jam quem. Je ca ha' con pain ca quep xio pin cocon oro wari' co caxi nana ma'.

João 3:10

Om ca taraju pa' ma ra ac con na Jeju. Win ne ca ca' na taxipa' momon pain capijacon Iri' Jam oro win ma' ma pain Israel ma' non.

Atos 5:34

Ane ma' ca co ma' ne, co win taramaxicon caca ma'. Gamaliel na wixicon. Fariseu na Gamaliel. Ca' na taxipa' nain ca xirao' nucun Moisés pane. In ac in ac pi' pin nonon oro wari' ma' quem. Xi om ne ca querec pin' ara cocon pain ca hwara' opa nucun. Tequi' pe ac ca na pain ca cut in to xucucun ma'. Cut hwerehwet mama' camain' jujun e' ac tococwa na oro guarda. Cut hwerehwet mama' ac tococwa na.

1 Timóteo 1:7

Tomi' ca' nana: Hu e' xuxun oro win ma' nexi' cwa'. Ca' na e' xuxun pain oro ca tomi' nucun Iri' Jam ca tomi' ha' je tococwa oro wari' con Moisés pane. Xi taraju pa' pan cacain ta. Warut co taxi' ta paxi' nana. Ane om taraju pa' camain' cacain oro ca tomi' nucun Iri' Jam ca tomi' ha' je tococwa ma' ne.