Lucas 2:34 - Tradução Bíblica Pacaas Novos

³⁴ Tomi' ac tacacama na: Param inon Iri' Jam pain ca ara mi' cuhu' pain oro ca awi wa ta tata. Taraju wet ne e' ac cam na Maria ma', jicon Jeju ma': Ma' na ca coromicat an pe xo' nucun Iri' Jam con cawinam cwa', cocon oro win ma' nexi' pain ca wari' nein Israel iri' ca'. Wirico cawinam tara co to' quiji' mija toton nonon co om howa nonon ma', to' witan mija totoron co howa nonon ma' quem, ac i ma' na ca coromicat an pe xo' nucun Iri' Jam con. Wirico Iri' Jam co mi' napari' con. Ma' ta querec pin' hwein wana ca hwet ac mahu' ta paxi' napari'. Ane ma' mija caca oro win ma' nexi' co tomi' in pin xun nonon ne. Noc urut pum ta totoron.

Lucas 2:34 Iomraidhean Croise

Mateus 11:19

Wata' pain ca Iri' Wari' ta' ca' iri na ne, cao' ina, toc inain comi uva quem. Tomi' ximama' ac mahu' na: Xocomu ma, toc tamanain pe ma, taxipa' momon oro caracat ma', oro co cut in taxipa' nanain oro imposto ma', wiricoco oro wari' co hwet taxipa' wixicocon pain ca pan teretem nucucun ma' quem, wiricoco nana co taxipa' ma ma', ac i ma' na ca tomi' ximama' mahu'. Tomi' ximama' ac i ma' paxi' maparut, ane tomi' iri'o' urut pain ca pijim' nuxut ne. Oro wari' co taraju nanapa' pain ca pijim' ne ca', mo ta querec cocon oro co xuruxut xo' nana pain ca tomi' ha' cacapa' ma', querec pin' ac cacapa' tara pain ca tomi' iri'o' ta' ca' na ca tomi' tococwa ma'.

Mateus 12:46

Tomi' tomi' wet iri nonon oro wari' Jeju ne, maqui' ac cama na jicon cocon xurucun. Hwet to nana. Tomi' xun Jeju ta ac cacama na.

Mateus 21:44

Wari' co noc pin nain pacun ca aram aram to' teren nain xirim ca', ac ca pan' hwet cain tara. To' caracat pin ac tocwa tara. Ac ca pan' hwet tocwa tara quem. Xao niri pin ac tocwa tara ta na ca tomi' tococwa ma'.

Mateus 27:63

Taramaxicon ac cocon na. Mam' pe wet urut pain ca tomi' nucun co pacara ne, co tama' mixein cara ne. Ca' na ca tomi' nucun pain ca e' e' wet nucun pane: Ma' 3 pin iri tara xec pain ca mi' pin ne ne, e' mami' ac ta' tara ta na ca tomi' mixein nucun pane.

Lucas 2:35

Querec pin' ac xine tara ca coromicat nucucun pain iri' ximicocon. Tomi' xaxa' tamana ac ma tara quem Maria. Ac ca xucun' pa' xim quem tara cote ne quit pain xumum na ca tomi' cam Maria Simeão ma'.

João 3:20

Oro wari' co caracat taxipa' nana cwa', noc nanapa' pain ca ac naran ta' ca'. Om ca wixicam jun na cacapa'. Ma' ta om querec pin' cacaparut pain ca caracat nuxut oro wari' cwa' ta nana.

João 5:18

Mana' tamana pin ac cocon na. To' pa' pin xun ta nonon. Om ca mana' e' cocon pain ca om tomi' ha' nucun pain ca taramaja cain sábado ma'. Mana' nonon pain ca Te inon Iri' Jam ta ca ma'. Iri' Jam ina xi' ma na ron, ac i ma' na ca tomi' nucucun pain ca mana' nucucun ma'.

Atos 13:45

Querec iri nana oro taramaxicon nucucun oro judeu ma' ne, pain ca maqui' mija caca oro wari' ma', mana' tamana ac caca na. Noc mi' nonon Paulo con Barnabé pain ca hwet mija pan cocon oro wari' ma'. Tomi' napat nonon, tomi' in pin nonon Paulo pain ca pijim' nucun ma' quem.

Atos 17:6

Ane om mam' tococwa ne. Je ca quep tocwa Jasom ma'. Ma' nana co win howa ca co quep wawa ma' quem, coc ororo mi' ac tococwa na cocon oro taramaxicon nein Tessalônica. Merem ac caca na: Mija a xirara caram cwa' co ja' teretem nonon oro wari' pain oro xijein cidade ca mama' caca ne. Je win hwet cacapari' pain cidade nexi' ca' quem.

Atos 24:5

Querec pin' urut con wari' cwa', Paulo cwa', querec pin' urut con pain ca iri' caxicon wari' ca ca'. Ja' teretem taxipa' nonon oro win judeu urut pain oro xijein macan'. Wirico co taramaxicon pe ho' nonon oro wari' co howa nonon co pacara pane, co maqui' nain Nazaré pane. Howa pan teretem ara xi' nana ta.

Atos 28:22

Ane taxi' urut cocon oro wari' pain oro xijein macan' ne, taxi' urut cocon pain ca tomi' napat tomi' napat xam' cocon oro win ma' nem co howa nonon Jeju ma'. Je ca taraju xim urut pum pain ca tomi' hwet maparut pain ca coromicat nem ma', pain ca howa nem con Jeju ma' na ca tomi' cocon ma'.

Atos 4:26

Mixita xi' nana oro taramaxicon nucucun oro wari' cwa'. Wara cut in xucucun. Maji mixita xun Taramaxicon Iri' Jam. Maji mixita xun Cristo ta xucucun. Ac i ma' na ca tomi' ca hwanana nuxut Davi cara pane ta Coturut Iri' Jam.

Atos 6:7

Pijim' pijim' tiquin' ac cacain na capijacon Iri' Jam pane. Ca pijim' pijim' tiquin' caca ma', ca pijim' pijim' tiquin' caca ma', aram aram mija pin ac caca na oro wari' co taraju nanain capijacon Iri' Jam. Ma' mija hap nana co howa pin nonon Jeju pain Jerusalém ma'. Oro sacerdote ma' quem, ma' mija nana co howa pin nana quem.

Romanos 9:32

Para om hohot cocon quem? Xi howa cocon Jeju ta. Tomi' querec te tarapari' Iri' Jam ta, xi om ne ca tomi' ha' ara xun ca', ac i ma' na ca coromicat nucucun. Coromicat ca' xirara quem, tomi' querec te tarapari' Iri' Jam ta, xi om ne ca howa ara xun Jeju ta, ac i ma' xira ca coromicat nucucun. Ane om howa cocon Jeju Cristo co an xiho' nain pacun ca xut tao' pan' non wari' ma'. Ac ca xut tao' camara' tococwa na.

1 Coríntios 1:23

Warut iri na ne, pijim' hwet urut cocon oro wari' con Cristo co tatatain mi' wa pain pana pane. Pain ca pijim' mi' urut cocon oro judeu ma', noc nanain ca pijim' nuxut. Pain ca pijim' mi' urut cocon oro wari' co om judeu nana ma', pijim' ximama' hwe ta ac ca cacaparut na quem.

Hebreus 7:1

Melquisedeque cara pane, wirico co taramaxicon pe ho' nonon oro wari' co to nanain Salém. Sacerdote na quem, taramaja mi' non Iri' Jam co Iri' Taramaxicon pan. In qui' iri na Abraão cocon oro wari' nucun pane ne, pain ca mixita qui' cocon oro taramaxicon pain ca to' quiji' qui' cocon pane, xut hwet pan ac con na Melquisedeque, tomi' mi' ac con na con Iri' Jam. Xiram pa' ron, ara mi' ron pain oro ca awi wa ta non.

Hebreus 7:7

Taxi' irin i ca', pain ca om hwara' opa homa ca wari' co tomi' mi' wa con Iri' Jam ma'. Hwara' opa pan na wari' co tomi' mi' non con.

1Pedro 4:14

Tomi' xirac iri nunuhu' oro wari' pain ca howa hun Cristo ne, param mi' ac cuhu' na pain ca awi wa Iri' Jam. Xi querec pin' ara xihwe pain ca corom pe ho' cara cuhu' Tamataracon Iri' Jam ca awi tamana ta.