Lucas 19:13 - Tradução Bíblica Pacaas Novos

¹³ Mao ta' iri na ne, tomi' mam' ac tococwa na co taramaja mi' e' nonon ma'. Ma' 10 nana co harahap je ca ma'. Mi' ac tococwa na pain moeda nein ouro. Mi' xica' pe mi' xica' pe xam' tata pain. Tomi' ac tococwa na: Mam' taramaja xo' jein dinheiro ca mi' xuhu' ca'. Mam' taramaja mam' taramaja, aram aram in hwet ac xuhu' tara pain ca wara mam' taramaja hwara' pin hwein ta tata. Mao ac ca na.

Lucas 19:13 Iomraidhean Croise

Mateus 25:16

Co cut 5 nain moeda nein prata ma', mao hap ac ca na, cut tamana ac cain na oro carawa, vender tiquin' ac cain na, aram aram moin' pin ac ne na con, cut 5 mami' ac cain na moeda nein prata.

Mateus 25:20

Co cut 5 nain moeda nein prata pane, xut hwet ac con na, cut mi' ac con na pain oro xijein moeda nein prata ca cut mami' ca ma'. Noro ra taramaxicon ac con na. Cut mi' 5 mapa' pain moeda nein prata pane ira. Mam' taramaja ac tain na, cut 5 mami' ac tain na quem na ca tomi' con ma'.

Mateus 25:22

Co cut 2 nain moeda nein prata pane, xut hwet ac con na quem. Noro ra taramaxicon ac con na. Cut mi' 2 mapa' pain moeda nein prata pane ira. Mam' taramaja ac tain na, cut 2 mami' ac tain na quem na ca tomi' con ma'.

Mateus 25:24

Xut hwet ac con na co an xica' pe e' nain moeda nein prata. Tomi' ac con na: Taxi' inem pain ca om xiram pa' taxi' momon oro wari' ta taramaxicon. An xiho' mon wari' co cut taxipa' nain oro memem ca om oin' ca ma'. An xiho' mon wari' co top nain caramaji totacon xucun wari' ma' quem na ca tomi' ximao nucun.

Lucas 19:12

Ca' na ca pijim' nucun: Ma' na wari' co hwara' opa ma'. Hwet ton iri' taramaxicon pain xijein macan' pain pira ta ac ca na. Ma' ta mi' capa' pain ca taramaxicon pe ho' toton oro win ma' ne cwa' ta na. Taramaxicon pin iri ta' ne, in qui' ac ta' tara ta na.

Lucas 19:14

Ane noc cocon oro win ma' ca ne. Noc nonon pain ca taramaxicon pin ta' ca ma'. Je ca tomi' xo' xucucun: Tora' paric xuxun oro win ma' nexi' cwa'. Hwet ac cocon tara iri' taramaxicon cwain, tomi' ac cocon tara: Noc urut con pain ca taramaxicon pe ho' caparut win ma' nuxut pum ta totoron, tomi' ac i ma' totoron iri' taramaxicon cwain ta nana.

João 12:26

Wari' co taramaja mi' xim napa' ma', na e' na pain ca ja' ja' cara capa'. Oro ca mao ne ca', je tara ca mao ca quem, pe ho' tarapa' quem. Wari' co taramaja mi' napa' ma', tomi' querec te ac tocwa tara, hohot ma ta ac tocwa tara. Wirico Te tara co hohot ma pan ton non ta na ca tomi' tococwa ma'.

Gálatas 1:10

Cain' ca coromicat mi' mahu' pain ca xirao' mi' ac i ca' xuhu' ca' quem? Tomi' querec te xirarapa' na nonon oro wari' ta mahu' ra, ac i ma' na ca coromicat mi' mahu' quem? Om na ta! Tomi' querec te pan xirapa' Iri' Jam na ina. Mo xi win xumu toton oro wari' pain ca tomi' querec te pan tatarapa' ta toton ca', mo xi coromicat ac i ma' ta', om xi ha' capa' pain ca taramaja mi' ton Cristo. Taramaja mi' e' xitoton oro wari'.

Tiago 1:1

Tiago ina pain ca xirao' mi' xuhu' ca'. Taramaja mi' e' inon Iri' Jam con Taramaxicon nexi' Jeju Cristo. Xirao' mi' inuhu' pain ca judeu iri' ca', pain ca wawaran to hwein oro xijein macan' ma'. Tomi' querec te inuhu' ta.

2 Pedro 1:1

Simão Pedro ina pain ca xirao' mi' xuhu' ca'. Taramaja mi' inon Jeju Cristo. Apóstolo ra napa' pain ca tomi' hwet roron pain capija oro wari' capa' pane. Xirao' mi' inuhu' pain ca win ma' ne xijexi' pain ca howa xun Jeju Cristo. Wirico co Iri' Jam ne iri' cwa', co to' witan napari' cwa'. Om ca tomi' querec te paxica' capari', mi' mi' pi' pin napari' pain ca howa xun ca'. An an ari xijein ca howa nexi' quem.