Lucas 18:39 - Tradução Bíblica Pacaas Novos

³⁹ Oro wari' co o nana ma', tomi' in pin ac cocon na. Merem maho' ra ta paxi' nonon, ane om ha' ca ne. Merem merem tiquin' na, merem mip na: Winacon Davi. Xiram pa' ne ta Winacon Davi na ca merem nucun.

Lucas 18:39 Iomraidhean Croise

Mateus 7:7

Tama' mi' ne jun pain oro ca param nuhu' Iri' Jam ta ac tococwa na. Mi' ac cuhu' pain tara. Tama' pirao' jein carawa ca param hwe con. Mam' ac hwein con tara. Tama' tomi' jun pain ca quep xiho' xut ta hun ma' quem. Ac ca tataca hwein tara pana ca mam' tao' pa' nein manain xiricon ma', ac ca pa xat mi' cuhu' pain tara quem. Quep xiho' ac cuhu' tara quem.

Mateus 8:26

Cain' cain' xihwe quem ac tococwa na. Para jin' tamana hwe ma' quem? Howa wijimain e' mahu' ra tata. Tequi' pe pin ac ca na, tomi' in pin ac cain na hotowa pain ca wap tamana nein com. Nuru nuru om pin ac ne na, tacana pe pin ac ne na com ma' quem.

Mateus 9:27

Mao ta' ta iri na Jeju ne, ja' ja' ac cocon na caram ma' co om tococon. Ma' 2 nana. Merem ac caca na: Xiram pa' xut ta Winacon Davi na ca merem nucucun ma'.

Lucas 11:52

Wa inuhu' me oro co tomi' xo' taxi' nanain oro ca xirao' nucun Moisés ac tococwa na. Ximin hwe ta. Wap tamana turuhu' Iri' Jam. Ma' paxi' nuhu' capijacon Iri' Jam ca iri'o'. Ane om howa hwein ne. Narain ho' huhun pain oro wari' quem. An xiho' hun wari' co pe ho' paxi' non mam' pa xine manain xirim ma', co om pa rain na ca ma' quem. Noc nain ca corom wa, narain ho' tata pain ca corom wa oro wari' co corom xi' nana ma' quem na ca tomi' tococwa ma'.

Lucas 18:1

Pijim' ac tococwa na co taxipa' ca ma'. Pijim' joc mam' mi' tata cam narima' co tomi' ho' tomi' ho' non juiz pain carawa ca param cama ma'. Pijim' joc mam' mi' tata cam, ma' ta taraju pa' hwe pain ca na e' ne pain ca tomi' ho' tomi' ho' hun Iri' Jam ta tata. Ta naro camain' hwe pain ca tomi' ho' tomi' ho' hun me tata.

Lucas 18:15

Ma' ac cacama na co o qui' nanam humaxicacam. O mi' nanam con Jeju. Ma' ta quep mamam pain winacacam pain ca tomi' mi' mamam con Iri' Jam ta nonon. Querec iri nanam co taxipa' ca ma' ne, pain ca o qui' cacam humaxicacam ma', tomi' in pin ac cacam na. Ta o mi' hun cacam humajuhu' me ta nanam.

Lucas 18:38

Merem pan ac ca na: Jeju. Winacon Davi. Xiram pa' ne ta Jeju na ca merem nucun.

Lucas 18:40

Xat ac ca na Jeju. O mi' xine con ta ac tococwa na. Wixicam pin iri non ne, tomi' querec pan ac con na Jeju:

Lucas 19:39

Ma' nana oro fariseu co coco' to ho' nonon oro wari' ma' quem. Tomi' ac cocon na Jeju: Taramaxicon co ca' na taxipa' capijacon Iri' Jam. Tomi' in pin ximomon co taxipa' ma ta nonon. Om ara xi' na ca taraju hohot cocon ca taramaxicon ma ta cocon Jeju ta.

Lucas 8:49

Tomi' tomi' wet nam narima' ma', maqui' ac ca na wari', maqui' nain xiricon Jairo ma', co querec wet nonon oro win judeu ca pain xirim ca cut in to xucucun ma'. Mi' pin na panxima ta ac con na. Ta hap ra mami' mon Taramaxicon co ca' na taxipa' capijacon Iri' Jam me ta non.

2 Coríntios 12:8

Tomi' paxi' inon Taramaxicon nexi' pain ca an ca' ne pain ca caxi ne quem ton ca'. Ma' 3 na ca tomi' mip ton ca'.