Lucas 17:6 - Tradução Bíblica Pacaas Novos

⁶ Je i ma' ira ac tococwa na. Noro jein wijimain tocwi mostarda ma'. Iri' wijimain na. Iri' wijimain ac i ma' paxi' tara ca howa nuhu' quem. Je i ma' ira, mo ta howa wijimain e' mahu', ha' ac cuhu' tara pain ca tomi' ca' hwein pana ma': Hot pin xijem, oin' pe xijem pain cote ne com ta, ac i ma' tara ca tomi' hwein. Tomi' ha' ac cuhu' tara quem na ca tomi' tococwa ma'.

Lucas 17:6 Iomraidhean Croise

Mateus 14:29

Hap ra ta ac con na. Quiji' ca' ac cain na mam' horoho wa ma', xut mao ac cain na quimain com. Xut hwet ton paxi' na ira.

Mateus 17:20

Xi howa homa mahu' ta ac caparut na. Je ca tomi' xuhu' ca', tomi' iri'o' inuhu': Noro jein wijimain tocwi mostarda ma'. Iri' wijimain na. Iri' wijimain ac i ma' paxi' tara ca howa nuhu' quem. Je i ma' ira, mo ta howa wijimain e' mahu', ha' ac cuhu' tara pain ca tomi' ca' hwein cote ne pacun ca': Ju in mao rain i cain, ac i ma' tara ca tomi' hwein. Ju in mao ac nein i cain tara quem. Mo ta howa ac i ma' mahu', ha' ha' xam' turuhu' oro carawa ta na ca tomi' caparut ma'.

Mateus 21:21

Je ca tomi' xuhu' ca', tomi' iri'o' inuhu' ta ac caparut na. Mo ta howa hun Iri' Jam pain ca ha' con pain ca ara cain ca wajim' hun ma'. Mo ta om tara con ta'a camain' hun. Ha' ac cuhu' tara pain ca ara hwein ca ara mi' tain panaji figo ca'. Om ta xica' pe ne i ma' quem. Mo ta tomi' ca' hwein cote ne pacun ma': Tequi' pe ra ta, xin pocom pan xijem pain cote ne com cain, mo ta tomi' ac i ma' hwein. Ha' ac cuhu' tara, tequi' pe ac ne tara, xin pocom pan ac xijein tara pain cote ne com.

Marcos 4:31

Carawa ca ara ne ma', pain ca taramaxicon pe ho' cocon oro wari' Iri' Jam ma', an xiho' nain carawa ca ara nain wijimain tocwi mostarda ma'. Iri' wijimain na tocwi mostarda. Om na xijein tocwi memem ca an xiho' nain oro ca oin' to iri' pain totaxi'.

Marcos 9:23

Mo ta ha' quem mapa' ra ac con na. Cain' cain' xima quem? Om na carawa ca tanacam' napa' pain ca howa mapa' ta na ca tomi' con ma'.

Lucas 13:19

Carawa ca ara ne ma', pain ca taramaxicon pe ho' cocon oro wari' Iri' Jam ma', an xiho' nain carawa ca ara nain wijimain tocwi mostarda ma', ca oin' pe cain totacon wari' ma'. Ca hwara' hwara' ne ma', ca hwara' hwara' ne ma', hwara' pin ac ne na, aram aram cote ne pana pin ac ne na. Quep pe ac nein na xirinain pain oro taparain me quem.

Lucas 17:7

Je ca tomi' xuhu' ca' ac tococwa na, tomi' inem pain ca ma' ca wari' co taramaja mi' e' nem ma'. Am taramaja pe cain totam, am querec wet cain ovelha nem. Pi' pin iri tara ca taramaja nucun ne, in qui' iri tarain xirim ne, tomi' ac i ca' ton ma ra: Hap ra, xao pe rain i ca', cao' ra, ac i ma' tara ca tomi' mon ra?

Lucas 19:4

Je ca mo tiquin' mao cain wana ca mao ta' ca Jeju ma', piri' pe ac cain na caji panaji figo ma'. Ma' ta ha' capa' pain ca querec ton ca', pain ca xut tiquin' ca' capa' pain wana ca' na ca coromicat nucun.

Lucas 7:13

Querec iri nam Taramaxicon nexi' ne, xiram pa' ac cam na. Ta aca ma me ta nam.

Lucas 7:19

Mo hwet jun Taramaxicon nexi' ta ac tococwa na. Tomi' querec ca' jun: Wum tara co wara tomi' pe ca Iri' Jam pane, co main maqui' tara ta ca pane ra? Winim' jun xucun maparut ra? Ac i ma' tara ca tomi' querec hun ta tata.

1 Coríntios 13:2

Mi' paxi' tarapa' pain ca pijim' hwet taxi' tain capijacon Iri' Jam ma'. Mi' paxi' tarapa' pain ca taraju pa' taraju pa' pi' pin tain oro capijacon ca om an hwet querec ca ma'. Mi' paxi' tarapa' pain ca taraju pa' taraju pa' pi' pin tain oro ca coromicat nucun quem. Howa tamana paxi' ton pain ca ha' capa' cote ne pacun pain ca tomi' pe ni pin tain ta' ca'. Mo ta om an xiho' ton Iri' Jam pain ca om noc capari' ca', je pain ca om noc cocon oro wari' ma' quem, ac caxicon pije' ma ta ac capa' tara quem.