Lucas 16:8 - Tradução Bíblica Pacaas Novos

⁸ Taramaxicon nucun ma', taxi' pin iri non pain ca mixein ca ne pain ca waraju cain caramaxicon ma', he ac con na. In ac non quem. Om ca in ac con pain ca mixein nucun. In ac non pain ca ma' ne ximicon ma', pain ca wara coromicat an pe xo' nucun pain ca main quep xiho' tatarapa' oro win ma' ne pain ca aram aram ximin ta' ca ma' na ca pijim' tococwa ma'. Tomi' ac tococwa na: Ac i ma' taxipa' nana oro wari' co om howa nonon Iri' Jam. Coromicat xo' tiquin' ca' nonon oro wari' co howa nana cwa', ma' tiquin' ca' nonon pain ca xumu wa pain ca wara coromicat an pe xo' taxi' nucucun ma', pain ca to' querec pin' cocon oro win ma' caca co aram aram quep xiho' xun nonon pain ca ximin nucucun ma'.

Lucas 16:8 Iomraidhean Croise

Mateus 12:32

Wari' co tomi' napat napa' pain ca Iri' Wari' ta' ca' quem, xic am pin ac xine tara ca caracat nucun. Wari' co tomi' napat nain Tamataracon Iri' Jam ma' iri na ne, om ta xic am pin camain' xine ca caracat nucun ta. Om om tara, om tara pain oro xec nexi' ca', om om tara pain oro xec ca maqui' ta' ma' quem na ca tomi' tococwa ma'.

Mateus 17:26

Pagar jein tata oro xucucun wari' ta ac ca na Pedro. Awi na ca tomi' nem ma' ac con na.

Lucas 16:10

Wari' co taramaja xo' ma', co querec wet xo' nain wijimain carawa ma', taramaja xo' tara pain ca querec wet xo' cain cote ne carawa quem ac tococwa na. Wari' co om taramaja xo' ma' iri na ne, pain ca querec wet mixein cain wijimain carawa ma', om ta taramaja xo' ca pain ca querec wet mixein cain cote ne carawa ma' quem.

Lucas 16:4

Coromicat xo' ac ca na. Na xin ne ac ca na, taxi' pin inain carawa ca ara ta' ta' ca', ma' ta mija pin cacapa' oro wari' co xiram pa' xim nanapa' pain ca ximin ta' ta' ca'. Maqui' pin iri tara xec nein ca om taramaja mi' mami' ac ton taramaxicon ne cwa' ne, tomi' querec te ac cacapa' tara, pe ho' xut pain xuruxut ca' ac cacapa' tara, quep xiho' ac cacapa' tara quem na ca tomi' xucun ma'.

Lucas 16:7

Tomi' querec ac con na xucun ma' quem: Wum quem? Ma' carawa ca dever mon taramaxicon ne quem non. Om na, dever 100 inon pain cote ne cotain trigo ta ac ca na. Om na, je i ca' ca xirao' nein ca dever mon ca' ac con na. Xirao' ni rain, dever 80 inon pain cote ne cotain trigo ta rain con na ca tomi' con ma'.

Lucas 18:6

Tomi' tomi' tiquin' ac ca na Taramaxicon nexi': Noro jein ca tomi' nucun juiz co mixein ma'.

Lucas 20:34

Tomi' ac tococwa na: Oro wari' pain oro xec nein ca e' e' wet nexi' pain macan' ca', cut taxipa' nana narima'. Ca narima' nequequem ma' quem, cut taxipa' nana tarama' quem.

Lucas 20:35

Ane om ac i ma' ne pain ca aram aram e' mami' xi' caca co wara cono' nana ne. Oro wari' co querec hohot ca Iri' Jam ma', pain ca hohot na pain ca to ho' mahu' pain pawin ca' ca ma', om ta cut caca narima'. Ca narima' nequequem ma', om ta cut cacama tarama' quem.

João 12:36

Howa xine pain ca ac iri' naran ta' ca', pain ca pe ho' pe ho' wet xuhu' ca'. Ma' ta an xiho' mahu' pain ca ac iri' naran ta' ca' quem inuhu' ta na ca tomi' tococwa ma'. Tomi' iri nain i ma' Jeju ne, mao ac ca na, pe ni ca' ac tococwa na oro wari'.

1 Coríntios 3:18

Ma' tara xumuhu' me, coromicat xo' je. Howa maho' jein oro ca coromicat ximama' nuhu' ma'. Mo ta ma' ca win ma' nuhu' co taraju pa' ina xi' ma ma', pain ca an xiho' cain ca coromicat nucucun oro wari' co om howa nonon Iri' Jam ma', na e' na pain ca an pe pin cain ca coromicat ximao nucun. Ac ca an xiho' pin tococwa tara co tamanain nana ta caca oro wari' co om howa nonon Iri' Jam ma'. Taraju pa' iri'o' pin ac ca tara quem.

Efésios 5:8

To paxi' hwein ca jitacat nein pane, pain ca om querec pin' querec hun Iri' Jam pane. Ane to pin hwein xec pain xocori ca' ne. Xi om ne ca win cwere pin ara hun Taramaxicon nexi' ta. Je ca tomi' xuhu' ca': Xuruxut xo' je. Win caca oro wari' co to nanain xec ma'.

Filipenses 3:19

Mama' tatarain cote ne xe, xi om ne ca win xumu ara cacain ca param pan nucucun ta. Ac ca iri' jam ne cacain na ca param pan nucucun. Xec xec nana pain ca pan teretem nucucun, xi wixipa' pan caca pain ta. Coromicat e' nanain oro caramaji macan'.

1 Tessalonicenses 5:5

Wahu' pain ca howa hun Taramaxicon nexi' ma', xuruxut xo' xuruxut xo' pi' pin hwe, ara xo' ara xo' pi' pin hwe. Ac ca to hwein na naran nucun Iri' Jam ma', ac wari' nein xec hwe. Om ca an xiho' xun wari' co pan tem ma', co ac ca xut cain na ca jitacat nein xim.

1Pedro 2:9

Wahu' iri na ne, tora' nuhu' Iri' Jam pain ca wari' ne cuhu' ma'. Ac sacerdote nucun pin hwe pain ca taramaja mi' hun pain ca Iri' Taramaxicon ca ma'. Xica' pe na Iri' Jam co wari' ne nuhu'. Ma' ta tomi' hwet huhun oro wari' pain ca hwara' opa tamana ne ca', pain ca ara mi' toton pain oro ca awi wa ca' nuhu'. Wirico co hwerehwet ca' jein ca jitacat nein xim ta nuhu' pane, wirico co wixicam pin xine pain naran ne ca awi tamana ca' nuhu' pane quem.

1João 3:10

Je i ca' ca to' querec pin' napari' ca jimama' ca' xucucun mana panxica Iri' Jam cocon mana panxica Caxicon Jam: Wari' co om ara xo' taxipa' ma', co noc non win howa ca ma' quem, om ca panxica Iri' Jam ca co ma'.