Lucas 16:2 - Tradução Bíblica Pacaas Novos

² Hap ra ta ac con na, tomi' querec ac con na: Cain' cain' xima quem? Tomi' hwet nanapa' pain ca waraju main caramaju ca'! Cut qui' rain papel ca xirao' pe main oro ca taramaja nem pain dinheiro ne ma', pain ca waraju main oro caramaju ca'. Xi na ne pain ca querec wet mami' main caramaju ta non.

Lucas 16:2 Iomraidhean Croise

Mateus 12:36

Ane tomi' pan xuhu' pain i ca' ne, tomi' iri'o' inuhu' ta ac tococwa na. Maqui' iri tara xec nein ca wap toton oro wari' pain ca caracat nucucun ta na Iri' Jam ne, tomi' ac tococwa tara: Para tomi' ximama' hwe pane, tomi' hwet xine pain oro ca tomi' ximama' nuhu' cara pane, ac i ma' tara ca tomi' tococwa.

Mateus 20:8

Irawin pin iri na ne, tomi' ac con na co querec wet taxipa' nain caramaxicon. Harahap je roron co taramaja to nanain tota ma'. Pagar roron pain ca taramaja nucucun. Pagar cain' roron co xo' tomi' ta' pain irawin ca' ne, pagar ac momon tara oro xucucun, aram aram hwet ac momon tara co wara tomi' cain' ta' pain xo' xec cara ne, pagar pi' pin ac momon tara quem na ca tomi' con ma'.

Lucas 12:20

Ac i ma' paxi' na ca coromicat nucun, ane tomi' ca' con Iri' Jam ne: Mi' pin ho' ra ta inem ta tamanain co om coromicat xo'. Mi' pin ho' ra pain xim ca'. Ma' xi wari' co cut tain nain oro caramajum ca an to xo' ta' ma ma' quem, ac i ma' na ca tomi' con ma'.

Lucas 12:42

Na e' na pain ca an xiho' hun wari' co taramaja xo' ma', co coromicat xo' pain ca querec wet cain caramaxicon taramaxicon nucun ta ac tococwa na. Mao tain pira iri na taramaxicon nucun ne, tomi' mam' ac con na: Querec wet roron oro win ma' ma co taramaja mi' e' nanapa' cwa', querec wet xo' roron pa'ao'. Mi' xo' roron pain carawa ca cao' wa quem na ca tomi' mam' con ma'.

Lucas 16:1

Tomi' pan ac cocon na co taxipa' ca Jeju: Ma' na wari' co querec wet nain caramaxicon taramaxicon co caramaju. Aram aram maqui' ac ne na xec nein ca tomi' em' tocwa pain ca om taramaja xo' ca. Waraju nain caramajum ta nonon taramaxicon oro wari'.

Lucas 16:3

Noc pin napa' pain ca taramaja mi' mami' ton taramaxicon ne cwa' ac xucun na co querec wet nain caramaxicon ma'. Cain' cain' xita' quem ac xucun na. Om ca taramaja ac ta' pain xitot, xi hwara' opa ta' ta. Wixipa' xita' pain ca tama' mi' xine toton pain dinheiro je oro carawa oro wari' ma' quem, ac i ma' na ca coromicat pan xucun.

Romanos 14:12

Je ca tomi' xuhu' ca': Tomi' xo' iri tarapari' Iri' Jam pain oro carawa ca ara iri' pain macan' ca' ne. Tomi' tomi' pi' pin ac xun tara pain iri' menexi'. Ca' na ca ara ta' pane, ca' na ca pan tem ta' pane, xic xic pi' pin xin con, ac i ma' tara pain ca tomi' hwet tomi' hwet pi' pin xun pain iri' menexi' ca ara pan iri' pain ca e' e' wet nexi'.

1 Coríntios 1:11

Tomi' hwet ara xi' nanapa' wari' nequem Cloe pahu' xere. Tomi' mana' caracan xucucun ta nanapa' pahu'.

1 Coríntios 4:2

Wari' co taramaja mi' non taramaxicon ma', na e' na pain ca taramaja xo' ca. Na e' na pain ca tomi' ha' cara con ta.

1 Coríntios 4:5

Je ca tomi' xuhu' ca': Ta tomi' em' hap huhun pain ca taramaja nucucun oro wari' me ta. Winim' jein xec nein ca in qui' ta ca Taramaxicon nexi'. Wirico tara co an hwet pin tain nain oro ca coromicat nucucun oro wari' ca joc xim caca ira. Para taramaja mi' cocon Cristo quem? Om na, wirico tara co to' querec pin' napari' pain oro ca coromicat nucucun pain ca taramaja mi' cocon ma'. Wirico tara co tomi' nonon oro wari' co taramaja xo' nana. Mo ta taramaja xo' caca pain ca e' e' wet nucucun pane, hohot ma ta ac cocon tara, taramaja xo' ma ma' ira ac cocon tara, tomi' tomi' xam' ac cocon tara ta.

2 Coríntios 5:10

Xi na e' ara ne pain ca main coco' quima hwet xun Cristo ta. Coco' quima hwet coco' quima hwet pi' pin xun, tomi' xo' ac capari' tara pain oro ca ara iri' pain ca e' e' wet nexi' ca'. Mi' mi' xam' ac capari' tara pain oro carawa ca taramaja mi' iri' ca'. Wari' co ara nain oro ca awi wa, mi' ac tocwa tara pain ca awi wa. Wari' co ara nain oro ca om awi wa ma' iri tara ne, mi' ac tocwa tara pain ca om awi wa quem.

1 Timóteo 4:14

Ta miri'om main ca taramaja nem ca mi' quem Tamataracon Iri' Jam pain ca quep qui' quequem pain winam xerexi' co querec wet nonon co howa nana pane. Quep iri nenem pain winam ne, wara tomi' pe ac quequem na pain ca taramaja nem co pijim' nanain capijacon Iri' Jam pane.

1 Timóteo 5:24

Je ca tomi' xim cocon wari' co quep tain main winacocon pain ca taramaja nucucun ma', tomi' querec ac tococwa tara. Ma' tara xumum me, ta quep hap main winacocon me. Ma' ara xi' nana wari' co wara querec pin' wawa pain ca caracat nucucun ma'. Wara querec pin' tata pain ca om tomi' xo' querec tococwa pain carawa ca ara caca ma'. Oro xucucun iri nana ne, om ca querec pin' hap tococwa pain ca caracat nucucun ma'. Joc xim nanain. Ame ma e', main taxi' ac tococwa tara pain ca tomi' xo' xun tococwa pain carawa ca ara caca ma'.

1Pedro 4:10

Wara mi' mi' xam' nuhu' pain oro xijein ca taramaja taxi' wa Iri' Jam. Je ta ara xo' qui' hwein ta. Mam' quep xiho' caracan ac xujuhu' tara pain oro ca taramaja taxi' wa ca mi' cuhu' ma'.

1Pedro 4:5

Je i ma' ira, ame hwe e'. Main maqui' tara xec nein ca coco' quima hwet xun cocon Iri' Jam co wara awori xo' ma', pain ca tomi' xo' xun tococwa pain oro carawa ca ara caca ma'. Co e' e' wet nana ma', co wara cono' nana ma' quem, wap wap ac tococwa tara ta.

Apocalipse 20:12

Querec inonon co wara cono' nana ma' quem. Co hwara' opa nana ma', co om hwara' opa nana ma' quem, querec inonon pain ca coco' quima hwet cacain ca mam' xao pe nucun. Pa ac xine na oro tapari carawa ca xirao' to xine oro ca ara caca pain ca e' e' wet nucucun pane. Pa ac xine na wirain tapari carawa ca xirao' to xine wixicocon oro wari' co e' cara xi' nana quem. Noro iri ta ca xirao' to xine oro ca ara nucucun ne, win ne ca ara hwe pane ac tococwa na, wap wap ac tococwa na.