Lucas 13:28 - Tradução Bíblica Pacaas Novos

²⁸ Tomi' ac tococwa tara: Querec pira iri jun Abraão con Isaque con Jacó cocon oro profeta cara pane ne, querec pira iri jujun pain ca corom to cacain ca taramaxicon pe ca Iri' Jam ne, awaran tamana ac hwe tara, cacacao' ac hwein tara xuhu' pain ca jain jain tamana nuhu' quem. Xi narain ho' xun ara xihwe pain ca corom to wa ta. Hwet to cara ac hwe ma' tara ta.

Lucas 13:28 Iomraidhean Croise

Mateus 13:42

Wixicaracao' mi' ac tococwa tara pain cote ne xe. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun.

Mateus 13:50

Co pan teretem nana ma', wixicaracao' mi' ac tococwa tara pain cote ne xe. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun. Ac i ma' na ca pijim' joc mam' mi' caparut pain caji wi ca mam' quep wa hwam pane.

Mateus 22:13

Tomi' ac tococwa na wari' nucun co taramaja mi' e' nonon ma'. Tucu jein caximacon co cwa' ta, tucu jein micon ma' quem. Xin hwet mi' jun pain ca jitacat nein cain. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun ta na ca tomi' tococwa ma'. Ac i ma' na taramaxicon co tomi' nonon oro wari' pain ca cao' querec te wi xijexi' con panxita' co an ta' narima' ca ma'.

Mateus 24:51

Wap tamana ac tocwa tara, mao rain ca to pan caca oro wari' co ac ca iri'o' xi' ca' tara me nana ma' ac tocwa tara quem. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun na ca tomi' caparut pane.

Mateus 25:30

Tomi' ac tococwa na oro xucucun co taramaja mi' e' nonon ma'. Co cwa' co jam' curucun cwa', pain ca noc cain ca taramaja wa ca', xin mi' jun pain ca jitacat tamana nein cain. Oro wari' co jain jain to nanain i cain, awaran tamana ac caca tara, cacacao' ac cacain tara xicocon pain ca jain jain tamana nucucun ta. Ac i ma' na cocon oro wari' co taramaja mi' e' nonon taramaxicon nucucun ma' na ca pijim' caparut Jeju pane.

Lucas 10:15

Wahu' quem oro wari' co to nanain Cafarnaum ma'. Xec xec a xihwe! Awi urut, querec pin' taraparut pain ca awi nuxut xi' ma hun Iri' Jam ra? Om na ta! Wixicaracao' mi' turuhu' pain cote ne xe ta na ca tomi' tococwa ma'.

Lucas 14:15

Wari' co cao' pe ho' nonon pain pana ca mam' cao' to caca ma', taraju iri non Jeju pain ca tomi' ac i ma' ca ma' ne, tomi' ac con na: Param mi' tata pain ca awi wa oro wari' co cao' to ho' xun nonon Iri' Jam pain pana ca mam' cao' pe nucun ma', co cao' querec te xi' e' ca pain ca taramaxicon pe nucun ta non.

Lucas 16:23

Jain jain pe pan ac cain na cote ne xe quem. Mija na ca jain jain ca. Querec pira ac con na Abraão. Querec pira non Lázaro pain ca pe ho' con quem.

2 Tessalonicenses 1:5

Oro ca ara nuhu' ma', je ca to' querec pin' cuhu' con Iri' Jam ma', pain ca hohot hohot pi' pin ne oro ca ara nucun ma', pain ca mi' toton cocon pain oro ca taramaja mi' caca oro wari' ma'. To' querec pin' nuhu' pain ca param nucun ma' quem, pain ca to' hohot inuhu', param inuhu' pain ca to ho' mahu' pain ca taramaxicon pe ta' ca' toton cuhu' ma' quem. Je ca jain jain hwe cocon oro wari' co quep em' nunuhu' pain ca pijim' mi' huhun con Iri' Jam co taramaxicon ma' quem.

2 Pedro 1:11

Tomi' querec te tamana ac cuhu' tara Taramaxicon nexi' Jeju Cristo co to' witan napari' ma', pain ca aram aram corom xi' hwein ca taramaxicon pe ca pain pawin cain. Corom je, to ho' cara xine ta ac cuhu' tara. Om ta pi' ra ha' ne ca taramaxicon pe ca pain pawin cain.

Apocalipse 21:8

Ac i ma' paxi' toton oro co hwara' opa cara nana pain ca howa nucucun ma', ane om ac i ma' toton oro xucucun co caracat cara nana ne. Mo nana: Co jin' nanain ca quep em' wa pain ca howa nucucun ma', co om howa je ha' nana ma', co ara taxipa' nanain oro ca om querec awi non Iri' Jam ma', co to' parapa' pin nonon wari' ma', co quep ximama' xequequem ma', co ara xirac nonon oro wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co tomi' mixein nana ma' quem, wixicaracao' mi' ac tococwa tara pain iri' maxicocon ma', je pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Cote ne xe ma', tomi' joc mam' mi' nain ca cono' mami' wa pain ca to ni cara ca' xun cocon Iri' Jam ta.

Apocalipse 22:15

Om ta corom ac caca oro caracat co ac caxicon oromijac. Mo nana: Co ara xirac nonon oro wari' ma', co quep ximama' xequequem ma', co to' parapa' pin nonon wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co hohot nonon ca tomi' mixein wa ma', co tomi' mixein taxipa' nana ma' quem. Oro wari' co ara nanain i ma', om ta corom ac cacain cidade nucun Iri' Jam.