Lucas 12:24 - Tradução Bíblica Pacaas Novos

²⁴ Noro jein oro me ma'. Om paxi' na ca tota ne. Om ca oin' nein oro tocwi pain xitot, om ca cut nein caramaji, om nain xirim ca cut to xo' nein quem. Ane pa' mi' pan cain Iri' Jam ne. Je ca tomi' xuhu' ca': Querec wet paxi' nain oro me Iri' Jam ma'. Ane querec wet tamana pan cuhu' ne.

Lucas 12:24 Iomraidhean Croise

Mateus 10:31

Je ca tomi' xuhu' ca' ac caparut na. Win ne ca querec wet cain wijimain me ma'. Ane awi tiquin' ca' hwein ca mija nein wijimain me con ne. Je ca tomi' xuhu' ca': Ta jin' huhun oro wari' co quep em' xim nunuhu' ma' me ta na ca tomi' caparut ca'.

Mateus 3:12

An to ni ca' toton nonon oro co tomi' ha' nonon cocon oro co om tomi' ha' nonon quem. Win ca wari' co an pe ni ca' tain nain ca xao pe xine tocwi trigo pain tocoxi ma' quem. An nain ca mam' pahop nucun, pahop ac cain na tocoxi, an pe ni ac cain na iri' tocwi pain xirinain, wixicaracao' mi' ac cain na tocoxi pain xe ca om jo' ra ha' ma' quem na ca tomi' cocon oro wari' João pane.

Mateus 6:26

Noro jein oro me ca toin mama' nein pawin ma'. Om paxi' na ca tota ne. Om ca oin' nein oro tocwi pain xitot, om ca cut nein caramaji, om nain xirim ca cut to xo' nein quem. Ane pa' mi' pan cain Cotere' co pe pawin ne. Je ca tomi' xuhu' ca': Querec wet paxi' nain oro me Cotere' ma'. Ane querec wet tamana pan cuhu' ne.

Marcos 6:26

Cain' cain' xira pata' ne ta ac ca na Herodes. Om xi tomi' an pe mi' tam pain ca tomi' ne cara ne ta ca' xucun. Ane na e' ne pain ca tomi' ha' cam ne, xi om ne ca tomi' an pe mi' ara cam pain ca tomi' nucun ta. Wixipa' tata oro win ma' ca co taraju nonon pain ca tomi' nucun quem. Je ca om an in cain ca tomi' nucun.

Lucas 12:18

Ca' ta' quem ac xucun na. Co pin tain oro wara xirim ca an to xo' tain oro caramaji tota pane. Quep mami' ac tain tara, quep hwara' ac tain tara quem. Hwara' ca' tarain wara xirinain ca'. An to xo' an to xo' pi' pin ac tain tara oro caramaji tota. Cut corom to cut corom to pi' pin ac tain tara oro caramaju ca' quem.

Lucas 12:23

Hohot paxi' na pain ca ma' capari' carawa ca cao' wa, ane hohot tamana pan ne ca e' nexi' ne. Hohot paxi' na pain ca ma' capari' wom co to iri' quem. Ane hohot tamana pan ne cwerexi' ca' ne.

Lucas 12:7

Ac i ma' nuhu' quem, mam' pe wet cara nuhu', taxi' pi' pin nain oro coxumuhu', taxi' nain tununuhu' pain ca mija nein quem. Querec wet nuhu'. Win ne ca querec wet cain wijimain me ma'. Ane awi tiquin' ca' hwein ca mija nein wijimain me con ne. Je ca tomi' xuhu' ca': Ta jin' huhun oro wari' co quep em' xim nunuhu' ma' me ta na ca tomi' tococwa ma'.