Lucas 12:1 - Tradução Bíblica Pacaas Novos

¹ Ac i ma' ac i ma' nana, ma' mija ac caca na oro wari' co cut in nana ma'. Mija nana, om ca paric camain' caca. Pain ca wixicam xun Jeju ta caca ma', xao xao ac xucucun na, xom mapi' xucucun pain caximacocon quem. Tomi' ta' e' ac ca na Jeju, tomi' cain' tata co taxipa' ca ma': Ma' tara xumuhu' me ac tococwa na. Ta an xiho' huhun oro fariseu pain ca ac ca iri'o' xi' ca' tara me caca ma'. An xiho' ara xi' nanain ca to' memerem nein capam' ma', pain ca to' ara cocon oro wari' pain ca mixein nucucun.

Lucas 12:1 Iomraidhean Croise

Lucas 11:44

Wa inuhu' me. Ximin hwe ta. Wap tamana turuhu' Iri' Jam. Xi an xiho' ara hwein manain pacun ca om querec pin' xine pain ca cut corom to tococwa co cono' nana pain tequipain ta. Noro jujun wari' co xom mapi' nanain pacun ca corom pe ne cojicocon co cono' nana. Om ca taxi' xucucun pain ca to' em' pin xucucun pain na ca tomi' tococwa ma'.

Lucas 12:56

Wa inuhu' pain ca ac ca iri'o' xi' ca' tara me hwe ma'! Noro iri hwein nanawin pain macan' ca' ne, querec pin' ac hwein na ca pan' ta' ne xowi' je pain ca xain tamana ta' ca xina ma' quem. Je xi querec pin' hwein carawa ca ara ta' pan ca Iri' Jam pain oro xec nexi' ca' quem?

Lucas 5:1

Maqui' ac ne na xec pain ca pe cain cacarain cote ne com pain Genesaré Jeju ma'. Mija nana wari' co xao xao nonon. Om ca paric camain' caca. Taraju xin capijacon Iri' Jam nana.

Lucas 5:15

Tomi' ac i ma' paxi' non, ane taraju taraju tiquin' caca oro wari' ne. Taxi' taxi' pi' pin ac cocon na Jeju pain oro ca ara ca ma'. Je ca hwet mija cocon oro wari' quem. Mija nana wari', om ca paric camain' caca. Taraju xun nonon. Quep xio tarapari' pain ca caxi nexi' ca' nonon quem.

Lucas 6:17

Quiji' wi ac cocon na pain pacun ma', wirico Jeju, wiricoco co taxipa' ca ma' quem. Coco' to ac cacain na ca om tamaja nein ma' quem. Mija nana wari' co to nanain i ma'. Mija nana co wara taxipa' nonon, mija nana wari' co maqui' nanain oro xijein cidade pain Judeia, maqui' nanain Jerusalém, maqui' nanain cacarain iri' cote ne com pain Tiro je Sidom ma' quem. Om ca paric camain' caca.

Atos 21:20

Taraju iri nanain ca tomi' nucun ne, tomi' querec te ac caca na. Awi tamana na Iri' Jam ta nana. Tomi' ac cocon na Paulo: Taxi' momon oro win ma' nexi' pain ca judeu iri' ca', taxi' momon pain ca howa cocon Jeju quem. Mija nana, om ca paric camain' caca. Tomi' ha' tomi' ha' pi' pin nanain ca xirao' nucun Moisés quem. Om ca an to camain' cacain.

1 Coríntios 15:3

Pijim' hwet inuhu' pain capijacon Iri' Jam ca wara tomi' hwet capa' pane. Awi tiquin' ca' nain oro xijein capijacon ta. Ca' na con: Mi' pin caho' napari' Cristo, ma' ta om wap xihwe pain ca caracat nuhu' ta napari'. Win ne ca xirao' pe xine pain capijacon pane.

Hebreus 12:22

Ane om wixicam hwein cote ne pacun pain mahweri ne, om na. Wixicam pan hwein xijein pacun ma', Sião ma', je ca pe ne macaracon Iri' Jam co e' cara ma'. Wixicam hwein Jerusalém ca pe pawin cain. Wixicam huhun oro jam co taramaja mi' nonon Iri' Jam ma', co mija tamana nana pain ca cut in xucucun pain ca tomi' querec te tamana nucucun ma' quem.

Tiago 3:17

Ane jimao ne ca coromicat xo' wa ca maqui' nain pawin ne. Mo ta coromicat xo' iri', to ni ca' ac xin na ca caracat wa pain ca win xumu cain' xun Iri' Jam. Ca' ac iri' na quem: Quep xiho' ururun oro win ma' nexi' pain ca mana' caracan xucucun ma'. Tomi' querec te caracan xijexi'. Tomi' wixite xijexi' pain ca win xumu xin ca param pan nucucun oro win ma' nexi'. Xiram pa' tamana xijexi' pain ca ara mi' xijexi' pain oro ca awi wa. Om ca tomi' querec te paxica' xijexi', om ca tomi' capijacocon e' xijexi', tomi' iri'o' xijexi'.

1Pedro 2:1

Je ca tomi' xuhu' ca'. An to an to pi' pin jein oro ca pan teretem wa je oro ca mixein wa ma'. An to pin jein ca ac ca iri'o' xi' ca' tara me hwe ma'. An to pin jein ca noc mi' caracan xujuhu' pain oro ca ara nuhu' ma'. An to pin jein ca tomi' napat xujuhu' ma' quem.