Lucas 11:9 - Tradução Bíblica Pacaas Novos

⁹ Je ca tomi' xuhu' ca' ac tococwa na. Tama' mi' ne jun pain carawa ca param hwe Iri' Jam. Mi' ac cuhu' pain tara. Tama' pirao' jein carawa ca param hwe con. Mam' ac hwein con tara. Tama' tomi' jun pain ca quep xiho' xut ta hun ma' quem. Ac ca tataca hwein tara pana ca mam' tao' pa' nein manain xiricon ma', ac ca pa xat mi' cuhu' pain tara. Quep xiho' ac cuhu' tara quem.

Lucas 11:9 Iomraidhean Croise

Mateus 21:22

Oro ca mi' ne hun Iri' Jam ma', pain ca tomi' hun ma', mo ta howa hun pain ca ara mi' xim cuhu' pain ca mi' ne hun ma', ara mi' ac cuhu' pain tara quem na ca tomi' caparut.

Mateus 21:31

Tomi' querec ac tococwa na: Ma' co tomi' ha' pan non cote ca quem tata. Wirico co pan' cain' ta nonon. Je ca tomi' xuhu' ca', tomi' iri'o' inuhu' ta ac tococwa na. Oro caracat ma', cocon oro caxicon wari' cacam oro caxicam narima' ma' quem, hohot nonon Iri' Jam, om ca i'ina cacam pain ca xin ne cocon Iri' Jam pain ca taramaxicon pe ho' tatam cacam ta. Wahu' iri na ne, om ca hohot hun Iri' Jam. I'ina tamana nuhu' pain ca xin ne hun pain ca taramaxicon pe ho' xim cuhu' ma'.

Mateus 6:29

Ane om ca wom co awi co awi tiquin' ca' nain hwijein pana ca' ne, om om na. Caramaju tamana paxi' na Salomão cara pane, awi tamana paxi' na womicon pane. Ane awi tamana ca' con womicon Salomão oro hwijein pana ca' ne. Tomi' iri'o' inuhu' ta.

Marcos 11:24

Je ca tomi' xuhu' ca' ac tococwa na. Oro ca mi' ne hun Iri' Jam ma', pain ca tomi' hun ma', na e' na pain ca howa hun pain ca ara mi' xuhu' pain cuhu' ma'. Ac ca wara ara mi' cuhu' pain tara pain ca howa hun ma'. Ara mi' ac cuhu' pain tara quem.

Marcos 13:37

Ca tomi' xuhu' ca', je ca tomi' tomi' pi' pin toton oro wari' co howa nanapa' ma'. Ma' tara xumuhu' me, winim' xo' xine ta na ca tomi' tococwa co taxipa' ca ma'.

Lucas 11:10

Xi taraju wet ara tococwa oro wari' co mi' ne nonon pain carawa ta. Oro co tama' mi' ne nonon pain carawa ma', mi' mi' xam' ac tococwa pain tara. Oro co tama' pirao' nanain carawa ca param caca con, mam' ac cacain con tara. Oro co tama' tomi' nonon pain ca quep xiho' xut me cocon ma', co ac ca tama' tataca tataca cacain na manain xiricon ma', ac ca pa xat mi' tococwa pain tara man quem, quep xiho' ac tococwa tara quem.

João 14:13

Oro carawa ca mi' xut pain hun Te ma', pain ca an hwet mi' hun pain wuxu pain ca mi' naparut pain ca tomi' urut pum ca' hun pata', ara mi' ac xuhu' pain tara. Ma' ta an hwet mi' xuhu' pain ca hwara' opa nucun Te pain ca awi tamana nucun ta inuhu'.

João 15:16

Om ca wahu' ne co tora' pan napa' pain ca taxipa' xun mahu' ma', om na. Wata' pan co tora' nuhu'. Mi' inuhu' pain ca taramaja wa quem. Wawaran mama' je, pijim' mi' jujun pain capija oro wari' ta inuhu'. Howa cara ac caca tara co howa nanapa' pahu' inuhu' quem. Mo ta tomi' ha' mahu' pain ca mi' xuhu' pain ca taramaja wa ca'. Mo ta tomi' ca' hun Te ma': Mi' naparut pain ca tomi' urut pum Panxima Jeju ta, mo ta tomi' ac i ma' hun pata', ha' ac cuhu' tara pain carawa ca mi' xut pain hun ma'. Mi' mi' pi' pin turuhu' pain.

João 15:7

Mo ta win cwere cara mahu', mo ta to ho' cara cuhu' oro ca tomi' ne quem, na ac cuhu' tara pain ca tomi' hun Te ma', pain ca mi' xut hun pain oro carawa ca param hwe ma'. Mi' mi' pi' pin ac cuhu' pain tara quem.

João 4:10

Om na, mo xi querec pin' main carawa ca mi' xim quem Iri' Jam ca', mo xi querec pin' mapa' pain ca cam mi' ne pain com xim ca' quem, cam mi' ne pain com pan ac mapa' xira, mi' ac xim xira pain iri' com ca to' e' cara nain ca wari' wa ta ac cam na.

Romanos 2:7

Oro wari' co tama' ara nanain oro ca awi wa pain ca win xumu cacain ca tomi' querec te nucun Iri' Jam ma', coromicat ca' ac caca na: Tomi' querec te tarapari' Iri' Jam ta. Hohot hwe tarapari', to' e' cara xuhu' tarapari' ta nana. Wiricoco tatara co mi' wawa pain ca e' cara wa.

2 Coríntios 6:2

Xi ma' ara ne ca xirao' pe xine ca tomi' nucun Iri' Jam ta. Ca' na con: Maqui' iri napa' xec nein ca xiram pa' xim xim ne, ha' ac xim na pain ca tomi' mapa' ma'. Maqui' iri napa' xec nein ca to' witan xim xim ne, quep xiho' ac xim na quem, ac i ma' na ca xirao' pe xine ca tomi' nucun Iri' Jam pane. Je ca tomi' xuhu' ca'. Taraju wet je e'. Maqui' pin na xec nein ca xiram pa' pin xim capari' Iri' Jam ca'. Maqui' pin na xec nein ca to' witan pin xim capari' quem.

Hebreus 11:6

Je ca tomi' xuhu' ca'. Mo ta om howa xun Iri' Jam cwa', om ca hohot ac xun. Wixicam pin xun iri urun ne, na e' na pain ca howa xun pain iri' ca Iri' Jam nucun ma'. Na e' na pain ca howa xun pain ca mi' xim capari' pain oro ca awi wa pain ca win xumu xun ca'.

Hebreus 4:16

Je ta wixicam xun Iri' Jam co xiram pa' taxipa' ma', co quep xiho' taxipa' ma' quem. Om ta jin' xun, ac ca wixicam xun tara pain iri' ca xao pe pe ca pain pawin cain. Ma' ta xiram pa' capari', ma' ta quep xiho' capari' quem. Ximin iri xi' ne, pain ca ma' capari' oro ca to' i'ina napari' ma', xiram pa' hap ac capari' tara, quep xiho' hap ac capari' tara quem.

Tiago 1:5

Mo ta ma' ca win ma' nuhu' co om taraju pa' xo' ma', pain ca om querec pin' cain ca param nucun Iri' Jam ma', tomi' pan toron ta. Mi' ne pain ca taraju pa' wa, mi' ne pain ca querec pin' tain ca param nem pain ca xut xo' wa ta toron. Mi' ac tocwa pain tara. Xi xiram pa' taxipa' ara capari' pain ca tomi' xun ca'. Om ca pan to' cain tarajixi' pain ca tomi' xun quem, ara mi' querec te napari' pain, je curucun mao na.

Tiago 5:15

Mo ta tomi' mi' cocon con Iri' Jam co caxi ma', mo ta howa xo' cocon pain ca ha' tarapari' ta caca ma', xio pin ac ca tara ta. An tequi' pe toron Taramaxicon nexi' quem. Am caracat ca quem. Je i ma' ira, xic am pin ac xine tara ca caracat nucun ta.

1João 3:22

Mi' mi' pi' pin ac capari' tara pain oro ca mi' ne xun quem. Xi om ne ca tomi' ha' taxipa' ara xun pain oro ca ara je capari' ta. Xi om ne ca ara taxipa' e' ara xin oro ca hohot non quem.

Apocalipse 2:24

Tomi' ho' inonon oro xucucun co to nanain Tiatira ma': Wahu' pain ca om an xiho' hwem caxicam narima' ma', pain ca om taxi' xixi' na hwein oro coximinain caramaxicon Satanás ca tomi' hwet cama ma', ca wirico Satanás co an hwet mi' napari' pain ta pan caca oro wari' nequem ma', tomi' ca' inuhu': Wara tomi' ha' hwein oro xijein ca tomi' ne ca'. Om ta hu mami' xuhu' pain xocori ca', om na xijein ca tomi' ne ca tomi' ha' je xuhu' ca'.