Lucas 11:39 - Tradução Bíblica Pacaas Novos

³⁹ Tomi' ac con na Taramaxicon nexi': Wahu' ma', pain ca fariseu hwe ma', ac ca hohoc xo' paxi' hwein na too ca mam' cao' hwe ma', je ca mam' toc hwe ma' quem. Ac ca awi paxi' ne na xonein ma' pahu', ane mixem cara ne quimain ne. Ac i ma' pan hwe quem. Hohoc xo' paxi' hwein curuhu' ma', ane mixem cara ne xumuhu' ne. Param ximama' e' hwein oro caramaxicocon oro win ma' nuhu', pan teretem hwe quem.

Lucas 11:39 Iomraidhean Croise

Mateus 15:19

Xi maqui' ara nein ca xumu wa oro carawa ca to' em' nain ca wari' wa ta. Mo na: Ca coromicat pan teretem wa ma', ca to' pa' wa wari' ma', ca quep tacacama oro manacocon oro wari' ma', je pain ca quep ne cocon xucun tarama' oro narima' ma' quem, oro ca caracat wa pain ca quep ximama' wa ma', ca cut noc xa wa carawa ma', ca tomi' mixein wa ma', ca tomi' napat wa ma' quem.

Mateus 7:15

Ma' tara xumuhu' me, ta taraju wet huhun oro wari' co profeta urut ta ximama' nunuhu' pain ca pijim' mixein nucucun ma' me ta ac tococwa na. An xiho' paxi' nanain ovelha ca awi pain ca om mana' nein ma', ac ca awi caca e' na pain curucucun. Ane om awi pan ne ximicocon ne. An xiho' e' nonon copacao' co om awi pain ca mana' nucun.

Lucas 16:15

Tomi' ac tococwa na: Ac ca iri'o' xi' ca' tara me paxi' hwe cocon oro wari' ta, ane querec pin' pan cuhu' Iri' Jam ne. Querec pin' nuhu' pain iri' xumuhu' ma'. Carawa ca in ac caca oro wari' ma', om ca hohot camain' con Iri' Jam. Noc pan nain ta na ca tomi' tococwa ma'.

Lucas 7:13

Querec iri nam Taramaxicon nexi' ne, xiram pa' ac cam na. Ta aca ma me ta nam.

Lucas 7:19

Mo hwet jun Taramaxicon nexi' ta ac tococwa na. Tomi' querec ca' jun: Wum tara co wara tomi' pe ca Iri' Jam pane, co main maqui' tara ta ca pane ra? Winim' jun xucun maparut ra? Ac i ma' tara ca tomi' querec hun ta tata.

João 12:6

Om paxi' na ca xiram pa' cocon co om nonon carawa Judas ma'. Tomi' ac i ma' e' na, xi om ne ca an noc xa taxipa' ara ca ta. Wirico ara xi' na co querec wet nain dinheiro nuxut, an noc xa wijimain an noc xa wijimain ac cain na quem.

João 13:2

Irawin cao' ac urut na. Judas ma', panxica Simão Iscariotes ma', wara coromicat ca' na quem: Quep xiho' toton oro taramaxicon pain ca quep xun cocon Jeju ta na. Tomi' mi' toton con ta na. Wirico Caxicon Jam co mi' non pain ca coromicat ac i ma' nucun.

Atos 5:3

Tomi' querec pan ac con na Pedro: Para om ari mon Caxicon Jam pain ca quep mip xim quem ma', pain ca mixein rain Tamataracon Iri' Jam quem ma' Ananias? Xi pe ho' cara ara quem tamain dinheiro ca cut ma pain macaram ta.

Gálatas 1:14

Tomi' ha' taxipa' inain oro ca xirao' nucucun oro hwanana ne pane. Ma' nana oro win judeu ta' co win camara' nanapa' pain ca pije' nuxut pane quem, ma' paxi' nana co tomi' ha' taxipa' nanain quem. Ane tomi' ha' tiquin' ca' toton pain oro xucucun win judeu ta' ne. Jain jain tamana ina pain ca tomi' ha' tomi' ha' pi' pin tain oro ca xirao' nucucun hwanana nuxut pane.

2 Timóteo 3:5

Howa urut con Iri' Jam paxi' tatara pain ca ara xin urut pain carawa ca hohot non ta caca ma'. Ane om iri'o' xi' caca ne. Om ta ha' je na cacain Tamataracon Iri' Jam pain ca mam' to' xucun wari' ton cocon pain ca hwara' opa nein. Je ca tomi' xim ca': Miri'om pan roron oro wari' co ac i ma' nana ma'. Ta wixicam camain' momon me ta.

Tito 1:15

Xi to' em' taxi' capari' carawa ca cao' wa pain ca howa xun Cristo Jeju ta. Oro wari' co xumu xo' nana con Iri' Jam ma', co hohoc pin wawa pain ca caracat nucucun ma', querec awi nonon oro carawa ca cao' wa. Om ca ein cacain, cao' cao' pi' pin nanain quem. Oro wari' co om xumu xo' nana con Iri' Jam ma' iri nana ne, co om hohoc pin wawa pain ca caracat nucucun ma', co om howa nonon Cristo Jeju ma', om ca quep xiho' cocon oro ca ara xi' paxi' caca ma', pain ca to' hohot pin xijexi' con Iri' Jam caca ma'. Om ca to' querec awi ac tococwa con Iri' Jam ta. Em' cara na ca coromicat nucucun. Om ca toron camain' ne ximicocon pain ca caracat nucucun quem.

Tiago 4:8

Wixicam pin jun Iri' Jam, wixicam pin ac cuhu' tara quem. Wahu' pain ca caracat hwe ma', cwirin' pin je. Win ne ca hohoc xo' hwein muhu' pain ca mixem tamana nein ma', ac i ma' tara ca an to pin hwein ca caracat nuhu'. Wahu' pain ca param tocwan hwe ma' quem, an to pin jein ca param ximama' nuhu', win xumu e' jun Iri' Jam.