Lucas 11:2 - Tradução Bíblica Pacaas Novos

² Tomi' ac tococwa na: Tomi' xun iri jun ne, tomi' ca' jun: Coturut Iri' Jam. Param urut pum pain ca querec pin' querec pin' pi' pin quequem oro wari' pain ca awi tamana nem pain ca Iri' Jam nem. Param urut pum pain ca maqui' hap ne xec nein ca taramaxicon pe ho' taramaxicon pe ho' pi' pin momon oro wari' pain macan' ca' quem.

Lucas 11:2 Iomraidhean Croise

Mateus 10:32

Tomi' ac caparut na: Wari' co tomi' hwet nonon oro win ma' ca pata' pain ca Taramaxicon ne inon Jeju ta cocon pata', ame hwe e'. Main tomi' ca' ton Te co pe pawin cwain: Wari' ne inon co cwa' ta ton con.

Mateus 3:2

Ca' na ca pijim' nucun: Cwirin' je, xi om ne ca wixicam pin ta' ara ne xec nein ca taramaxicon pe ho' pin ton cocon oro wari' Iri' Jam ta na.

Mateus 5:16

Je ca tomi' xuhu' ca'. Ac i ma' tara ca toha ne naran nuhu' ta. Toha mi' jujun oro wari'. Ma' ta querec pin' cacain ca ara hwe ma', pain ca ara hwein ca awi wa ma'. Ma' ta awi na xin Iri' Jam ta cocon Cotere' co pe pawin pahu'.

Lucas 11:1

Maqui' ac ne na xec pain ca tomi' pe ton Te pain i cain ta ca Jeju. Tomi' tomi' ac con na. Pi' pin iri na ca tomi' con ne, tomi' pan ac con na co taxipa' ca ma'. Taramaxicon nuxut ac con na. Ca' na xut pain ca tomi' xut con Iri' Jam me. Win ca João cara pane, pain ca ca' na tococwa pain ca tomi' wa Iri' Jam co taxipa' ca pane na ca tomi' con ma'.

Romanos 1:7

Je ca xirao' mi' xirao' mi' pi' pin xuhu' ca', pain ca to hwein Roma ma'. Xirao' mi' inuhu' pain ca om noc cuhu' Iri' Jam pain ca oro wari' ne pin cuhu' ma'. Param inon Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param inonon pain ca mi' cucuhu' pain ca om toron ne xumuhu' quem.

Romanos 8:15

Xi mi' ara capari' pain Tamataracon ta. Tamataracon ca mi' capari' ca', om ca mi' capari' pain ca in hwet xin ca tama' jin' nexi' pain ca an xiho' mami' xun wari' co jin' non taramaxicon nucun ma', om na. Mi' iri napari' pain Tamataracon ne, je ca to' mana panxica Iri' Jam pin capari'. Je ca ha' capari' pain ca Te pin xun Iri' Jam cwa'.

1 Coríntios 1:3

Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

2 Coríntios 1:2

Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

Gálatas 1:4

Taramaxicon nexi' Jeju Cristo ma', om ca narain ho' xucun pari'. Mi' pin caho' napari', xic am ca' napari' pain ca caracat nexi'. To' witan napari', ma' ta ha' cuhu' pain ca om an xiho' mami' huhun pain oro ca pan teretem nucucun oro wari' co om howa nanapa' ta napari'. Je ca param mi' capari' Cotere' Iri' Jam.

Efésios 1:2

Param inon Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param inonon pain ca mi' cucuhu' pain ca om toron ne xumuhu' quem.

Filipenses 1:2

Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

Filipenses 4:20

Na e' na pain ca tomi' querec te xun Cotere' Iri' Jam co awi tamana cara ta! Amém, iri'o' na ca xirao' ne ta.

Colossenses 1:2

Xirao' mi' urut pahu' pain ca to hwein Colossos ma', pain ca wari' nucun Iri' Jam hwe ma', je pain ca tomi' ha' cara hun Cristo pain ca howa hun ma' quem xere. Param urut con Cotere' Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

1 Tessalonicenses 1:1

Paulo ina pain ca xirao' mi' xuhu' ca'. Wata', wirico Silvano, wirico Timóteo, ca' urut pain ca xirao' mi' urut pahu' pain ca cut in xujuhu' pain Tessalônica ma', pain ca win cwere hun Cotere' Iri' Jam con Taramaxicon nexi' Jeju Cristo ma'. Param urut con Iri' Jam con Taramaxicon nexi' Jeju Cristo pain ca quep xiho' cucuhu' pain ca mi' cucuhu' pain ca param nucucun. Param urut cocon pain ca mi' cucuhu' pain ca om toron ne xumuhu' quem.

1 Tessalonicenses 1:3

Tama' mam' pe wet urut pahu' pain ca taramaja nuhu' ma'. Taramaja mi' hun Iri' Jam, xi om ne ca howa ara hun ta. Jain jain huhun oro win ma' nuhu' pain ca quep xiho' xun huhun ma', xi noc camain' huhun ta. Quereme hwein oro ca to' i'ina cucuhu' ma' quem, xi om ne ca winim' ara hun Taramaxicon nexi' Jeju Cristo pain ca in qui' ta' nucun ma' quem. Je ca mam' pe wet urut ca', pain ca tomi' mi' urut pahu' con Cotere' Iri' Jam.

2 Tessalonicenses 2:16

Tomi' mi' urut pahu' con Taramaxicon nexi' Jeju Cristo con Cotere' Iri' Jam. Om ca noc capari' Iri' Jam. Om ca pi' ra ha' ne ca to' hwara' opa cara capari'. Xiram pa' napari' pain ca mi' e' capari' pain ca momon winim' xun pain ca main mi' xim capari' pain carawa ca awi ca wara coromicat an pe xo' mi' capari' quem. Om xi mi' capari' pain, xi iri' wari' iri' ta. Ane xiram pa' pan capari' ne. Je ca mi' e' capari' pain.

Apocalipse 11:15

On ac cain na caji taracom xucun jam co taramaja mi' non Iri' Jam, ma' 7 pin ac caca na co on nanain ma'. On iri nain ne, taraju ac toton na co tomi' mip to nanain pawin ma'. Tomi' ac i ca' nana: Taramaxicon pin na Iri' Jam co Taramaxicon ne iri' cwa'. Taramaxicon pin na Cristo co tora' pan ca quem. Wirico Iri' Jam na co taramaxicon pe ho' taramaxicon pe ho' pi' pin toton nonon oro wari' pain oro xijein macan'. Taramaxicon cara tara quem. Ac i ma' na ca tomi' mip caca ma'.

Apocalipse 15:4

Tomi' ha' cara teterem oro wari' ta Taramaxicon Iri' Jam. In ac cara teterem quem. Xi xica' pe ara ma pain ca awi ma ma', pain ca pe ni ca' main ca caracat wa ma'. Hwet hwet xam' teterem oro wari' co to nanain oro xijein macan'. Pe torotop mi' querec te teterem. Xi om ne ca querec pin' ara quequem pain oro ca ara xo' tamana ma ma'. Ac i ma' na ca com nucucun.

Apocalipse 19:6

Taraju ac tain na ca tomi' pa tamana wa quem. Ac ca mija caca na wari' co tomi' pa pan xucucun. Ac ca xain ne pacun pain ca weweweo tamana ne com na, ac ca toroho mip ca na comerem ma' quem. Merem ac caca na: Aleluia! Tomi' querec te xun Iri' Jam nexi' ta! Xi om ne ca Iri' Taramaxicon ara ca ta. Hwara' opa pan na ta.

Apocalipse 20:4

Querec ac tain na oro ca mam' xao to nucucun oro taramaxicon. Ma' tocwan na. Xao to to nanain caram ma' co mi' wawa pain ca hwara' opa wa ma', pain ca tomi' xo' jujun oro wari' pain oro carawa ca ara caca pain ca e' e' wet nucucun pane wawa ma'. Querec inain tamataracocon co wara cono' nana ma' quem, co ton tapit pin wawa pain winacocon pane, xi om ne ca tomi' hwet ara cocon con Jeju oro wari' pane. Pijim' nanain capijacon Iri' Jam pane, je ca ton tapit pin xine winacocon pane. Om ca pe torotop mi' querec te cocon co ma' co ac caji carawa co hwet qui' cain' pane, om ca pe torotop mi' querec te cacain pacun ca an xiho' nain curucun pane quem. Om ca xirao' xirac tococwa pain wixinain pain jitaracocon pain micocon pane quem. E' mami' nana, taramaxicon wi ac cocon na Cristo quem. Ma' 1.000 na cawaxi' pain ca taramaxicon wi cocon Cristo.