Lucas 10:42 - Tradução Bíblica Pacaas Novos

⁴² Ane ma' xica' pe ne carawa ca ara ra xim ca' ne. Na e' na pain ca taraju wet mapa' pain ca ca' na tain capijacon Iri' Jam ta. Je ca param cama coxa' ma cwa', taraju wet napa' pain ca ca' na tain capijacon Iri' Jam. Carawa ca param cama ca', pain ca taraju wet capa' ca', awi tiquin' ca' nain carawa ca ara pan ma ma' quem, pain ca hoc main carawa ca cao' xi' iri' ma'. Om ta tomi' in pin tam pain na ca tomi' cam ma'.

Lucas 10:42 Iomraidhean Croise

Marcos 8:36

Je ca tomi' xuhu' ca' ac tococwa na. Mo ta ma' ma' xam' capari' oro carawa pain macan' ca'. Mo ta miri'om xin ca e' cara wa pain pawin cain, mo ta mama' xin cote ne xe quem. Ma' na ca quep xiho' ac capari' oro caramaji macan' ca cut iri' pain ca e' e' wet nexi' ra? Om ca quep xiho' capari' ta!

Lucas 10:39

Ma' na coxa' cama quem. Maria na wixicam. Taraju wet xiton na non Jeju pain ca ca' na cacam pain capijacon Iri' Jam. Je ca xao pe ho' con pain caximacon.

Lucas 11:1

Maqui' ac ne na xec pain ca tomi' pe ton Te pain i cain ta ca Jeju. Tomi' tomi' ac con na. Pi' pin iri na ca tomi' con ne, tomi' pan ac con na co taxipa' ca ma'. Taramaxicon nuxut ac con na. Ca' na xut pain ca tomi' xut con Iri' Jam me. Win ca João cara pane, pain ca ca' na tococwa pain ca tomi' wa Iri' Jam co taxipa' ca pane na ca tomi' con ma'.

Lucas 12:20

Ac i ma' paxi' na ca coromicat nucun, ane tomi' ca' con Iri' Jam ne: Mi' pin ho' ra ta inem ta tamanain co om coromicat xo'. Mi' pin ho' ra pain xim ca'. Ma' xi wari' co cut tain nain oro caramajum ca an to xo' ta' ma ma' quem, ac i ma' na ca tomi' con ma'.

Lucas 12:33

Je ca tomi' xuhu' ca': Vender jein caramajuhu' ma'. Cut iri jein dinheiro nein ne, mi' mi' ac huhun pain tara oro wari' co om nonon carawa. Ma' ac cuhu' tara oro carawa ca om pi' ra ha' ma'. Ac ca cut in xo' tamana hwein tara carawa pain pawin cain. To wet cara ac ne tara quem. Om ara xi' nain i cain wari' co cut noc xa tain nain oro caramajixi', om nain i cain oro caxicon tohoro' co cao' nain quem.

Lucas 16:2

Hap ra ta ac con na, tomi' querec ac con na: Cain' cain' xima quem? Tomi' hwet nanapa' pain ca waraju main caramaju ca'! Cut qui' rain papel ca xirao' pe main oro ca taramaja nem pain dinheiro ne ma', pain ca waraju main oro caramaju ca'. Xi na ne pain ca querec wet mami' main caramaju ta non.

Lucas 16:25

Ane tomi' in pin con Abraão ne: Om na ta arain. Mam' pe wet rain oro carawa ca hohot nem pain ca e' e' wet ma pain macan' pane. Tomi' querec te ma pain oro carawa ca awi ca param ma pane quem. Lázaro cwa' iri na ne, ximin na pane. Om ca ma' camain' con carawa ca awi. Ac i ma' paxi' hwe pain cara pane. Ane ja' tomi' querec te tocwa Lázaro pain i ca' ne. Wum iri na ne, jain jain tamana pan ma pain cote ne xe ma' ta.

Lucas 18:22

Taraju iri non Jeju ne, pain ca tomi' ac i ma' ca ma', tomi' ac con na: Ma' ma' wet na carawa ca om ara querec ma ma' non. Vender vender pi' pin rain oro caramajum. Cut iri rain dinheiro nein ne, cut mi' ac momon pain tara co om nonon carawa. Caramaju pe ac main tara pawin cain. Cut mi' cut mi' pi' pin iri roron pain dinheiro nem ne, in hwet ac mapa' tara, ja' ja' ac mapa' tara ta na ca tomi' con ma'.

Lucas 8:18

Je ca tomi' ca' xuhu' ca': Taraju wet jein ca tomi' xuhu' ca'. Wari' co taraju wet ma', co taraju pa' xo' nain ca taraju nucun ma', mi' hwara' mami' ac tocwa tara pain ca taraju pa' wa. Wari' co om taraju wet ma' iri na ne, co om taraju pa' xo' nain ca taraju nucun ma', an ca' ac tocwa tara pain wijimain ca taraju pa' nucun ma' quem na ca tomi' tococwa ma'.

João 11:1

Caxi ac ca na wari' pane. Lázaro na wixicon. Wari' nein Betânia na, je i ma' wixinain ca paric to ne xirim ca pe ca cacam mana cowe ca ma', Maria cam Marta ma'.

João 11:19

Je ca ma' mija caca oro win judeu urut co hwet nanam Marta cam Maria ma' quem. Quep xiho' xixim pain ca tomi' xaxa' tamana nequequem con coxa' cacama ta nanam.

João 12:3

Maria ma' iri na ne, an ac camain na too ca ji'ao pe xine caji towaxi' ca hu xain ma'. Homain nardo na wixinain caji towaxi'. Mija na dinheiro nein quem. Ji'ao mi' ac camain na pain caximacon Jeju, xic cawain' ac camain na pain tenenequem quem. Hu xain pi' pin ac ne na tequipain xirim pain.

João 17:3

Oro wari' co e' cara xi' nana ma', na e' na pain ca querec pin' quequem pain ca Iri' Jam iri'o' ma ma'. Om na win Iri' Jam ma ta teterem. Xica' pe ma ta teterem. Na e' na pain ca querec pin' cacapa' pain ca Jeju Cristo ta' ca' quem, pain ca hwet roron oro wari' pain macan' ta mapa' quem.

João 4:14

Wari' co toc nain com ca mi' ta' ta' ca' iri na ne, om ta toc ta' com mami' ca. Com ca mi' ta' ta' ca', an xiho' nain ca hoi hoi ne com ca weweweo cara ma'. Weweweo pe tarain ximicon wari' co howa napa'. To' e' cara ac con tara, mi' ac tocwa tara pain ca pe ho' cara con Iri' Jam pain pawin quem na ca tomi' cam ma'.

João 5:24

Je ca tomi' xuhu' ca', tomi' iri'o' inuhu' ta ac tococwa na. Oro wari' co taraju wet nanain capija ca', oro wari' co howa nonon Te pain ca hwet roron oro wari' ta capa' ca', ma' ac cocon na ca om pi' ra ha' ne ca e' wa pain pawin cain. Om ta wap tococwa pain ca caracat nucucun. Wara witan ca' nanain ca cono' wa. Wara ma' nonon ca om pi' ra ha' ne ca e' wa pain pawin cain.

João 6:27

Je ca tomi' xuhu' ca' ac tococwa na. Ta taramaja mi' hwein capam' ca om awi cara ma' me ta. Taramaja mi' jein capam' ca om pi' ra ha' ma', ca mi' nain ca e' cara wa pain pawin ma'. Mi' pan xuhu' pain, wata' pain ca Iri' Wari' ta' ca', mi' pan xuhu' pain. Tomi' ara xi' napa' pain Te Iri' Jam ta. Mi' roron pain ta napa' pahu' ta ac tococwa na.

1 Coríntios 13:3

Cut mi' cut mi' pi' pin paxi' toton pain caramaju oro wari' co om nonon carawa ma'. Om paxi' tara ca nain ho' tain cwere ca', tom pin ma' tatarapa' ne paxi' toton oro wari' co noc mi' nanapa' pain ca howa ton Iri' Jam cwa' quem. Mo ta om an xiho' ton Iri' Jam pain ca om noc capari' ca', je pain ca om noc cocon oro wari' ma' quem, om ta quep xiho' capa' ca cut mi' tain caramaju, om ta quep xiho' capa' ca om nain ho' xije quem. Om ca hohot ma ta ac capa' tara Iri' Jam.

Gálatas 5:6

Xi quep xiho' capari' ca wac xirac xine taparinain ca xirac nexi' ta. Pain ca howa xun Cristo Jeju pain ca to' hohot pan capari' ca', mo ta wac xirac cacapari', mo ta om wac xirac cacapari', an an ari na con Iri' Jam. Om ca tocojin' capari' pain i ma'. Noro e' nain ca howa nexi' pain ca howa xun Cristo. Om iri na ca noc caracan xijexi' ne, querec pin' ac capari' na pain ca howa xun quem.