Lucas 10:2 - Tradução Bíblica Pacaas Novos

² Tomi' xo' mam' ac tococwa na: Noro jujun oro wari' cwa'. Taraju xin paxi' nanain capijacon Iri' Jam. An xiho' paxi' nanain cote ne trigo ca paca' pin ma'. Ane ma' paric ca' e' caca wari' co cat xin nanain ne, je pain ca pijim' mi' xun cocon pain capijacon Iri' Jam. Je ca tomi' xuhu' ca' ac tococwa na. Tomi' jun Iri' Jam co ac waximain xitot ma'. Tomi' ca' jun: Ma' paric ca' e' ara xi' nana wari' co pijim' xin nanain capijam. Tomi' roron oro wari' nem co taramaja mi' nenem ma', pijim' mi' jujun pain capija oro wari' ta roron. Ac ca taramaja mama' cacain totam ma' tara, ac ca cat cacain cote ne trigo ma' tara pain ca pijim' cacain capijam ta, ac i ma' tara ca tomi' hun Iri' Jam ta.

Lucas 10:2 Iomraidhean Croise

Mateus 20:1

Pijim' ac caparut na: Carawa ca ara ne pain ca taramaxicon pe ho' toton cocon oro wari' Iri' Jam ma', an xiho' nain carawa ca ara ne con waximain totain uva ma'. Iri' xo' xec pin iri na ne, mo tomi' xo' toton caram ma' co taramaja xi' nana ma' ac ca na, mo hwet ac tococwa na.

Marcos 13:34

Carawa ca ara ta' ne pain ca in qui' ta' ta' ca', an xiho' tarain carawa ca ara ne con waximain xirim co mao nain pira. Tomi' mam' ac tococwa na oro wari' co taramaja mi' e' nonon ma'. Querec wet jein xuru pain oro caramaju pa'ao' ac tococwa na, mi' mi' xam' ac tococwa na pain ca taramaja nucucun. Tomi' mam' ac con na wari' co querec wet nain man ca corom ac xine xiricon ma'. Ma' tara xumum pain ca winim' xo' mapa' pain ca in qui' ta' ne ta non, mao ac ca na.

Marcos 16:15

Mama' jein oro xijein macan' ta ac tococwa na. Pijim' hwet pijim' hwet xam' jujun pain capija pain ca to' witan toton ta' oro wari' ta na ca tomi' tococwa ma'.

Marcos 16:20

Pijim' mama' ac cacain na oro xijein macan' co taxipa' ca ma' quem. Quep xiho' tamana nonon Taramaxicon nexi'. Mi' nonon pain ca ara cacain oro ca om ara taxi' ne ca wari' wa ma'. Ac i ma' na ca to' querec pin' tococwa pain ca pijim' iri'o' nucucun pane. Je i ma'.

Lucas 9:1

Tomi' cut in ac tococwa na co taxipa' ca ma', co ma' 12 nana ma'. Mi' inuhu' pain ca tomi' jein pin huhun oro caxicon jam, je pain ca quep xio pin huhun oro wari' co caxi nana ta ac tococwa na.

Atos 11:19

To' pa' pin iri ta Estêvão cara pane ne, ja' tequi' quep em' ac tococwa na co howa nonon Jeju. Wawaran mama' ac caca na pain oro xijein macan'. Ma' nana co mama' nanain macarain Fenícia, ma' nana co mama' nanain xixi pan nein macan' Chipre. Ma' nana co mama' nanain xijein cidade pain Antioquia quem. Pijim' paxi' nanain capijacon Iri' Jam, ane pijim' hwet e' cocon pain ca win judeu caca ne.

Atos 13:2

Ac i ma' ac i ma' nana, cut in ac xucucun na pain ca tomi' xun cocon Iri' Jam. An to xin ca cao' wa, ma' ta momon tomi' e' xun Iri' Jam ta nana, ara ac cacain na. Pain ca tomi' cocon ma', tomi' ho' pan ac cocon na Tamataracon Iri' Jam: An to ni mi' xine con Barnabé con Saulo ma'. Ma' na ca taramaja wa ca ara je toton ta. Ac i ma' na ca tomi' cocon Tamataracon Iri' Jam.

Atos 13:4

Mama' ac caca na Barnabé con Saulo. Xi om ne ca mama' je pan ara cocon Tamataracon Iri' Jam ta. Xuruxut xuruxut hwet ac cacain na cacarain com pain Selêucia, je i ma' wixinain cidade pain cacarain com. Corom mama' ac cacain na mam' horoho wa, horoho mama' ac caca na. Horoho horoho hwet ac cacain na xixi pan nein macan' Chipre.

Atos 20:28

Ma' tara xumuhu' me, ara xite xujuhu' pain ca xuruxut xo' hwe ma' ac tococwa na. Querec wet jujun oro wari' co howa nonon Jeju pain Éfeso ma'. Win ne ca querec wet jujun ta cuhu' Tamataracon Iri' Jam ca'. Ac oro ovelha nuhu' ara xi' nana. Ac pastor co querec wet taxipa' nain winacon je, querec wet jujun, pa' mi' jujun pain ca cut in xucucun pain ca wari' nucun Iri' Jam caca ma'. Mam' to' witan ara xi' tata pain quicon Panxica pane ta.

Atos 22:21

Om na ta ac capa' na. Mao ra, mao rain pira inem. Tomi' hwet ne cocon oro wari' co om judeu nana inem ta napa'. Ac i ma' na ca tomi' cocon oro wari' Paulo ma'.

Atos 8:4

Co howa nonon Jeju ma', co ja' wawaran wawa ma', pijim' pijim' ac cacain na capijacon Iri' Jam pain oro xijein cidade ca mama' caca ma'.

1 Coríntios 12:28

Wirico Iri' Jam co an to xo' napari' pain ca coximinain curucun Cristo iri' ca', pain ca cut in xijexi' pain ca howa xun ca'. An to xo' an to xo' pi' pin napari' pain curucun Cristo. Mo nana: Mi' cain' napari' cocon oro apóstolo co tomi' hwet nanapari' pain capijacon con Jeju. Ma' ac caca na co pijim' hwet nanain capijacon Iri' Jam. Ma' ac caca na co tomi' xo' nanain quem. Ma' ac caca na oro xucucun quem, co an hwet taxi' nanain ca hwara' opa nucun Iri' Jam pain ca ara taxi' cacain oro ca om ara taxi' ne ca wari' wa ma'. Ma' ac caca na co to' xio taxi' nonon co caxi nana, co quep xiho' taxi' nana quem, co taramaxicon taxi' nana, co tomi' taxi' nanain xijein ca capija wa ca om wara tomi' taxi' caca, ac i ma' iri' pain ca coximinain curucun Cristo iri' ca'.

1 Coríntios 15:10

Ane xiram pa' e' capa' Iri' Jam ne. Wirico co mi' napa' pain ca pijim' wa capijacon. Xiram pa' napa'. Je ca ha' capa' pain ca pijim' tamana tain capijacon ca'. Taramaja tiquin' ca' inonon oro xucucun apóstolo. Om paxi' na ca wata' ne co taramaja cwa'. Wirico Iri' Jam co xiram pa' napa' pain ca taramaja wi capa' ca'.

2 Coríntios 6:1

Je ca tomi' mip urut pahu' pain ca taramaja wi urut con Iri' Jam cwa'. Xin ne cara jun pain ca xiram pa' xuhu' ta cuhu' ma'. Ma' ta om werem pa' ne capijacon pahu' ta urut pahu'.

Filipenses 2:21

Oro xucucun cwa', win xumu win xumu pi' pin nanain oro ca param pan nucucun. Om ca win xumu cacain ca param pan nucun Jeju Cristo.

Filipenses 2:25

Coromicat ca' ina con coxari' Epafrodito cwa', co quep xiho' napa' pahu'. Taramaja wi napa', ari wi urut cocon oro wari' co noc nonon Cristo cwa'. Wara mam' paxi' mahu' con pane. Hwet ron, quep xiho' ron ta hun pain cara pane. Quep xiho' paxi' napa' pain oro ca to' i'ina napa' ca' quem. Ane na e' ne pain ca in hwet roron oro win ma' nem ta ton pahu' ne.

Filipenses 2:30

Xi om ne ca win xumu ara con Cristo ta. Je ca mi' pin ta' ca ira. Om iri na ca ha' cuhu' pain ca quep xiho' pan mahu', quep xiho' pan ac capa' na. Om ca nain ho' cain curucun pain ca quep xiho' xim ta capa' pahu'.

Colossenses 1:29

Je ca taramaja tamana ta' ca', mija na ca taramaja ta' ca'. Mam' taramaja inain ca hwara' opa nucun Cristo co pe ho' napa' cwa' quem.

Colossenses 4:12

Mam' pe wet inonon ta nuhu' win ma' nuhu' Epafras cwa', co taramaja mi' non Cristo Jeju cwa'. Mija na ca tama' tomi' mi' cuhu' con Iri' Jam quem. Ma' ta ximicon hwanana caca ma', ma' ta hwara' opa caca pain ca howa nucucun ma', ma' ta om tara con ta'a camain' quequem pain oro ca param nem ca ara je momon ma' non pain ca tomi' mi' cuhu' con Iri' Jam.

1 Tessalonicenses 2:9

Om ca mam' pe wet maparut pain ca taramaja tamana nuxut pain ca cut xin urut pain dinheiro ca mam' cut urut pain carawa ca cao' wa pane ra xere? Mam' pe wet maparut pain ma' ira. Jam' tamana urut pane. Ca taramaja urut, ca pijim' pijim' mi' ac urut pahu' na pain capijacon Iri' Jam con Jeju, ca taramaja taramaja urut, ca pijim' pijim' ac urut na pane. Pain xec je pain xim, taramaja tamana urut pane. Ma' ta om to' i'ina xuxun pain ca tama' xiram pa' xut xuxun ta urut pahu'.

1 Tessalonicenses 5:12

Tomi' ho' xim urut pahu' pain i ca' quem xere: Querec pin' jujun co taramaja tamana nana pain ca querec wet cucuhu' ma', pain ca tomi' xo' cucuhu' con Taramaxicon nexi' ma', je pain ca hu cucuhu' pain capijacon ma'.

2 Tessalonicenses 3:1

Tomi' xim urut pahu' pain i ca' quem xere. Tomi' mi' xut con Iri' Jam me. Ma' ta na caparut pain ca pijim' pijim' tiquin' xut pain capijacon con Taramaxicon nexi'. Ma' ta mija mija tiquin' hap caca oro wari' co taraju nanain ma'. Tomi' querec te tatarain pain ca howa cacain quem. Win hwe pane.

1 Timóteo 4:10

Je ca taramaja tamana iri' ca'. Xi howa ara xun Iri' Jam co e' cara ma', co to' witan ton nonon oro wari' ma'. Iri' Jam ma', pain ca howa xun ca', param tamana napari' pain ca witan wa.

2 Timóteo 4:5

Ac i ma' tatara co noc nanain capijacon Iri' Jam. Wum iri na ne, ma' tara xumum ta Timóteo. Tama' coromicat xo' ra pain oro carawa ca ara nem. Quereme rain oro ca to' i'ina nem ma'. Pijim' mi' roron pain capijacon Iri' Jam oro wari', pijim' mi' roron pain capijacon Iri' Jam ca tomi' hwet napari' con Cristo Jeju co to' witan xim napari'. Ara ara pi' pin rain oro ca ara ra quem Iri' Jam pain ca taramaja mi' mon ma' quem.

Filemom 1:1

Paulo ina pain ca xirao' mi' xim ca' Filemom. Tao' pe nanapa' pain xirinain ca tao' to tao' to to wa ca', xi om ne ca taramaja mi' ara ton Cristo Jeju ta. Wata', wirico coxari' Timóteo cwa' quem, xirao' mi' urut pum pain ca tomi' querec te tamana urut pum ca', je pain ca taramaja wi maparut ma'.

Hebreus 3:6

Cristo cwa' iri na ne, co taramaja xo' taxipa' ma', querec wet xo' nain xiricon Cote ca, xi om ne ca iri' panxica ara ca ta. Xiricon Iri' Jam iri' quem. Je ca tomi' xuhu' ca'. Mo ta howa cara urun pain ca winim' xin oro carawa ca mi' xim capari' Iri' Jam cwa', xiricon ac iri' na ta.

Apocalipse 2:1

Tomi' ac capa' na: Xirao' mi' ron co ma' co querec wet nonon co howa to nanain Éfeso. Xirao' mi' ac i ca' ron: Je i ca' ca tomi' xim cuhu' co cut 7 non pijo' pain micon ma', pain iri' curucun ma', co xut in pe nain ximijain oro ca mam' tom pe ne naran ma', ca ma' 7 ma', ca mam' quep xine pain ouro ma' quem, tomi' ca' xim nuhu':