João 8:44 - Tradução Bíblica Pacaas Novos

⁴⁴ Te hun Caxicon Jam ma' ira. An xiho' hun quem. Wara to' pa' taxipa' non wari' pain ca xo' quep qui' xine macan' pane, mao ac ne ma' na con, je curucun mao na. Noc nain ca tomi' iri'o' wa. Om ca tomi' iri'o' taxi' ca. Tomi' mixein iri na ne, ara e' nain carawa ca maqui' nain ximicon. Xi tomi' mixein taxipa' ara ca ta. Wirico co ja' tomi' mixein nonon oro wari' co tomi' mixein nana ma' quem.

João 8:44 Iomraidhean Croise

Mateus 12:34

Je ca tomi' xuhu' ta oro caxicon em'. Ma' tara ca awi ac ne ca tomi' nuhu' pain ca om awi pan nuhu' ra? Carawa ca coromicat taxipa' hwe pain iri' xumuhu' ma', je ca tomi' hwet hwe pain capijahu' ma' quem.

Mateus 13:15

Xi coromicat xo' je na hwe ta. Ac ca tatep pa' hwein na tarajuhu'. Ac ca pi'am to hwe na quem. Xi miri'om ara mahu' ta. Mo xi om ac i ma' hwe, ha' ac cuhu' xira pain ca querec pin' mahu'. Ha' ac cuhu' xira pain ca taraju wet mahu'. Ha' ac cuhu' xira pain ca taraju pa' hwe pain iri' xumuhu'. In hwet ac mahu' xira, to' witan ac xuhu' xira quem. Ac i ma' na ca tomi' ca Iri' Jam pane, pain ca xirao' pe cain ca tomi' nucun profeta Isaías cara pane ta naparut.

Mateus 13:38

Totacon ma' iri na ne, an xiho' nain macan' ca to pan caca oro wari'. Trigo ca awi tocwi ma', an xiho' nonon oro wari' co taramaxicon pe ho' ca Iri' Jam. Caji tononoin ma' iri na ne, an xiho' nonon oro wari' nucun Caxicon Jam quem.

João 6:70

Wata' paxi' na co tora' pi' pin nuhu' pain ca 12 hwe ma' ac caparut na. Ane ma' ca win ma' nuhu' co tomi' ha' non Caxicon Jam ma' ne na ca tomi' caparut ma'.

João 7:17

Wari' co ara tain nain ca param nucun Iri' Jam ma', querec pin' ac cain tara ca pijim' ne pain ca ca' na tain capijacon ca'. Querec pin' tarain pain ca om maqui' capa' ca'. Querec pin' tarain pain ca maqui' con Iri' Jam.

João 8:38

Tomi' hwet inuhu' pain oro carawa ca querec ta' pain ca pe ho' pe ho' wet ton Te pane. Wahu' iri na ne, ara hwein ca ca' na cuhu' cote hwe ma' na ca tomi' tococwa ma'.

João 8:41

Je ca tomi' xuhu' ca': An xiho' hun iri' cote hwe ma' ira na ca tomi' tococwa ma'. Cain' cain' xima quem? Ma' na coturut ta, wirico Iri' Jam. Om ca te urut con xucun na ca tomi' cocon ma'.

João 8:55

Om ca querec pin' camain' hun ta. Wata' iri na ne, querec pin' inon. Mo xi tomi' ca' ta': Om ca querec pin' ton, mo xi tomi' ac i ma' ta', tomi' mixein ac ta' xira. Win hwe ma', pain ca tomi' mixein hwe ma'. Ane querec pin' ton ne. Tomi' ha' inon quem.

Atos 13:10

An xiho' a ximon Caxicon Jam ta! Ari ari pi' pin main oro ca awi wa ta. Iri' waximain ca mixein wa pain ca pan tem wa a xima. Je xi tomi' napat maho' qui' mon Iri' Jam pain ca iri'o' nucun quem? Mixein taxipa' a xima, tomi' ni ca' a ximain capijacon ca iri'o' ta na ca tomi' carapita con ma'.

Atos 24:9

Iri'o' na ca tomi' nucun Tértulo cwa' ac caca na oro taramaxicon nucucun oro judeu co coco' to ho' nonon ma' quem. Oro ca tomi' nucun pain ca tomi' hwet quem, pain ca pan tem nucun Paulo cwa', iri'o' na ta nonon taramaxicon.

Atos 5:3

Tomi' querec pan ac con na Pedro: Para om ari mon Caxicon Jam pain ca quep mip xim quem ma', pain ca mixein rain Tamataracon Iri' Jam quem ma' Ananias? Xi pe ho' cara ara quem tamain dinheiro ca cut ma pain macaram ta.

2 Coríntios 11:3

Je ca toron capa' xumu pahu'. Am mixein xim cucuhu' oro co pijim' ximama' nunuhu' ma', am to' em' xin cacain ca coromicat nuhu', am param param om pin hun Cristo, am win xumu win xumu om pin hun quem. Win cama Eva cara pane, pain ca ha' con em' pain ca tomi' mixein cam pane. Noc inuhu' pain ca an xiho' hwem ta.

1Pedro 5:8

Ma' tara xumuhu' con Caxicon Jam ma', co noc nuhu' ma'. Pirao' nuhu', an xiho' non copacao' co xararac ma', co tama' xut in xut in pain ca pirao' cain carawa ca cao' wa ma'. Ac i ma' nuhu' Caxicon Jam quem. Quep xim nuhu'.

2 Pedro 2:4

Taxi' urun Iri' Jam pain ca wap toton cocon ma', xi xiram pa' tococwa oro jam co caracat nana pain ca taramaja mi' cocon pane. Wixicaracao' mi' tata pain cote ne man ca om tawirinain cain, ca jitacat tamana xim nein cain. Pao' to tata, to wet iri caca ma' ac tococwa na. Winim' e' jein xec nein ca wap xim xuhu' ta tata.

1João 1:8

Tomi' ca' iri iri' ne, om napa' ca caracat wa ta, am tomi' ac i ma' iri'. Cain' cain' xixi' quem? Om na ximixi', xi coromicat xo' iri' ta. Om ca win cwere capari' Iri' Jam co iri'o' quem.

1João 2:21

Pain ca xirao' mi' xuhu' ca', om ca coromicat mi' ca' xuhu': Xirao' mi' toton, xi querec pin' cacain capijacon Iri' Jam ca iri'o' ta, om ca coromicat mi' ac i ma' xuhu' ta. Taxi' inuhu' pain ca querec pin' hwein capijacon Iri' Jam ca iri'o'. Taxi' inuhu' pain ca taraju pa' hwein i ca' quem, pain ca om mixein camain' ne capijacon Iri' Jam ca iri'o'.

1João 2:4

Wari' co tomi' ca' ma', querec pin' inon Iri' Jam ta na. Mo ta om tomi' ha' con pain oro ca ara ra con ma', mixein ac ca na. Xi tomi' ha' pan con Iri' Jam co iri'o' ta.

1João 3:12

Om ta an xiho' xun Caim co wari' ne ca Caxicon Jam pain cara pane. To' pa' pin non coxa' ca pane. Para to' pa' pin con quem? Om na, taraju pa' je e'. To' pa' pin non coxa' ca, xi om ne ca pan tem taxipa' pan ara ca ta. Noc non coxa' ca pain ca ara xo' taxipa' ca quem.

1João 3:15

Wari' co noc taxipa' non win howa ca ma', ac ca to' pa' pin con na. Cain' cain' xira quem? Ma' non ca om pi' ra ha' ne ca e' wa pain ca to' pa' pin con win ma' ca ra? Om na, wara taxi' irin i ma' ta.

Judas 1:6

Mam' pe wet jujun oro jam co taramaja mi' nonon Iri' Jam pane quem. Taramaja mi' paxi' nonon, hwara' opa paxi' nana pane ira. Ane om ara xo' cara pan cacain ca taramaja nucucun ne. An to pin nanain, an to pin nanain ca to pan caca pain pawin cain quem. Je ca tao' to pin cocon Iri' Jam quem. Tao' to to nonon pain ca jitacat nein xim cain. Pao' to mip nonon pain arain too ca om em' ra na ma'. To wet iri caca ma' ac tococwa na, winim' e' jein iri' xec nein ca wap xim xuhu' ta ac tococwa na.

Apocalipse 12:9

Xin hwet pin ac tocwa na co ma' co ac cote ne caji hop ma'. Wirico co ma' co caxicon em' cara pane, co mixein nonon hwanana pain cara pane. Wirico co Caxicon Jam ma', co Satanás na xijein wixicon ma', wirico co mixein taxipa' nonon oro wari' pain macan' ca'. Xin pan' hwet pin ac tocwa na pain macan'. Wixicaracao' camara' hwet pin ac tococwa na pain macan' oro caxicon jam co taramaja mi' nonon ma' quem.

Apocalipse 13:14

Mixein mixein pi' pin tata oro wari' co to nanain oro xijein macan', xi om ne oro ca ara ca ma', ca om ara taxi' ne ca wari' wa ma', ca ara ra pan con co hwet qui' cain' ma'. Tomi' ac tococwa na oro wari': Quep jein caji pacun ma', ara an xiho' jein curucun co ma' co hwet qui' cain' ma', co to' pa' pin paxi' wa pain cote ne quit ma', co e' mami' ma'. Pe torotop mi' querec te ac hwein tara ta, ac i ma' na ca tomi' tococwa oro wari'.

Apocalipse 2:10

Ta jin' hwein oro ca jain jain wa ca maqui' pa' xim nuhu' con Caxicon Jam me ta. Ma' tatara oro win ma' nuhu' co wixicao' mi' ca pain xirinain ca tao' to tao' to to wa, quep em' querec ac tococwa tara, am an pe pin xin hwein ca howa nuhu' ta ac tococwa tara quem. Ma' 10 tara xec pain ca jain jain xi' hwe pain ca quep em' xim cuhu' Caxicon Jam. Win xumu cara xine me. Mo ta to' parapa' pin xim cucuhu' pain ca howa mahu' ma', je i ma' ira, to' parapa' pin ma' tatarapa' ne ac huhun tara. Mi' pan ac xuhu' tara pain ca om pi' ra ha' ne ca e' wa ta.

Apocalipse 21:8

Ac i ma' paxi' toton oro co hwara' opa cara nana pain ca howa nucucun ma', ane om ac i ma' toton oro xucucun co caracat cara nana ne. Mo nana: Co jin' nanain ca quep em' wa pain ca howa nucucun ma', co om howa je ha' nana ma', co ara taxipa' nanain oro ca om querec awi non Iri' Jam ma', co to' parapa' pin nonon wari' ma', co quep ximama' xequequem ma', co ara xirac nonon oro wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co tomi' mixein nana ma' quem, wixicaracao' mi' ac tococwa tara pain iri' maxicocon ma', je pain cote ne xe ca ac xuterem' ma', ca wiran wi nain pacun ca weo tamana ma', ca enxofre caca oro wari' ma'. Cote ne xe ma', tomi' joc mam' mi' nain ca cono' mami' wa pain ca to ni cara ca' xun cocon Iri' Jam ta.

Apocalipse 22:15

Om ta corom ac caca oro caracat co ac caxicon oromijac. Mo nana: Co ara xirac nonon oro wari' ma', co quep ximama' xequequem ma', co to' parapa' pin nonon wari' ma', co pe torotop mi' querec te nanain oro caji pacun ca Iri' Jam xi' ma caca ma', oro co hohot nonon ca tomi' mixein wa ma', co tomi' mixein taxipa' nana ma' quem. Oro wari' co ara nanain i ma', om ta corom ac cacain cidade nucun Iri' Jam.

Apocalipse 9:11

Ma' na caxicon jam co taramaxicon pe ho' non quem, wirico caxicon jam co taramaxicon pe nain cote ne man ca om tawirinain. Abadom na wixicon pain hebraico ma', je i ma' wixinain capijacocon oro judeu. Pain capijacocon oro grego ma' iri na ne, Apoliom na wixicon.