João 4:6 - Tradução Bíblica Pacaas Novos

^6-8 Je ca pe ne manain com ca xe' ca Jacó pane quem. Cut xi' carawa ca cao' wa ta ac urut na pain ca taxipa' urut con Jeju ca', mama' ac urut pain na cidade. Jeju ma' iri na ne, xao pe ja' pan nain manain com ma'. Xi om ne ca jam' pin ara ca pain ca xut wa ta. Tocon xina pin na. Maqui' ac cama na narima' nein Samaria. Cam ta' com na. Tomi' ac cam na Jeju: Xiram pa' ne, cam mi' wijimain ne pain com ma' nam.

João 4:6 Iomraidhean Croise

Mateus 27:45

Tocon xina pin iri na ne, xim pin ac ne na. Iri' xim na, xim xim pi' pin na pain oro xijein macan'. Piquirim pin iri na xina ne, pain 3 hora ma', toha pin mami' ac ca na quem.

Mateus 4:2

Mon to wet ac cain na i cain. Om ca cao' ca. Noc nain ca cao' wa. Ma' ta tomi' ton Te ta na. Ma' 40 na xec, ma' 40 na xim pain ca om cao' ca pane quem. Pe' pin ac ca na.

Mateus 8:24

Pan horoho pan horoho. Ane ane maqui' ac ne na camana' ca nuru mip tamana. Wap tamana na com ta! Moin' pin tain na mam' horoho nucucun com ira. Ane pi'am ca Jeju ne.

Lucas 2:7

Pain ca xo' tan' mama' cacama ma', noro paxi' nanain ca pi'am to wa pain xirim ca pi'am to caca oro wari' co maqui' nanain pira. Ane om mam' cacamain ca pi'am to wa ne. Pi'am to e' nanain xirinain burro je ovelha. Je ca pan' pe ca cawinacam. Je win ma' cam pije', wirico co pan' cain' cacam oro xequequem humaxicam co camara' xi' nana pa'ao'. Wiric pa' ac con na con wom, an terem' pe ac con na pain pana ca cao' to ne oro carawa.

Lucas 9:58

Tomi' ac con na Jeju: Noro rain oro carawa pain mi ma'. Ma' ma' xam' nain ca pi'am to nein. Noro rain oro me ma' quem. Ma' ma' xam' nain xirinain quem. Wata' iri na ne, pain ca Iri' Wari' ta' ca', om napa' xirim ca pe xo' ta' ca' na ca tomi' con ma'.

João 11:9

Om na ta ac caparut na. Ma' 12 na hora nein xec. Mo ta xut cain xec wari' ma', om ca xut macoru ca. Xi querec pa' ara ca pain ca toha nein xec ta.

João 4:12

Manain com ca', mi' napari' pain hwanana nexi' Jacó cara pane. Wirico co toc nain cominain, toc nanain mana panxica, toc nain oro winacon pane quem. Hwara' opa tiquin' ca' inon xi' ma mon pain ca cam mi' xim mapa' pain com ca to' e' cara nain ca wari' wa ra na ca tomi' con ma'.

João 4:5

Xuruxut tiquin' xuruxut tiquin' ca' urut pain oro xijein cidade ca to nain Samaria, aram aram hwet ac urut pain na Sicar, je i ma' cidade ca hwet urut ma'. Sicar ma', pe ja' pan nain macaracon Jacó cara pane, ca mi' con panxica José pane.

2 Coríntios 8:9

Win ca Taramaxicon nexi' Jeju Cristo cwa'. Taxi' ara xi' hun pain ca xiram pa' tamana capari'. Caramaju tamana paxi' na pain ca hwara' opa tamana nucun pain ca taramaxicon nucun pane, je pain ca Iri' Jam nucun pane. Ane an pe pin tain pahu' ta capari' ne. An pe pin iri nain ne, wari' pin ac ca na, ximin pin ac ca na quem. Ma' ta to' caramaju pin xuhu' pain ca mi' xim xuhu' pain oro ca awi wa con Te ta napari'.

Hebreus 2:17

Je ca na e' ne pain ca an tan pan pin capari' pain ca xere capari' ca'. Ma' ta ha' con pain ca sacerdote wa pain ca iri' taramaxicon pin ta' ca ma', pain ca xiram pa' capari' ma', pain ca ara xo' cain ca taramaja nucun pain ca taramaja mi' con Cote ca ma' quem. Ma' ta pe cain maxixi' pain ca mi' pin caho' capari' ca', pain ca xic am pin cain ca caracat nexi' Cote ca quem.

Hebreus 4:15

Xi taxi' ara capari' pain ca om hwara' opa nexi' pain ca wari' nexi' ta. Ha' non pain ca xiram pa' capari', xi wara tomi' querec ximao pan ara tocwa pain oro ca caracat wa pane ta. Wirico Caxicon Jam co caracat ra caracat ra non pane, win capari' pain xocori ca' quem. Ane om caracat camain' ca ne.