João 20:1 - Tradução Bíblica Pacaas Novos

¹ Domingo pin iri na ne, pain iri' xo' xec ma', mao ac camain na manain pacun Maria Madalena. Om ca hwet querec ca xina, xim xim wet na, mao ac camain na manain pacun. Querec ac camain na ca wara joc panajao' pin xine pacun ca tao' pa' nain manain ma'.

João 20:1 Iomraidhean Croise

Mateus 27:56

Mo nana: Maria Madalena ma', Maria jicon Tiago con José ma', jicocon mana panxica Zebedeu ma', ma' nana oro xequequem ma' quem, noro pira nonon Jeju.

Mateus 27:60

An corom pe ac cain na curucun Jeju pain manain pacun ma', ca an corom pe pe xin cacain cwere oro ca nari ne pain ca aram aram mi' pin ta' ne pan ca ma'. Om ca pain homa ne ca xe' xine. Xocorinain ta. Je ca an corom pe pe cain curucun Jeju. An corom pe pin iri nain ne, joc in ac cain na cote ne pacun pain manain ma', tao' pa' pin ac cain na, mao ac ca na quem.

Mateus 27:64

Je ca tomi' xim urut pum ca' taramaxicon ac cocon na. Na e' na pain ca tomi' momon oro soldado nem. Querec wet xo' jein manain pacun ca an corom pe pe xine curucun Jeju ta roron. Ma' 3 tara xec nein ca querec wet xo' cacain. Ma' ta om maqui' caca co taxipa' nonon ma', ma' ta om an noc xa mao cacain curucun ma'. Mo ta ha' cocon pain ca an noc xa mao cacain curucun ma', tomi' ximama' ac cocon tara oro wari', e' mami' na ta ac cocon tara. Pain ca e' e' wet nucun pane, mixein taxipa' tata oro wari' pane. Mo ta tomi' mixein mami' tococwa oro wari' pain ca e' mami' na ta cocon ma', tiquin' mao tara ca mixein tococwa oro wari' pain xocori ca' quem na ca tomi' cocon Pilatos.

Mateus 27:66

Mama' ac caca na, xirao' pin ac cacain na pacun ca mam' tao' pa' xine manain pacun. Ma' ta taxi' xun wari' co meo nain ta nana. Querec wet xo' jein ta ac tococwa na oro soldado ma', mama' ac caca na.

Mateus 28:1

Pi' pin iri na sábado ne, xec pa' ac cacam na pain domingo. Iri' xo' xec pin iri na pain domingo ne, maji querec xin manain pacun ca an corom pe pe xine curucun Jeju ta ac cama na Maria Madalena cam xequem Maria ma', mama' ac cacama na.

Mateus 28:2

Ane ane cocoroc mip ac ne na macan', xi quiji' qui' ara cain pawin jam co taramaja mi' non Iri' Jam ta. Xut hwet ac cain na manain pacun, joc panajao' pin ac cain na pacun ca tao' pa' nain manain ma', xao pe ac cain na pacun ma' quem.

Marcos 15:46

An ac con na cote ca wom co awi José ma'. An quiji' ca' ac cain na curucun Jeju pain panaxicon, wiric pa' pin ac cain na con cote ca wom. Wara ca' na man ca wara xe' wa pain pacun ma', an corom pe ac cain na. Joc in ac cain na cote ne pacun pain manain ma', tao' pa' pin ac cain na.

Marcos 16:9

E' mami' iri na Jeju ne, pain iri' xo' xec pain domingo pane, hwet pa' cain' ac cam na Maria Madalena ma', co wara quep xio ca pane, pain ca tomi' jein ca' cam cocon oro caxicon jam co ma' 7 nana pane.

João 11:38

Xiram pa' mami' ac tococwa na. Mija na ca jain jain ca cocon. Xut hwet ac cain na ca an corom pe pe cacain curucun ma', pain manain pacun ma'. Ma' na wirain pacun ca mam' tao' pa' caho' cacain quem.

João 11:41

Joc hwet pin ac cacain na pacun ma'. Noro pawin ac ca na, tomi' ac con na Cote ca: Tomi' querec te inem pain ca ha' mapa' pain ca tomi' xim ca' Te.

João 19:25

Coco' ja' pan nanain panaxicon Jeju oro narima' ma'. Mo nana: Jicon ma'. Xequem jicon, coxa' cama jicon ma'. Maria manacon Clopas ma'. Maria Madalena ma' quem.

João 20:26

Xijein domingo pin iri na ne, cut in mami' ac xujuxut na pain ca taxipa' urut con Jeju ca'. Pe ho' naparut Tomé quem. Tao' pa' paxi' urut pain oro manain ca corom ac wa ma', ane hwet pa' caparut Jeju ne. Xat pe ac cain na ximijaxut. Ta toron ne xumuhu' me ta ac caparut na.

Atos 20:7

Domingo pin iri na ne, cut in ac xujuxut na pain ca howa urut con Jeju. Cao' wi xi' urut quem. Pijim' pan ac cocon na Paulo ma' quem. Xec mama' xi' urut quem, je ca pijim' mam' xuhu' cocon ma'. Pijim' ac cocon na, mon pijim' mon pijim', cote ne con. Mon pijim' mon pijim' ximijain xim pa' ac caparut na.

1 Coríntios 16:2

Je ca tomi' xuhu' ca': Pain oro xijein domingo ma', an to xo' jein dinheiro ca mi' xi' hwe. Ara ara xam' jein. Mo ta hwara' ne dinheiro ca cut hwe pain ca taramaja nuhu' ma', an to hwara' ac hwein tara. Mo ta om hwara' ne dinheiro ca cut hwe pain ca taramaja nuhu' ma', an to wijimain ac hwein tara quem. An to xo' ac hwein tara. Mo ta ara ac i ma' hwe, wara ma' turuhu' dinheiro ca mi' xi' hwe ma'. Om ac ne tara ca i'ina ne xumuhu' pain ca wajim' hap xujuhu' pain ca aram aram hwet xuhu' ta.

Apocalipse 1:10

Xec nein ca mam' pe wet xine ca e' mami' ca Taramaxicon nexi' pin iri na ne, pain domingo pain cara pane, pe ho' mip ac capa' na Tamataracon Iri' Jam. Taraju ac tain na ca tomi' wa ma', pain wara ma'. Tomi' mip na. Ac ca on xine caji taracom napa'.