João 17:9 - Tradução Bíblica Pacaas Novos

⁹ Tomi' mi' inem cocon. Om ca tomi' mi' xim cocon oro wari' co om howa nanapa' ma'. Tomi' mi' inem cocon co mi' mapa' cwa', xi wari' ne ara momon ta.

João 17:9 Iomraidhean Croise

Lucas 22:32

Ane tomi' mi' xim con Te quem ne Simão. Ma' ta om pan' ma con, ma' ta hwara' opa cara ma pain ca howa nem inon pum. Cwirin' pin iri rain ca caracat nem ne, to' hwara' opa ac momon tara pain ca howa nucucun xerem cwa' quem na ca tomi' con Simão Jeju ma'.

Lucas 23:34

Tomi' ac con na Cote ca Jeju: Xic am pin rain ca caracat nucucun caram cwa' quem Te. Xi ma' ne ximicocon ta. Hohot tara ma' nana pain ca tatatain mi' cacapa' pain pana ca' non. An an xam' xun womicon cwa' ta ac caca na oro soldado ma' quem. Ma' xi an non co cwa' ne, ma' xi an non co cwa' ne xucucun, ara ara ac cacain na ca ara taxipa' caca ma', taxi' ac xucucun na con wom co an xi' caca ma'.

Lucas 8:34

Caram ma' co querec wet nanain caji mijac ma', querec iri nanain caji mijac pain ca cono' cono' pi' pin ne ne, jein mama' ac caca na, tomi' hwet ac cocon na oro wari' co to nanain cidade, wiricoco oro co to nanain oro xitot ma' quem. Tomi' hwet nonon pain oro carawa ca ara ne ma'.

João 14:16

Tomi' ac ton tara Te pahu': Mam' roron con xucun co quep xiho' toton nonon, ac i ma' tara ca tomi' ton pahu'. Mam' ac cuhu' con tara. Pe ho' cara ac cuhu' tara quem.

João 17:2

Xi mi' ara mapa' pain ca taramaxicon pe ho' toton oro wari' ta. Ma' ta mi' momon pain ca e' cara to ho' quequem oro wari' co mi' xim cwa' mapa' pane.

João 17:20

Om ca tomi' mi' e' xim cocon co taxipa' ta' cwa' ac con na. Tomi' mi' inem cocon oro wari' co aram aram howa xim nanapa' pain ca taraju xin cacain ca pijim' nucucun quem.

João 17:6

Oro wari' co tora' ma pain macan' ca', co mi' mapa' cwa', an hwet mi' inonon pain ca hwara' opa nem pain ca Iri' Jam nem ta ac con na. Wara wari' ne momon, mi' ac mapa' cocon na. Tomi' ha' nanain capijam quem.

João 6:37

Mi' xim iri tarapa' cocon oro wari' Te ne, howa howa pi' pin ac cacapa' tara. Om ta tomi' in pin camain' toton co howa xim nanapa' ma'.

João 6:39

Ca' na ca param nucun Te co hwet roron oro wari' ta napa': Noc inonon pain ca mama' cacain cote ne xe oro wari' co mi' xim cwa' napa'. Param napa' pain ca to' e' mami' to' e' mami' xam' toton pain xec nein ca pi' pin ta' ne macan' ca' quem.

Hebreus 7:25

Je ca ha' con pain ca to' witan cara capari' pain ca to' wixicam pin capari' con Iri' Jam. To' witan cara napari', xi e' cara pan ara ca ta. Ma' ta tomi' mi' xuhu' con Te ta napari'.

Hebreus 9:24

Je ca tomi' xuhu' con Cristo cwa'. Om ca corom hwet con Iri' Jam pain Iri' Maxicon pain xirim ca quep pan caca wari' pane, ca an xiho' e' nain iri' xiricon pain pawin cain, om na. Corom hwet non pain pawin cain. Je ca pe pan ca pain xocori ca'. Pe ho' non Iri' Jam, tomi' mi' napari' con.

1João 5:19

Taxi' xijexi' pain ca mana panxita' capari' Iri' Jam. Taxi' ururun oro co caracat taxipa' nana ma' quem, pain ca taramaxicon pe ho' pan cocon Caxicon Jam ma'.

Apocalipse 12:9

Xin hwet pin ac tocwa na co ma' co ac cote ne caji hop ma'. Wirico co ma' co caxicon em' cara pane, co mixein nonon hwanana pain cara pane. Wirico co Caxicon Jam ma', co Satanás na xijein wixicon ma', wirico co mixein taxipa' nonon oro wari' pain macan' ca'. Xin pan' hwet pin ac tocwa na pain macan'. Wixicaracao' camara' hwet pin ac tococwa na pain macan' oro caxicon jam co taramaja mi' nonon ma' quem.

Apocalipse 13:8

Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

Apocalipse 20:15

Oro wari' co om xirao' to wa wixicocon pain tapari carawa ca xirao' to xine wixicocon co e' cara xi' nana ma', wixicaracao' mi' ac tococwa na pain cote ne xe ca ac xuterem' ta.