João 16:2 - Tradução Bíblica Pacaas Novos

² Mana' hwerehwet ca' tuturuhu' pain oro xirim ca cut in to xujuhu' ma'. Om ta corom mami' ac hwein. Om ta xica' pe ne ca mana' hwerehwet cucuhu' quem, main ma' tatara co to' parapa' pin xim nunuhu'. Coromicat ximama' tatara quem: Ara urut pain ca param nucun Iri' Jam pain ca to' parapa' pin urut cocon caram cwa' ta tatara pain ca coromicat pan teretem nucucun pahu'.

João 16:2 Iomraidhean Croise

Mateus 10:28

Ta jin' huhun oro wari' me ta. To' parapa' taxi' paxi' nanain ca cwere wa, ane om to' parapa' taxi' cacain ca tamatara wa ne. Iri' Jam iri na ne, ha' non pain ca wap cain ca cwere wa, ha' non pain ca wap cain ca tamatara wa pain cote ne xe quem. Je ca tomi' xuhu' ca': Wirico pan tara co jin' hwe ta.

Mateus 24:9

Noc ac cucuhu' tara oro wari' pain oro xijein macan'. Quep ac cucuhu' tara, cut mi' ac cucuhu' tara cocon oro taramaxicon. Ma' ta quep em' xihwe, ma' ta to' parapa' pin xihwe ta tuturuhu'. Noc noc pi' pin tuturuhu', xi om ne ca howa ara mahu' ta.

Lucas 6:22

Wahu' pain ca noc cucuhu' oro wari' ma', pain ca howa mahu' pain ca Iri' Wari' ta' ca', wahu' pain ca xin hwerehwet cucuhu' pain ca cut in to xucucun ma', je pain ca tomi' xirac cucuhu' ma', je pain ca tomi' ximama' cucuhu' pain ca pan teretem hwe ta cucuhu' ma', ara ac i ma' iri nunuhu' pata' ne, param mi' nuhu' pain ca awi wa Iri' Jam ta.

João 12:42

Oro taramaxicon nuxut pain ca judeu urut ca', om paxi' na ca howa howa pi' pin cocon Jeju pain ca maqui' con Iri' Jam. Ane ma' mija caca co howa pin nonon ne. Howa paxi' nonon. Ane om tomi' hwet pin cacain ca howa nucucun ne. Xi jin' ara cocon oro fariseu ta. Mo ta taxi' cacapari' pain ca howa pin xun Jeju cwa', mana' hwerehwet pin ac cacapari' tara, om ac ne tara ca corom mami' xin xirim ca cut in to xijexi' ca' nana.

João 16:25

Pain ca tomi' hwet xuhu' pain oro ca tomi' ne ca', pijim' joc mam' mi' inuhu' pain oro carawa pain ca ca' na xuhu' pain capijacon Te ac caparut na. Ame hwe e', main maqui' tara xec nein ca pijim' joc mam' mi' pijim' joc mam' mi' om pin xuhu'. Tomi' xo' e' xuhu' con Te. Ma' ta taraju pa' hwe con ta inuhu'.

João 16:32

Tara pahu' ac caparut na. Wixicam pin na xec nein ca wawaran mama' xi' hwe ta. Maqui' pin iri na ta. Wawaran pi' pin ac hwe tara, mama' mama' pi' pin ac hwein tara xuruhu'. An pe pin xim mahu', xica' pe ac ta' tara pa'ao'. Om paxi' tara ca xica' pe ta' quem, xi pe ho' taxipa' ara capa' Te ta.

João 4:21

Howa ne pain ca tomi' xim ca' narima' ac cam na. Wixicam pin ta' ara xi' na xec pain ca om in ac pe mami' tocwa Iri' Jam pain pacun ca'. Om ta in ac pe mami' tocwa pain Jerusalém quem.

João 4:23

Ame ma e', main maqui' tara xec nein ca in ac xo' cocon Cotere' Iri' Jam oro wari'. Je Tamataracon tara ca mi' nonon pain. Mi' totoron pain ca in ac xo' cocon pain ca querec pin' iri'o' cocon quem. Wara maqui' pin na xec nein ca in ac ac i ma' cocon quem. Oro wari' co in ac ac i ma' nonon ma', wiricoco co param pan ca Cotere' Iri' Jam pain ca in ac tatarapa' ta cocon ma'.

João 9:22

Tomi' ac i ma' na cote ca cam jicon ma', xi om ne ca jin' ara cocon oro taramaxicon ta. Wara tomi' ara xi' nana: Wari' co Cristo na ta non Jeju ma', xin hwet pin ac xut con tara, om ta corom mami' cain xirim ca cut in to xijexi' pain ca judeu iri' ca' nana.

João 9:34

He ac cocon na. Wara caracat qui' main ca pan' qui' nem ma' ira. Cain' xi tomi' xo' ac maparut con Iri' Jam quem nonon, xin hwet ca' ac cocon na pain xirim ca cut in to xucucun ma'.

Atos 5:33

Taraju iri nonon oro taramaxicon ne, mana' tamana ac cocon na. To' pa' pin xuxun na nonon.

Atos 7:56

Tomi' ac ca na: Noro je! Querec inain ca pa xat ne pawin ma'. Querec inon Jeju co Iri' Wari' cwain, pain ca xat pe ho' cain iri' curucun Iri' Jam ma'.

1 Coríntios 4:13

Tomi' em' iri nanaparut ne, tomi' taxi' tamana ac urut cocon na. Ac carawa ca om awi ta hwe, ca wixicao' caca oro wari' ma' nanaparut, ac wari' co cunu homiricocon hwe ta nanaparut. Wara ac i ma' nanaparut pane, mao ac ne ma' na parut, ac i ma' ac i ma' wet nanaparut pain xocori ca' quem.

Filipenses 3:6

Win xumu tamana inain ca howa nuxut pain ca judeu urut ca', pain ca tomi' ha' jein ca xirao' nucun Moisés ta toton oro win ma' ne. Je ca ja' tequi' ja' tequi' quep em' toton oro judeu co howa pin nonon Jeju pane quem. Tomi' ha' inain oro ca xirao' nucun Moisés pane, om ca hwet camain' ne wuxu pain ca om tomi' ha' wa quem.

Apocalipse 6:9

Co ma' co ac Wijimain Taramaji Ovelha ma', pa pin ac cain na wirain ca hupa' caho' nein tapari carawa ca joc top ma', ma' 5 pin ac ne na ca pa nein. Pa pin iri nain ne, querec ac tain na tamataracocon co to' parapa' pin wawa pain ca howa cacain capijacon Iri' Jam, je pain ca tomi' hwet cocon con Jeju oro wari' ma'. To nanain xiquijinain maxinain ca tomi' querec te pe tocwa Iri' Jam.