João 15:2 - Tradução Bíblica Pacaas Novos

² Wari' co querec wet nain panaji uva ma', ton tapiripit taxipa' nain taparain ca om wina. Taparain ca wina ma', wawac wijimain pin ac cain na. Ma' ta wina tamana ne nain.

João 15:2 Iomraidhean Croise

Mateus 13:12

Wari' co taraju wet ma', co taraju pa' xo' nain ca taraju nucun ma', mi' hwara' mami' ac tocwa tara pain ca taraju pa' wa. Wari' co om taraju pa' nain ca taraju nucun ma' iri na ne, pain ca om taraju wet xo' ca ma', an ca' ac tocwa pain tara wijimain ca taraju pa' nucun ma' quem.

Mateus 13:33

Pijim' mami' xuhu' ta ac tococwa na, pijim' joc mam' mi' xuhu' con Iri' Jam ma', pain ca taramaxicon pe ho' cocon oro wari' ma'. Carawa ca ara ne pain ca taramaxicon pe ho' cocon oro wari' Iri' Jam ma', an xiho' nain carawa ca ara ne pain ca an camain ca to' memerem nein capam' narima' ma'. Maxoc hwara' iri nain trigo ne, joc wanan ac camain na ca to' memerem nein capam'. Ara pi' pin iri nain oro ca ara nein ne, an pe ac camain na, memerem pin ac ne na quem. Ac i ma' na ca pijim' joc mam' mi' tococwa pain ca to' memerem nein capam' pane.

Mateus 15:13

Je i ma' ira ac caparut na. Oro fariseu ma', an xiho' nanain memem ca om oin' ca Te co pe pawin cwain. Ame hwe e', main horohot pi' pin totoron ta.

Mateus 21:19

Querec ac cain na panaji figo ma'. Xat pe nain cacarain wana ma'. Xut hwet ac cain na, am ma' ne winain quem paxi' na. Ane om ne winain ne. Ma' e' na tenenein. Tomi' noro ac cain na panaji. Om ta wina mami' camain' ma ta nain pain ca tomi' noro cain ma'. Mi' pin hap ac ne na con.

Mateus 25:29

Wari' co taramaja xo' ma', co win xumu nain ca taramaja nucun ca mi' ton ca', mi' hwara' mami' ac ton tara pain ca taramaja wa. Mija tara ca taramaja wa ca mi' ton. Wari' co om taramaja xo' ma' iri na ne, co om win xumu nain ca taramaja nucun ca mi' ton ca', an ca' ac ton pain tara wijimain ca taramaja nucun ta na ca tomi' ca ma'.

Mateus 3:10

Wap ho' xim cuhu' Iri' Jam ma' ira. Noro jun wari' co wara an pin nain iriquixi quit ma', co ta' caracat pin tain nain oro pana pain iri' caximain ma'. Oro panaji memem ca om mi xo' winain ma', ta' caracat pin tain tara, wixicaracao' mi' ac ca pain xe tara quem. Ac i ma' xim turuhu' Iri' Jam pain ca wap xim cuhu' quem. Ac i ma' na ca tomi' tococwa ma'.

Mateus 3:12

An to ni ca' toton nonon oro co tomi' ha' nonon cocon oro co om tomi' ha' nonon quem. Win ca wari' co an pe ni ca' tain nain ca xao pe xine tocwi trigo pain tocoxi ma' quem. An nain ca mam' pahop nucun, pahop ac cain na tocoxi, an pe ni ac cain na iri' tocwi pain xirinain, wixicaracao' mi' ac cain na tocoxi pain xe ca om jo' ra ha' ma' quem na ca tomi' cocon oro wari' João pane.

Mateus 7:19

Oro panaji memem ca om wina awi ma', ta' caracat pi' pin ac xine na, wixicao' mi' ac xine na pain xe quem.

Marcos 4:20

Carawa ca ara nain tocwi trigo ca wixicaracao' mi' wa pain macan' ca awi ma' iri na ne, tomi' joc mam' mi' nain carawa ca ara nonon oro wari' co taraju nanain capijacon Iri' Jam. Howa ac cacain na, ac ca mi caca na quem. Win ne ca mi ne arain trigo ma'. Mi 30 na wirain ma'. Mi 60 na wirain ma'. Mi 100 na wirain ma' quem. Ac i ma' na ca horon tiquin' caca pain ca howa nucucun. Ac i ma' na ca tomi' xo' tococwa pain ca pijim' joc mam' mi' tococwa con wari' co wixicaracao' nain tocwi trigo pain totacon pane.

Lucas 8:13

Carawa ca ara nain tocwi trigo ca camara' to nain pacun ma', tomi' joc mam' mi' nain carawa ca ara nonon oro wari' co tomi' querec te paxi' nanain capijacon Iri' Jam pain ca xo' taraju cacain ma'. Ane om tomi' querec te cara cacain ne. Tomi' joc mam' mi' nanain pana ca om corom mip caximain pain macan' ma', om ca corom mao nein ximicocon capijacon Iri' Jam. Howa howa ca' nanain, maqui' iri na carawa ca to' i'ina nonon ne, quep em' iri nonon oro wari' pain ca howa cacain capijacon Iri' Jam ma' ne, an to pin ac cacain na ca howa wa.

João 15:1

Wata' co Iri' Panaji Uva ta ac caparut na. Te iri na ne, wirico co querec wet nain panaji uva.

João 15:16

Om ca wahu' ne co tora' pan napa' pain ca taxipa' xun mahu' ma', om na. Wata' pan co tora' nuhu'. Mi' inuhu' pain ca taramaja wa quem. Wawaran mama' je, pijim' mi' jujun pain capija oro wari' ta inuhu'. Howa cara ac caca tara co howa nanapa' pahu' inuhu' quem. Mo ta tomi' ha' mahu' pain ca mi' xuhu' pain ca taramaja wa ca'. Mo ta tomi' ca' hun Te ma': Mi' naparut pain ca tomi' urut pum Panxima Jeju ta, mo ta tomi' ac i ma' hun pata', ha' ac cuhu' tara pain carawa ca mi' xut pain hun ma'. Mi' mi' pi' pin turuhu' pain.

João 15:3

Wara an xiho' hwein oro taparain panaji uva ca wina ma'. Xi howa ara hwein capija ca pijim' mi' xuhu' ca'.

João 15:6

Wari' co om win cwere napa' ma', ac taparain panaji uva ca om wina ma', ca xin pin wa ma', ca mi' pin ma'. Oro taparain panaji uva ca cono' ac i ma' ma', cut in ac xine na, wixicaracao' mi' ac xine na pain xe ma', wiran mao ac ne na quem.

João 15:8

Mo ta ara hwein oro ca hohot non Te ma', querec pin' ac cocon tara oro wari' pain ca hwara' opa nucun pain ca awi tamana nucun. Ac i ma' tara ca an hwet pe hwein ca taxipa' mahu' ma' quem na ca tomi' caparut.

João 17:12

Pe ho' pe ho' wet iri inonon ne, narain ho' ac toton na pain oro ca om awi wa pane, mam' narain ho' inonon pain ca hwara' opa nem ca mi' mapa' pane. Querec wet xo' inonon. Om ca pan' ara'am camain' caca. Ma' xica' pe e' na co ma' co mao tarain cote ne xe ta ma pain cara pane, pan' am na co ma'. Ma' ta hwet pin ne ca xirao' pe xine pain capijam con pane ta non.

Romanos 11:17

Panaji oliva ma', an xiho' naparut pain ca judeu urut ca', ac iri' panaji oliva urut. Ac ca jicaracat paric xine na taparaxut, maqui' ac hwe na pain ca om judeu hwe ma', pain ca an xiho' hwein taparain panaji caji oliva ma', an tan pan mi' ac xihwe na pain panaji iri' oliva ma', ca an xiho' naparut ma', jao jao ma' pin ac maparut na quem. Je ca tomi' xuhu' ca': Wahu' pain ca om judeu hwe ma', pain ca an xiho' hwein taparain caji oliva ma', jao jao ma' pin hwein oro iri' taparain panaji oliva. Jao jao ma' pin ac maparut na pain ca judeu urut ca'. Quep xiho' pin nuhu' Iri' Jam quem, xi om ne ca xiram pa' ara cuhu' ta. Win ne ca quep xiho' caparut pain ca judeu urut ca'. Ac ca e' wi maparut na, ac ca toc wi maparut na pain waraqui pana ca maqui' nein caximain ma'.

Romanos 11:22

Je ca tomi' xuhu' ca'. Querec pin' xun Iri' Jam ta. Awi tamana na, quep xiho' taxipa' na, je curucun mao na. Ane wap mip cocon oro caracat ne. Noro jun pain ca wap mip cocon co camara' nana pain ca caracat nucucun ma'. Je ca tomi' xuhu' ca'. Mo ta howa cara hun pain ca awi nucun ma', quep xiho' cara ac cuhu' tara. Mo ta om howa cara hun pain ca awi nucun, wac pit pin ac cuhu' tara quem.

Romanos 8:28

Taxi' irin i ca' quem: Oro carawa ca ara napari' ca', je ca mam' quep xiho' capari' Iri' Jam ta. Mam' quep xiho' quep xiho' pi' pin napari' pain oro carawa ca ara napari'. Pain ca om noc xun Iri' Jam cwa', mam' quep xiho' pan napari' pain oro carawa ca ara napari'. Wara tomi' ca' napari' Iri' Jam: Wari' ne inuhu' ta napari'. Ma' ta aram aram ara tain ca param ne pahu' ta napari'.

1 Coríntios 13:1

Je ca tomi' xuhu' ca', tomi' pan xije pain ca mi' capa' pain ca taramaja taxi' wa Tamataracon Iri' Jam ca'. Mi' paxi' tarapa' pain ca tomi' taxi' tain oro capijacocon oro wari' Tamataracon Iri' Jam ma'. Mi' paxi' tarapa' pain ca tomi' taxi' tain capijacocon oro jam co taramaja mi' nonon Iri' Jam ma' quem. Mo ta om an xiho' ton Iri' Jam pain ca om noc capari' ca', je pain ca om noc cocon oro wari' ma' quem, tomi' ximao e' ac ta' tara, an xiho' e' ac tain tara arain too pain ca tao' xine ta.

Tito 2:14

Om ca nain ho' xucun pari' pane, mi' pin caho' xuhu' ta napari' pane. Ma' ta to' witan ca' xuhu' pain oro ca pan teretem nuhu' ta napari'. Ac ca hohoc capari' na pain quicon. Ma' ta to' om pin tain ca caracat nuhu' ta napari'. Ma' ta iri' wari' ne xuhu' ta napari'. Param napari' pain ca win xumu xun pain ca tama' ara xin oro ca awi wa quem.

Hebreus 12:15

Ma' tara xumuhu' me, ma' ta om ma' camain' ca win ma' nuhu' co tomi' ximao ma', pain ca noc inon Iri' Jam pain ca xiram pa' capa' ca' ca ma'. Ma' tara xumuhu' me, ma' ta om ma' camain' ca win ma' nuhu' co juhum' ximicon ma', aram aram ma' mija pin ac caca tara co pan teretem pin nana con. Om ca na camain' ne pain ca to' ara ac i ma' cuhu' pain ca cut in xujuhu' ta.

1João 2:19

Co ari nonon Cristo pain ca noc cocon ma', cut in wi paxi' nanapari' pane, ane om iri' win ma' ne cacapari' pain ca howa nexi' con Cristo ne. Je ca paca' cacapari' pane. Mo xi iri' win ma' ne cacapari' con Cristo ma', je xi momon cut in cut in cara cacapari' quem. Ane paca' cacapari' ne. Je ca querec pin' tococwa pain ca om win ma' ne cacapari' con Cristo.

Apocalipse 3:19

Tomi' inain taraxicocon oro wari' co om noc ta' cwa'. Hu xo' hu xo' pi' pin inonon. Je ca tomi' xuhu' ca': Ma' tara xumuhu' me, win xumu jein ca xuruxut xo' wa, cwirin' pin jein ca caracat nuhu' ta.