João 10:4 - Tradução Bíblica Pacaas Novos

⁴ An hwet to pi' pin iri nain winacon ne, o mama' ac cain na, ja' ja' pan ac con na quem. Xi om ne ca taraju pa' ara nein ca tomi' nucun.

João 10:4 Iomraidhean Croise

Mateus 16:24

Tomi' ac caparut na pain ca taxipa' urut con ca'. Wari' co ja' ja' xim napa' ma', miri'om ac cain tara ca param nucun. Om ta xiram pa' camain' cain curucun pain ca jin' cain ca mi' pin wa. Ac ca an tiquin' pan cain tara panaxicon ca mam' tatatain mi' xun tocwa ma'. Ja' ja' ac capa' tara ta.

João 10:16

Ma' nanapa' oro xucucun wari' co om howa querec nanapa' quem. Wari' ne toton inonon. An xiho' nanain oro ovelha ca corom to nain xijein ca tao' caho' nein ma'. Na e' na pain ca cut qui' toton quem. Taraju wet tatarain ca tomi' ne. Jao jao ma' ac cocon tara co wara howa nanapa', querec wet querec wet pi' pin ac toton tara quem. Xica' pe ta' pain ca querec wet toton ta.

João 10:27

Win ne oro ovelha ca taraju wet nain ca tomi' nucun co querec wet nain ma', ac i ma' na ca taraju wet cacain ca tomi' ne oro wari' ne ma' quem. Querec pin' inonon, ja' ja' ac cacapa' na quem.

João 10:3

Corom ta' e' iri non wari' co querec wet nain manain ca corom ac wa ma' ne, pa mi' ac tocwa na pain. Tomi' tomi' xam' ac cain na wixinain ovelha nucun, taraju pa' ac nein na ca tomi' nucun, o hwerehwet mama' ac cain na quem.

João 10:5

Ja' ja' paxi' non waximain ma', ane om ja' ja' camain' con xucun wari' ne. Jein ca' non, xi taraju pa' nein ca tomi' nucun ta. Ac i ma' na ca pijim' tococwa con pastor pain ovelha nucun pane.

João 10:8

Oro xucucun ma', co wara maqui' ca' nanapa' ma', co pijim' ni ca' nanain capijacon Iri' Jam ma', ac caxicon wari' nana. Ac ca cut noc xa xin cacain na ovelha. Ac ca quep em' xin cacain na. Howa xut me paxi' nonon oro wari' ne ma'. Ane om ha' tococwa ne.

João 12:26

Wari' co taramaja mi' xim napa' ma', na e' na pain ca ja' ja' cara capa'. Oro ca mao ne ca', je tara ca mao ca quem, pe ho' tarapa' quem. Wari' co taramaja mi' napa' ma', tomi' querec te ac tocwa tara, hohot ma ta ac tocwa tara. Wirico Te tara co hohot ma pan ton non ta na ca tomi' tococwa ma'.

João 13:15

Win ta' ca', ac i ma' tara ca ara mi' xujuhu' quem.

João 18:37

Je ca tomi' xim ca', taramaxicon ma ma' ira ac con na. Wum co tomi' pan nain i ma' ira, pain ca taramaxicon ma mapa' ma' ac con na. Je ca pan' ne ca pije' ne pane, je ca maqui' tain macan' pane. Tomi' hwet toton pain oro ca iri'o' wa oro wari' ta ina pane. Taraju wet nanapa' oro wari' co param nanain ca iri'o' wa quem na ca tomi' ca Jeju.

João 3:29

Win ca wari' co an tam narima' ma'. Win ma' ca ma' iri na ne, quep xiho' e' non, tomi' querec te e' non. Taraju iri nain ca tomi' nucun ne, tomi' querec te ac ca na. Ac i ma' ina con Jeju quem. Tomi' querec te tamana ina pain ca tomi' hwet mahu' cocon oro wari' co hwet nonon ta.

1 Coríntios 11:1

Je ca tomi' xuhu' ca': An xiho' xine me. Win ne ca an xiho' ton Cristo ca'.

Efésios 5:1

Mana panxita' pin nuhu' Iri' Jam. Om ca noc cuhu'. Je ta an xiho' hun quem.

Hebreus 12:2

Win xumu cara e' xun Jeju ma', xi wirico ara ca co mi' napari' pain ca howa wa pain ca xo' howa qui' xun pane, wirico co mi' xim napari' pain ca howa cara xun quem. Wixipa' paxi' nana wari' co tatatain mi' wawa pain pana ma', ane je i ma' ira ta pan ca Jeju ne. Quereme na pain ca tatatain mi' ma' tatarapa' pain ne ca pane, xi om ne ca coromicat ara cain ca aram aram tomi' querec te tamana ta' nucun pain pawin ta. Je ca pe ca pain xocori ca' quem, xao pe ho' nain iri' curucun Iri' Jam cwain.

1Pedro 2:21

Je ara xi' na ca wara param mi' cuhu' pain ca xo' howa xine ta qui' cuhu' pain cara pane. Mo ta quep em' ximama' xihwe, je i ma' ira je, quereme ac hwein tara ta nuhu'. Xi om ne ca quereme ara ca Cristo pain ca quep em' ximao pan tocwa pain ca mi' pin caho' cuhu' pane ta. Win ta' pane, an xiho' xine pain ca quereme ta' pane nuhu' quem.

1Pedro 4:1

Je ca tomi' xuhu' ca'. Jain jain na Cristo pain ca wari' nucun pane, pain ca ma' ne curucun pane. Je ta wara awori xo' qui' hwe pain ca an xiho' hun pain ca coromicat nucun quem, pain ca om nain ho' pan xucun pain ca jain jain wa pane. Xi ac i ma' ara ca wari' co quereme nain ca jain jain wa pain ca caxi ne curucun ma'. Noc nain ca caracat wa ta.

1Pedro 5:3

Om ca na ne pain ca tomi' xec xec ca' huhun co querec wet hwe ma': Wata' co taramaxicon cwa', tomi' ha' e' xine, om ca na camain' ne pain ca tomi' ac i ma' huhun. Xuruxut xo' e' je cocon, ma' ta win caca ne cucuhu' ma'.