Gálatas 3:2 - Tradução Bíblica Pacaas Novos

² Ma' xica' pe e' na ca tomi' querec xim xuhu' ca', tomi' xo' xine e': Para mi' cuhu' pain Tamataracon Iri' Jam quem? Mam' mi' nuhu' pain Tamataracon pain ca tama' tomi' ha' hwein ca xirao' nucun Moisés ra? Om ca mam' mi' cuhu' pain Tamataracon pain ca howa hwein oro ca pijim' urut pahu' ra? Je ca tomi' xuhu' ca', mi' nuhu' pain Tamataracon, xi om ne ca howa ara hwein oro ca pijim' urut pahu' pane ta.

Gálatas 3:2 Iomraidhean Croise

Atos 15:8

Iri' Jam ma', co querec pin' nain ximicocon oro wari' ma', an hwet mi' napari' pain ca hohot cocon oro wari' co om judeu nana ma'. Hohot nonon pain ca howa pin cacain capijacon. Xi om ne ca mi' ara tococwa pain Tamataracon ta. Win capari' pain ca mi' capari' pain Tamataracon pane quem.

Atos 2:38

Cwirin' pin jein ca caracat nuhu' ta ac cocon na Pedro. Ja' ja' pi' pin ac xihwe tara pain com quem. Ma' ta querec pin' xihwe pain ca howa pin hun Jeju Cristo. Ma' ta xic am pin cain ca caracat nuhu' Iri' Jam ma' quem. Mi' ac cuhu' tara pain Tamataracon.

Atos 8:15

Tan' mama' iri nanain i cain ne, tomi' mi' pan ac cocon na con Iri' Jam oro co xo' howa nana ma'. Mi' roron pain Tamataram caram cwa' ta nana pain ca tomi' mi' cocon con Iri' Jam.

Romanos 1:17

Pain ca tomi' xo' capari' pain capijacon con Jeju cwa', je ca an hwet mi' capari' pain ca to' hohot pin capari' Iri' Jam. To' hohot pin napari', xi om ne ca howa ara xun ca'. Xica' pe na ca howa nexi', je ca to' hohot pin capari' ca'. Je ca xirao' pe xine pain capijacon Iri' Jam ca'. Ca' na con: E' cara tara wari' co to' hohot ta' cwa', xi om ne ca howa ara capa' ta, ac i ma' na ca xirao' pe xine pain capijacon Iri' Jam pane.

1 Coríntios 9:21

Ac i ma' ina pain ca pe ho' toton oro co om judeu nana pain ca om tomi' ha' cacain ca xirao' nucun Moisés quem. Pe ho' iri inonon ne, an xiho' ac toton na, miri'om ac tain na ca xirao' nucun Moisés. Ma' ta howa cocon Cristo pata' inonon. Taraju pa' jein i ca' quem: Pain ca miri'om tain ca xirao' nucun Moisés ma', om paxi' na ca miri'om pan ton Iri' Jam. Tomi' ha' cara ara xi' inain capijacon Cristo.

2 Coríntios 11:4

Toron napa' xumu pahu', xi i'ina taraju wet huhun oro co pijim' ni ca' nanain ca pijim' nuxut pain ca pijim' hwet urut pahu' con Jeju pane. Xin ne huhun pain ca pijim' ni ca' cacain Tamataracon Iri' Jam ca howa hwe pane, xin ne huhun pain ca pijim' ni ca' cacain capijacon Iri' Jam ca wara howa hwe con Jeju pane quem.

Gálatas 3:14

To' witan ca' napari' pain ca tomi' noro nucun Iri' Jam Jeju Cristo, ma' ta hwet cocon ca wara param mi' tocwa Abraão oro wari' co om judeu nana ta na pain ca param mi' toton pain ca awi wa oro co howa nanapa' ta tococwa. Ma' ta mi' xuhu' pain ca wara tomi' pe ne ca', pain ca mam' mi' xuhu' pain Tamatara pain ca howa hun Cristo ta napari' Iri' Jam quem.

Gálatas 3:3

Cain' cain' xihwe quem? Para om coromicat xo' hwe ma' quem? Pain ca xo' howa ten qui' hun Cristo pane, je Tamataracon Iri' Jam ca meo nuhu' pain ca taramaja nein xumuhu'. Ma' tara ca ara pan ac hwein ca taramaja nein Tamataracon Iri' Jam pain ca to' hohot pan xijexi' ta hwe pain xocori ca' ra?

Gálatas 3:5

Para mi' cuhu' pain Tamataracon Iri' Jam quem? Para ara mi' cuhu' pain oro ca om ara taxi' ne ca wari' wa quem? Ara ac i ma' nuhu' pain ca tomi' ha' hwein oro ca ara je cuhu' pain ca xirao' nucun Moisés ra? Om na ta! Howa ara xi' hwein oro ca pijim' xihwe con Cristo ta. Je ca mi' cuhu' pain Tamataracon. Je ca ara mi' cuhu' pain oro ca om ara taxi' ne ca wari' wa quem.

Hebreus 2:4

Iri'o' na ca tomi' nucucun ta ac ca na Iri' Jam quem, ac ca tomi' wi cocon na pain ca mi' tococwa pain ca ara cacain oro ca om ara taxi' ne ca wari' wa, wa wa tamana ac caca na oro wari' ma' quem. Ma' iri na wari' co param pan ca ne, pain ca mi' tocwa pain ca taramaja taxi' wa ca mi' ne Tamataracon ma', mi' ac tocwa pain na quem. Ac i ma' na ca an hwet cain ca tomi' iri'o' nucucun oro co tomi' hwet nanapari' con Jeju pane.

Hebreus 4:2

Taraju ara xi' irin capijacon Iri' Jam pain ca to' witan xuhu' ta capari' quem. Win caca oro hwanana nexi' pane. Taraju paxi' nanain, ane om howa cacain ne. Je ca om ja' tomi' querec te ac tococwa pain oro ca taraju cacain pane.

Hebreus 6:4

Tomi' xuxun oro wari' co wara taraju pa' paxi' nanain capijacon Iri' Jam ma', xi om ne ca toha mi' ara tococwa pain naran nucun pain ca coromicat nucucun ta. Wara querec pin' paxi' nanain oro ca mi' xim capari' Iri' Jam. Wara meo paxi' nonon Tamataracon quem.

1Pedro 1:12

Tomi' xo' ca' tata oro profeta pane: Tomi' hwet iri hwein oro carawa jimao ca maqui' ta' ma' ne, om ca quep xiho' pan xujuhu', om na. Quep xiho' pan huhun oro xucucun wari' co maqui' xi' nana pa'ao' ta na ca tomi' xo' tococwa pane. Je ca tomi' xuhu' ca'. Wahu' pan co quep xiho' xi' wawa pain ca tomi' hwet nucucun pane. Je ca pijim' hwet xihwe pain xocori ca' quem. Oro co pijim' hwet nunuhu' pain capijacon Iri' Jam con Jeju ma', mam' pijim' hwet nunuhu' pain ca hwara' opa nein Tamataracon Iri' Jam ca mam' capari' pain pawin pane. Capijacon Iri' Jam ca pijim' xihwe ma', jain jain pan nanain oro jam co taramaja mi' nonon ma'. Taraju pa' xixi' na nanain.