Gálatas 3:13 - Tradução Bíblica Pacaas Novos

¹³ Tomi' noro napari' Iri' Jam, xi tomi' ha' xo' ac xin ca xirao' nucun Moisés ta. Ane to' witan pan capari' Cristo ne, to' witan ca' napari' pain ca tomi' noro nucun Iri' Jam. Pe pan tain maxuhu', tomi' noro e' tarapa' pahu' ta napari'. Xi xirao' pe ara xine pain capijacon Iri' Jam ta: Oro wari' co to' pa' pin wawa pain ca tatatain mi' wawa pain pana ma', wiricoco co tomi' noro ca Iri' Jam ta na capijacon Iri' Jam.

Gálatas 3:13 Iomraidhean Croise

Mateus 26:28

Comi memem ca', an xiho' nain cocu ta ac caparut na. Je ca to' querec pin' cuhu' pain ca tomi' an pe xo' mi' cuhu' Iri' Jam cwa', pain ca to' witan xim cuhu' ca'. Ao mao iri tara cocu pain ca mi' pin ta' ne ca' ne, je win ara pin tain cain ca wara tomi' an pe nucun. Mija tara oro wari' co mi' pin caho' ta' ta' quem. Xic am pin ac xine tara ca caracat nucucun pata'.

Mateus 27:5

Wixicaracao' in pin ac cain na moeda nein prata ma', pain tequipain cote ne xiricon Iri' Jam ma'. Hwet mao ac ca na, tucu juhum' pa' ac xucun na pain macon pain canemicon, mi' pin ac ca na quem.

Atos 5:30

To' pa' pin paxi' hun Jeju pain ca tatatain mi' hun pain pana pane. Ane to' e' mami' pan con Iri' Jam co howa caca hwanana nexi' ne.

Romanos 4:25

Je ca tomi' xuhu' ca'. Om ca nain ho' con Jeju Iri' Jam pane. To' pa' pin jun tata co to' pa' pin xun nonon pane. Xi om ne ca caracat nexi' ta. To' e' mami' ac con na quem. Ma' ta to' hohot pin xuhu' ta napari' ta.

Romanos 9:3

Xi xiram pa' ara toton oro ca nari ne cwa', xiram pa' inonon oro win judeu ta' cwa'. Mo xi ha' capa' pain ca pe tain maxicocon ma', wap pan ac capa' xira Iri' Jam, an pe ni ca' ac capa' xira con Cristo quem. Om ac ne xira ca wap tococwa oro ca nari ne cwa' quem.

2 Coríntios 5:21

Om paxi' na ca caracat ca Cristo pane, ane cut mi' pan con pain ca caracat nexi' Iri' Jam ne. Ac wari' co caracat pin ma ta non pari'. Ma' ta to' hohot pin xuhu' ta napari'. Win cwere iri jun Cristo ne, querec hohot ac xuhu' tara, ac ca om caracat camain' hwe tara con ta napari' quem.

Gálatas 3:10

Ane om ac i ma' ne cocon oro wari' co howa e' nanain ca tomi' ha' pan nucucun ne. Main tomi' noro toton pan nonon Iri' Jam, wap xuhu' ta nonon. Xi xirao' pe ara xine pain capijacon Iri' Jam ta: Oro wari' co om tomi' ha' cara pi' pin nanain oro ca ara je toton pain ca xirao' nucun Moisés ca', tomi' noro toton, main wap toton ta, ac i ma' na ca xirao' pe xine pain capijacon Iri' Jam ta.

Gálatas 4:5

Mam' napari' con, ma' ta to' witan ca' cuhu' pain ca wap wa pain ca om tama' tomi' ha' ac hwein ca xirao' nucun Moisés ta napari'. Ma' ta mana panxita' pin xuhu' ta napari' quem.

Efésios 5:2

Ta noc camain' xujuhu' me. Win ca Cristo pain ca om noc qui' capari' pain ca om narain ho' qui' xucun pari' pane, ac i ma' je pain ca om noc xujuhu' me. Mi' pan xucun con Iri' Jam Cristo. Ma' ta mi' pin caho' toton ta non pari' pane. Hohot tamana non Iri' Jam quem, hohot tamana non pain ca mi' pin caho' capari'.

Tito 2:14

Om ca nain ho' xucun pari' pane, mi' pin caho' xuhu' ta napari' pane. Ma' ta to' witan ca' xuhu' pain oro ca pan teretem nuhu' ta napari'. Ac ca hohoc capari' na pain quicon. Ma' ta to' om pin tain ca caracat nuhu' ta napari'. Ma' ta iri' wari' ne xuhu' ta napari'. Param napari' pain ca win xumu xun pain ca tama' ara xin oro ca awi wa quem.

Hebreus 9:12

Corom mao iri nain Iri' Maxicon Iri' Jam Cristo ne, pain xiricon pain pawin cain, om ca mam' corom cain quinain bode, om ca mam' corom cain quinain wijimain boi quem, om na. Mam' corom pan nain iri' quicon. Pain ca corom mao cain pane, corom mao na. Om ca corom mao mami' cain quem. To' witan cara ac capari' na quem.

Hebreus 9:15

Je ca tomi' an pe xo' cain xocori ca tomi' xo' nucun Iri' Jam Cristo ma'. Ma' ta ha' cuhu' pain ca aram aram cut xin hwein oro ca awi wa ca tomi' pe mi' xihwe ca', ca om pi' ra ha' ca' tata pain ca xo' howa xine qui' tococwa pane. Xi mi' pin pe ara cain maxicocon Cristo pane ta. To' witan ca' ac tococwa na pain oro ca caracat nucucun pain ca om tomi' ha' qui' cacain ca wara tomi' xo' nucun quem.

Hebreus 9:26

Mo xi mi' pin ho' mi' pin ho' ca ma', na e' na pain ca jain jain ho' jain jain ho' qui' ca pain ca xo' tomi' ma' qui' xine macan' pain cara pane. Ane om ac i ma' ca ne. Pain ca maqui' cain macan' ca', pain oro xec nein ca pi' pin ta' ne macan' ca', maqui' xica' pe na. Om ca maqui' mami' ca. Ma' ta mam' xic am pin tain ca caracat wa pain ca mi' pin ne ca', pain ca mi' pan xije con Te Iri' Jam ta na pane.

Hebreus 9:28

Ac i ma' na Cristo pain ca mi' pin nucun quem. Mi' pan xucun con Iri' Jam, om ca ara mami' cain, om ca mi' pin mami' ca quem. Ma' ta to' om pin tain ca caracat nucucun oro wari' co mija nana ta na. Maqui' mami' tarain macan' quem. Maqui' mami' iri tara ne, om ta to' om mami' cain ca caracat nexi'. To' witan xuhu' pain ca winim' mahu' ta napari'.

1Pedro 2:24

Wirico co quereme ma', pain ca tatatain pe tocwa pain pana pane. Cut pi' pin nain ca caracat nexi' pain curucun. Ma' ta caracat caracat om pin hwe ta napari'. Ma' ta xuruxut xo' hwe pain ca ara e' hwein ca awi wa ta napari' quem. To' xio pin nuhu', xi om ne ca wap wein pin ara xine curucun pane ta.

1Pedro 3:18

Xi jain jain ara ca Cristo pain ca mi' pin caho' capari' pain ca caracat nexi' pane ta. Pain ca mi' pin nucun pane, mi' pin na. Om ta mi' pin mami' ca. Om ca caracat camain' ca, xut xo' na, awi na. Ane mi' pin caho' pan capari' pain ca pan teretem nexi' pain ca om xuruxut xo' nexi' ne. Ma' ta o mi' xuhu' con Iri' Jam ta napari'. To' pa' pin iri ta pane ne, mi' pin ac ne na curucun. To' e' mami' iri ta ne, je Tamataracon Iri' Jam ac ne na ca to' e' mami' non quem.

1João 4:10

Pain ca om noc xun Iri' Jam ma', tomi' querec te paxi' urun. Ane om noc iri'o' pan capari' ne. Je ca mam' capari' con Panxica pane. Pe rain maxicocon, mi' pin caho' roron, xic am pin rain ca caracat nucucun ta non pari'. Je ca querec pin' xun pain ca om noc iri'o' capari' ta.

Apocalipse 1:5

Param inon Jeju Cristo pain ca quep xiho' cuhu' pain ca mi' cuhu' pain ca param nucun, param inon pain ca mi' cuhu' pain ca om toron ne xumuhu' quem. Wirico Jeju co tama' tomi' iri'o' ma', co to' e' mami' cain' ca Iri' Jam pane, co iri' Taramaxicon co hwara' opa tiquin' ca' nonon oro taramaxicon co taramaxicon to nanain oro xijein macan' ca'. Wirico Jeju Cristo co om noc napari' ta. To' witan ca' napari' pain ca caracat nexi' ca'. Mam' to' witan napari' pain quicon.

Apocalipse 13:8

Co ma' co ac Wijimain Taramaji Ovelha ma', co wara coromicat an pe xo' ca Iri' Jam pain cara pane, pain ca om tomi' ma' pin querec cain macan' pane, co main to' pa' pin xim nenem oro caracat ta ca pane, ma' non tapari carawa ca xirao' to xine wixicocon oro co e' cara xi' nana ma'. Oro wari' co to nanain oro xijein macan' ma', co om xirao' to wa wixicocon pain tapari carawa nucun co ma' co ac Wijimain Taramaji Ovelha ma', wa wa wa wa xam' totoron co ma' co ac caji carawa ma'. Pe torotop mi' querec te totoron quem.

Apocalipse 5:9

Com ac cacain na xocori tamara': Wum co awi tamana, wum co hohot pain ca an main tapari carawa ca joc top ma', je pain ca pa main oro ca hupa' caho' nein ma'. Xi om ne ca to' pa' pin ara xima pane ta. Cut mi' momon con Iri' Jam oro wari' co xucun wari' xucun wari' pi' pin nana ma', co capija ni ca' nonon oro xucucun wari' ma', co to ni ca' nonon oro xucucun wari' pain macaracocon ma', co to nanain oro xijein macan' ma' quem. Pain ca cut mi' momon con Iri' Jam ma', mam' to' witan momon pain cocum.