Gálatas 3:10 - Tradução Bíblica Pacaas Novos

¹⁰ Ane om ac i ma' ne cocon oro wari' co howa e' nanain ca tomi' ha' pan nucucun ne. Main tomi' noro toton pan nonon Iri' Jam, wap xuhu' ta nonon. Xi xirao' pe ara xine pain capijacon Iri' Jam ta: Oro wari' co om tomi' ha' cara pi' pin nanain oro ca ara je toton pain ca xirao' nucun Moisés ca', tomi' noro toton, main wap toton ta, ac i ma' na ca xirao' pe xine pain capijacon Iri' Jam ta.

Gálatas 3:10 Iomraidhean Croise

Mateus 25:41

Tomi' ac toton tara co to nanain paraju quem, co om xuruxut xo' nana quem: Wahu' pain ca tomi' noro cuhu' Te ma', to ni ca' xine. Mama' jein cote ne xe ca om jo' ra ha' cain, ca wara quep awori mi' tocwa pain Caxicon Jam cocon oro jam nucun co taramaja mi' nonon cwain.

Romanos 4:15

Xi quep xiho' capari' ca xirao' nucun Moisés pain ca tomi' ha' xin ta. Noro jun wari' co tomi' ha' tain paxi' nain. Ane om tama' tomi' ha' cain ne. Mana' ac tocwa na, mana' pan non Iri' Jam. Wap ac con na quem. Om iri xira ca tomi' caho' tocwa ne, om ac ne xira ca tomi' in pin ca, xi tomi' caho' tocwa pain ta.

Romanos 6:23

Je ca tomi' xuhu' ca': Wari' co taramaja mi' nain ca caracat wa ma', aram aram mi' pin ac ca tara, ac i ma' tara ca pagar tocwa pain ca caracat wa. Ane jimao ca Iri' Jam ne. Mi' e' napari' pain ca om pi' ra ha' ne ca e' wa. Om ca pagar xine pain capari'. Mi' e' napari' pain. Xi om ne ca win cwere ara xun Taramaxicon nexi' Cristo Jeju ta.

Romanos 8:7

Je ca noc cocon Iri' Jam oro wari' co win xumu nanain oro ca param nucucun ma'. Xi tomi' ha' cacain capijacon ta. Om ca tomi' ha' taxi' cacain quem.

2 Coríntios 3:7

Tomi' xin ca wara tomi' xo' nucun Iri' Jam pane, ca xirao' pe xine pain pacun pane. Om ca to' witan ac tococwa oro wari' co tomi' ha' xin paxi' nanain ma', xi tomi' ha' taxi' cacain ta. To' cono' pin tata. Ac i ma' paxi' na cocon, ane awi pan ne ca wara tomi' xo' nucun pane ne. Hwara' opa na quem. Tomi' xo' mi' iri non pain Moisés Iri' Jam pane ne, toc meremem pan ac ca na pain ca hwara' opa nucun. Toha mi' non Moisés, toc meremem pan ac ne na tocon quem. Om paxi' na ca toc meremem cara ne con Iri' Jam pane. Ane om ha' cocon ca noro cacain tocon oro wari' nein Israel quem ne.

Gálatas 2:16

Ac i ma' paxi' iri' pain ca judeu iri' ca'. Ane taxi' xin i ca' ne: Om ca to' hohot capari' Iri' Jam pain ca tomi' ha' taxipa' xin oro ca ara je capari' pain ca xirao' nucun Moisés ma', om na. To' hohot napari' pain ca howa xun Jeju Cristo. Je ca howa iri' con Cristo Jeju pain ca judeu iri' ca' quem. Ma' ta to' hohot capari' Iri' Jam pain ca howa xun Cristo ta iri'. Om ca to' hohot capari' pain ca tomi' ha' xin oro ca ara je capari' pain ca xirao' nucun Moisés ta iri'. Xi to' hohot ac tocwa wari' pain ca tomi' ha' e' cain oro ca ara ra con Iri' Jam pain ca xirao' nucun Moisés ta iri', ac i ma' na ca coromicat nexi' pain ca howa pin xun Cristo Jeju ta.